Latest Articles

  • የአፍ መድረቅ መፍትኤ እና መፍትሄዎቹ - Dry lips treatment

                                                      

    የአፍ መድረቅ ችግር በአብዛኛው ጊዜያዊ ችግር እንጂ የከፋ የጤና ችግር ምልክት ሊሆን እንደሚችል አይገመትም;; ይሁን እንጂ ሰውነታችን ያለ በቂ ምክንያት በአፋችን ውስጥ እርጥበት(ምራቅ) እንዲኖር አያደርግም;; 

    ለጥርስ መበስበስ ምክንያት የሚሆኑ ባክቴሪያዎች ደረቅ ሁኔታ ይመቻቸዋል ስለዚህ የአፍ መድረቅ ለጥርስ እና ሌሎች በሽታዎች ምክንያት ሊሆን ይችላል;; 
    ምራቃችን የአልካላይ ይዘት ያአለው ሲሆን የምንመገባቸውን የአሲድ ይዘት ያዘት ያላቸው ምግቦች ጥርሶቻችን እንዳያበላሹት ያደርጋል;;

    የአፍ ድርቀት መንስኤዎች
     መድሃኒቶች
    የጨጓራ እና ደም ግፊት ህመምን የአዕምሮ መቃወስን ለማከም የሚወሰዱ መድሃኒቶች የአፍ ድርቀትን ከሚያስከትሉ መካከል ያጠቀሳሉ 
     እርጅና
    እድሜያች እየጨመረ ሲሄድ የምራቅ አመንጪ እጢዎች ምራቅ የማመንጨት አቅማቸው ይቀንሳል 
     የውሀ ጥም 
    ሰውነታችን በቂ ውሀ ሳያገኝ ሲቀር ምራቅ የማመንጨት አቅሙ ይወርዳል 
     የአተነፋፈስ ችግር 
    ከአፍ ይልቅ በአፍንጫ መተንፈስ በርካታ ጥቅሞች እንዳሉት ይነገራል;;የመተንፈሻ አካልት ችግር በተለይም የአፍንጫ ቀዳዳዎች መዘጋት ግን በአፍ ብቻ እንድንተነፍስ ያስገድዱናል በመሆኑም ለረጅም ሰአት በአፍ መተንፈስ የአፍ ድርቀት ያመጣል 
     የካንሰር ህክምናዎች
    በጨረርም ሆነ በኬሞቴራፒ የሚደረግ የካንሰር ህክምና ለአፍ መድረቅ መንስኤ ሊሆን ይችላል

    ለአፍ መድረቅ መፍትሄዎች
     ውሀ በብዛት መጠጣት;-የአልኮል መጠጥ ከጠጡ በኋላ የአፍ መድረቅ ስሜት የሚሰማቸው ሰዎች ውሃ አብዝተው መጠጣት አለባቸው በተለይም ቀይ ወይን የአፍ ውስጥ እርጥበትን የመቀነስ አቅምሙ ከፍተኛ በመሆኑ በቂ ውሃ መጠጣት ያስፈልጋል;;
     የስኳር ይዘት የሌላቸውን ከረሜላዎችን እና ማስቲካዎች ማኘክ የምራቅ መመረትን ስለሚያሳድግ ይመከራል 
     የአፍ ድርቀት ለመቀነስ የተዘጋጁ የጥርስ ሳሙናዎችን መጠቀም 
    ይሁን እንጅ ሁሌም ከእንቅልፍ ስንነቃ የጉሮሮ ህመም የሚሰማን ከሆነ እና ሌሎች የአፍ ድርቀት ምልክቶችን ካስተዋልን ወደ ህክምና መሄድ ያስፈልጋል;;ከዚህ በተጨማሪ የታዘዘልን መድሃኒት ለአፋችን መድረቅ ምክንያት ሆንዋል ብለን ካስብን ሀኪማችንን ማማከር ተገቢ ነው::

     

    ምንጭ:- ዶክተር አለ(Doctor Alle)

     

    Read more
  • በዩኒቨርሲቲው ኢንጅነሪንግ ትምህርት ክፍል ብንመደብም በሌላ የትምህርት መስክ እንድንማር ተደርገናል - ተማሪዎች - Chose to study Engineering

                                                         

    በተመስገን እንዳለ

    ትምህርት ሚኒስቴር በአዲስ አበባ ዩኒቨርሲቲ ኢንጅነሪንግ ትምህርት ክፍል ቢመድበንም ዩኒቨርሲቲው ከህግ ውጪ በሌላ የትምህርት መስክ መድቦናል ሲሉ ተማሪዎች ቅሬታ አቀረቡ።

    ተማሪዎቹ ለከፍተኛ ትምህርት ተቋም ምደባ የሚያበቃቸውን ውጤት በማምጣት፥ በሀገር አቀፍ ትምህርት ምዘና እና ፈተናዎቸ ኤጀንሲ ለ2010 የትምህርት ዘመን በአዲስ አበባ ዩኒቨርሲቲ በኢንጅነሪንግ ሳይንስ ትምህርት ዘርፍ መመደባቸውን ይናገራሉ።

    ይሁንና የተመደብንበት የአዲስ አበባ ዩኒቨርሰቲ ትምህርት ሚኒስቴር በምደባ ካሳወቀን የትምህርት መስክ ውጭ፥ መድቦናል ሲሉ ነው ቅሬታቸውን ለፋና ብሮድካስቲንግ ኮርፖሬት ያቀረቡት።

    እንዲህ ያለው የአዲስ አበባ ዩኒቨርሲቲ የምደባ ሂደት ህግን ያልተከለለ ነው የሚሉት ተማሪዎቹ በተደጋጋሚ የተቋሙን የስራ ሃላፊዎች ቢያናግሩም ተገቢ ምላሽ አለማግኘታቸውን ይገልጻሉ።

    ከተማሪዎቹ ከቀረበው ሰነድ መረዳት እንደቻልነውም ተማሪዎቹ በትምህርት ሚኒስቴር የተመደቡበት የትምህርት መስክ እና የዩኒቨርሲቲው ምድባ የተለያየ ነው።

    የአዲስ አበባ ዩኒቨርሲቲ ምክትል ሬጅስትራር ሃላፊ አቶ መሰለ ብርሃኑ ደግሞ፥ ዩኒቨርሲቲዉ በኢንጅነሪንግ ዘርፍ ከትምህርት ሚኒስቴር 700 ተማሪዎችን ለመቀበል አመልክቶ ከ900 በላይ ተማሪዎችን እንዲቀበል መደረጉን ያነሳሉ።

    በዚህ ሳቢያም ተቋሙ ካመለከተው ውጭ ያሉትን ተማሪዎች በሌላ የትምህርት መስክ ለመመደብ ተገዷል ብለዋል ምክትል ሬጅስትራር ሃላፊው።

    ዩኒቨርሲቲው ለትምህርት ሚኒስቴር የኮምፒውተር ሳይንስ ተማሪዎችን ለመቀበል ጥያቄ ማቅረቡን ያስታወሱት ምክትል ሬጅስትራር ሃላፊው፥ በሀገር አቀፍ የትምህርት ምዘና እና ፈተናዎች ኤጀንሲ በኩል ግን የተማሪዎች ምደባ አለመደረጉን ተናግረዋል።

    በዚህ ምክንያትም ዩኒቨርሲቲው በኢንጅነሪንግ ዘርፍ ከጠየቀው ቁጥር በላይ የመጡ ተማሪዎችን በዚህ የትምህርት መስክ መድቧልም ነው ያሉት፤ ጥቂት ተማሪዎችም በሚቀጥለው አመት ወደ ፈለጉት የትምህርት መስክ እንደሚዛወሩ በመጥቀስ።

    የትምህርት ሚኒስቴር በበኩሉ ድልድሉ የዩኒቨርሲቲዎችን የቅበላ አቅም ግምት ውስጥ በማስገባት መካሄዱን ገልጿል።

    ሚኒስትር ዲኤታው ዶክተር ሳሙኤል ክፍሌ እንደሚሉት፥ ከዚህ ውጭ በሆነ ምክንያት በሌሎች የትምህርት መስኮች መመደብ ህጉን የተከተለ አይደለም።

    ሚኒስቴሩም ተማሪዎች ያቀረቡትን ቅሬታ ከሚመለከታቸው አካላት ጋር አይቶ እስከ መጭው ረቡዕ ድረስ ተገቢውን ምላሽ ይሰጣል ብለዋል።

    ምንጭ:- ኤፍ ቢ ሲ(FBC)

     

     

     

    Read more
  • በ2009 ዓ.ም ለመንገድ ልማት ተነሺዎቸ ከ88 ሚሊየን ብር በላይ ካሳ ተከፍሏል - የአዲስ አበባ መንገዶች ባለስልጣን - Over 88 million Birr spent for highway constructions

                                                          

    የአዲስ አበባ መንገዶች ባለስልጣን በተጠናቀቀው በጀት ዓመት ለመንገድ ልማት ተነሽዎች እና ለመሰረተ ልማት ተቋማት ከ88 ነጥብ 8 ሚሊየን ብር በላይ ካሳ መክፈሉን አስታወቀ።

    በዚህም በራስ ሀይል የሚገነቡ 43 የመንገድ ፕሮጀክቶች፣ 27 የኮንትራት ፕሮጀክቶች እና 13 በጋራ መኖሪያ ቤቶች የሚገነቡ የመንገድ ፕሮጀክቶችን በድምሩ 83 የመንገድ ፕሮጀክቶችን የወሰን ማስከበር ስራዎች መስራት መቻሉን ነው ባለስልጣኑ ያሳወቀው።

    በወሰን ማስከበር በተሰራው ስራም ከ800 በላይ ቤቶችን ለማንሳት ተችሏል።

    በበጀት ዓመቱም ከ1 ሺህ 500 በላይ ቤቶችን ለማንሳት ከተያዘው እቅድ አንፃር አፈፃፀሙ 53 በመቶ ነው ተብሏል።

    በተጨማሪም የመሰረተ ልማት ተቋማት ጋር በተሰራ የቅንጅት ስራ ከ1 ሺህ 200 በላይ የመብራት፣ ቴሌኮም እና የውሃ መስመሮችን ለማንሳት ከተያዘው እቅድ፥ ከ800 በላይ የሚሆኑትን በማንሳት የእቅዱ 70 በመቶውን ማሳካቱን ነው ባለስልጣን መስሪያ ቤቱ የገለፀው።

    ምንጭ:- ኤፍ ቢ ሲ(FBC)

    Read more
  • በ2009 ዓ.ም ግንባታቸው ተጠናቆ ሥራ የጀመሩት ዘመናዊ የመኪና ማቆሚያ ቦታዎች ተመን ወጥቶላቸው አገልግሎት እየሰጡ ነው ተባለ፡፡ - Modern public car park

                                  

    ምህረት ስዩም

    በመገናኛ ዘፍመሽ የተገነባው የመኪና ማቆሚያ ቦታ በሰዓት 6 ብር በማስከፈል አገልግሎት እየሰጠ እንደሚገኝ ተነግሯል፡፡

    የመኪና ማቆሚያው በአካባቢው የተገነባው የሚታየውን የተጨናነቀ የመኪና ፍሰት ለማስቀረት በመሆኑ በአካባቢው መንገዶች ዳር ላይ መኪና ማቆም የተከለከለ ሲሆን ህጉን ባለማክበር መኪና የሚያቆሙ ግለሰቦች እየተቀጡ እንደሆነ ከአዲስ አበባ የትራንስፖርት ፕሮግራሞች ማስተባበሪያ ፅህፈት ቤት ሰምተናል፡፡

    ፓርኪንጉን በቋሚነት ለሚጠቀሙ ደንበኞችም በወርሃዊ የክፍያ ስርዓት እንዲስተናገዱ ይደረጋል ተብሏል፡፡

    የፓርኪንግ ቦታውን የሚያስተዳድረው የአዲስ አበባ መንገድ ትራፊክ ማኔጅመንት ኤጀንሲ ሲሆን በቀን እስከ አራት ሺ ብር የሚደርስ ገቢ ከመኪና ማቆሚያ ስፍራው እየተገኘ ነው ተብሏል፡፡

    በሌላ በኩል በወሎ ሰፈር የተገነባው የመኪና ማቆሚያ ስፍራ ግንባታው አልቆ ሥራ ቢጀምርም ወደ መኪና ማቆሚያው የሚያስገባው መንገድ በግንባታ ላይ በመሆኑ የሚጠበቀውን ያህል ተጠቃሚ አላገኘም ተብሏል፡፡

    ይህንንም ለማስተካከል መንገዱን ምቹ ማድረግና በአካባቢው ባልተፈቀደ ቦታ ተሽከርካሪያቸውን የሚያቆሙ ግለሰቦች ላይ ቁጥጥር ይደረጋል መባሉን ከፅህፈት ቤቱ ሰምተናል፡፡

    ምንጭ:- የሸገር FM 102.1 ሬዲዮ

     

    Read more
  • የኢንቴርኔት አጠቃቀም ፍጆታን ለመቀነስ የሚረዱ ጠቃሚ ምክሮች - Ways to make sure you're not wasting internet data

                                                   

    የስልኮቻችንን ባትሪ ዕድሜ ለማራዘም እና የኢንተርኔት አጠቃቀም ፍጆታን ለመቀነስ የሚረዱ ጠቃሚ ምክሮችን ባለሙያዎች አስቀምጠዋል።

    በዚህም መሰረት የሚከተሉትን ተግባራት ቢያከናውኑ የስክዎን ባትር እድሜ ያራዝማሉ፤ የኢንተርኔት አጠቃቀም ወጪን ይቀንሳሉ።

    1. የማይጠቀሙባቸውን መተግበሪያዎች ባክግራውንድ(ዳታ) እንዳይሰሩ ማድረግ

    2. ሞባይል ስልክዎን ቻርጅ ላይ ሰክተው አለመጠቀም

    3. የማይጠቀሙባቸውን መተግበሪያዎች ወደ ስልክዎ ማሳወቂያ እንዳይልኩ ማድረግ

    4. አቅጣጫ መፈለጊያ፣ ብሉቱዝ፣ 3ጂ/4ጂ እንዲሁም ዋይፋይ በማንጠቀምበት ጊዜ ማጥፋት

    5. ትላልቅ ፋይሎችን ለማውረድ ገመድ አልባ ኢንተርኔት(ዋይፋይ) ብቻ መጠቀም

    6. የሞባይል መተግበሪያዎችን ለማሻሻል ዋይ ፋይን ይጠቀሙ

    7. ኢንተርኔት በማይጠቀሙበት ጊዜ የሞባይልዎን ኢንተርኔት(ዳታ) ይዝጉ

    8. አገልግሎት የማይሰጡ ወይም ጊዜ ያለፈባቸውን መተግበሪያዎችን ከስልክዎ ያስወግዱ 

    9. ሁልጊዜ የስልክዎ ስክሪን የሚጠፋበትን ደቂቃ ያሳጥሩ፤ ከተቻለም ወደ ሰኮንዶች ይቀንሱ

    10. ለስልኩ የተሻለ ፀረ ቫይረስ ሶፍትዌር ይጫኑለት። 

    ምንጭ:- ኤፍ ቢ ሲ(FBC)

    Read more
  • የሽንት ቧንቧ ኢንፌክሽን ምንድን ነው? - What is urinary duct infection?

                                                              

    የሽንት ቧንቧ ኢንፌክሽን የምንለው ከኩላሊት እስከ የውሃ ሽንት ማስወገጃ ጫፍ ድረስ የሚከሰተውን የኢንፌክሽን ዓይነት ነው፡፡

    በአብዛኛው የሽንት ቧንቧ ኢንፌክሽን የሚያጠቃው የውሃ ሽንት የሚከማችበት እና ፊኛ በመባል የሚታወቀውን የአካላችን ክፍል ነው፡፡

    በሴቶች ተፈጥሮአዊ የሆነ የሽንት ቧንቧ ጫፍ ማጠር ምክንያት ከወንዶች ይልቅ ተጠቂነታቸው እንደሚጨምር ጥናቶች ያሳያሉ፡፡ ሕመምን የመከላከል አቅማቸው የቀነሰ እንደ የስኳር ሕመምተኞችና እርጉዝ ሴቶች ላይም በብዛት ይከሰታል፡፡

    ► የሽንት ቧንቧ ኢንፌክሽን እንዴት ሊከሰት ይችላል?

    ባክቴሪያ ከሽንት ማስወገጃ ጫፍ ወደላይኛው የሽንት ቧንቧ አካል ይገባል፡፡ ይህም ሊከሰት የሚችለው በአካባቢው የሚገኘው የሠገራ ማስወጫ በባክቴሪያ የተበከለ ስለሆነ ነው፡፡

    በመሆኑም

     በምንፀዳዳበት ጊዜ የግል ንጽህናን ባለመጠበቅ (ባለመታጠብ)
     በግብረሥጋ ግንኙነት ጊዜ
     በተለያየ ምክንያት ሽንትን ለማስወገድ የሽንት ቱቦ በሚገባበት ወቅት ሊከሰት ይችላል፡፡

    የኩላሊት ጠጠር እና የፕሮስቴት እጢ ያሉት ሕመሞች ደግሞ ተፈጥሮአዊ የሆነውን የውሃ ሽንት አወጋገድን በማስተጓጎል ለኢንፌክሽን ሊዳርጉ ይችላሉ፡፡ በደም ውስጥ የሚገኝ ባክቴሪያም ይህንን ኢንፌክሽን ሊያስከትል ይችላል፡፡

    ► የሽንት ቧንቧ ኢንፌክሽን ምልክቶች ምንድን ናቸው?

     የውሃ ሽንት በምንሳወግድበት ጊዜ የማቃጠል ስሜት መሰማት
     የሽንት ቶሎ ቶሎ መምጣት
     ከእንብርት በታች የሕመም ስሜት መሰማት
     ደም የቀላቀለ ወይንም መጥፎ ጠረን ያለው ሽንት መኖር
     ትኩሳትና ብርድ ብርድ የማለት ስሜት መሰማት
    የማቅለሽለሽ ስሜትና ማስመለስ ናቸው

    እነዚህ ምልክቶች በተለይ የስኳር ሕመምተኛ፤እርጉዝ ሴት፤የኩላሊት ሕመም ተጠቂ የሆኑ እና በእድሜ በገፉ ሰዎች ላይ ከተከሰቱ ጊዜ ሳይሳጡ በአፋጣኝ ወደ ሕክምና ቦታ መሄድ ያስፈልጋል፡፡

    ► የሽንት ቧንቧ ኢንፌክሽንን እንዴት መከላከል ይቻላል?

     በብዛት ፈሳሽ መውሰድ ባክቴሪያ በሽንት ቧንቧ ውስጥ እንዳይቀመጥ በማድረግ ይከላከላል፡፡
    ከግብረ ሥጋ ግንኙነት በኋላ እና ከተፀዳዱ በኋላ የግል ንጽሕናን መጠበቅ ተገቢ ነው፡፡

    ምንጭ:- ዶክተር አለ(Doctor Alle)

    Read more
  • ድንገተኛ የልብ ድካም ሲያጋጥም እንዴት ማዳን እንደሚቻል የሚያሳይ ጥናት ይፋ ሆነ - Recovering from heart attack

                                                        

    የልብ ድካም ህክምና ካደረጉ ሰዎች 20 በመቶ የሚሆኑትን ታካሚዎች ከ12 ወራት ባልበለጠ ጊዜ ውስጥ ለሌላ የልብ ሕመም እንደሚጋለጡ ጥናቶች ይገልፃሉ።

    ለዚህም ምክንያቱ ደግሞ የሰውነት ክፍሎች መዳከም እና የሕዋሳት (tissue) ያለመጎልበት ችግር ነው ተብሏል።

    በዚህም በብሪታኒያ ውስጥ በየዓመቱ ከሰባት ወንዶች አንዱ እና ከ11 ሴቶች መካከል አንዷ በድንገተኛ ልብ ሕመም እንደሚሞቱ ጥናቱ አሳይቷል።

    ተመራማሪዎች ሰዎች በዚህ ምክንያት እንዳይሞቱ ከልብ ድካም እንዲድኑ እና ጡንቻዎቻቸው እንዴት እንደሚያድጉ የሚረዳ አዲስ ጥናት አካሂደዋል።

    በዚህም በአላባማ ዩኒቨርሲቲ የሚገኝ አንድ የጥናት ቡድን በደከሙ የልብ ጡንቻዎች (cardiomyocytes) ላይ ህክምና በማድረግ አዳዲስ ግኝቶችን ይፋ አድርጓል።

    ሙከራው የሚያሳየው የበራሒ (genes) ከፍተኛ ግፊት (cell-cycle activator gene CCND2)፥ በከፍተኛ ሁኔታ በድንገት የተዳከመውን የልብ ጡንቻ እንደገና ስራውን እንዲጀምር አድርጓል ። 

    ይህም የሆነው ህዋሳቶችን የበለጠ በማሳደግ እና በመከፋፈል ነው ተብሏል።

    ይህ የህዋሳት የዕድገት መጨመር እና መከፋፈል ደግሞ የልብ ጡንቻ እንዲበረታ እና የሞቱ ህዋሳት መጠን እንዲቀንስ አስችሏል።

    በተጨማሪም ጡንቻን እንደገና እንዲበረታ በማድረግ ብቻ ሳይሆን፥ በተጎዳው ክፍል አዲስ የደም ቧንቧዎች እንዲፈጠሩ አድርጓል።

    ይህ ሙከራ ሰው ሰራሽ በሆኑ ግንደ ሕዋስን(stem cells) በመጠቀም በአይጦች የተካሄደ ሲሆን፥ ወደፊት ይህ ህክምና የልብ ህመም ታካሚዎች ሊጠቀሙበት እንደሚችል ተስፋ ተጥሎበታል::

    ምንጭ:- ኤፍ ቢ ሲ(FBC)

    Read more
  • ዜድ ቲ ኢ ባለሁለት ስክሪን ታጣፊ ስልክ ይፋ አደረገ - ZTE reveals folding handset that can turn into a tablet

                                                                            

    ዜድ ቲ ኢ አክሰን ኤም የተባለ ባለሁለት ስክሪን ታጣፊ ስማርት ስልኩን በአሜሪካ ይፋ አደረገ።

    የቻይናው ግዙፍ የተንቀሳቃሽ ስልክ አምራች እና አቅራቢ ኩባንያ ዜድ ቲ ኢ አዲሱን ስልክ ማስተዋወቁ በገበያው ያለውን ተወዳዳሪነት ከፍ ያደርግለታል ተብሏል።

    ስልኩ ሁለት ስክሪኖች ያሉት ሲሆን የእያንዳንዳቸው ስፋት 5 ነጥብ 2 ኢንች ነው።

    እነዚህ ስክሪኖች መታጠፍ እና መዘርጋት የሚችሉ ሲሆን፥ ሲያስፈልግ እንደማንኛውም ስልክ መጠቀም የሚያስችሉ ናቸው።

    አክሰን ኤም ስማርት ስልክ የተጠቃሚውን የተለያዩ ፍላጎቶች የሚያስተናግዱ ሶስት የመልዕክት ማስተላለፊያ እና የመስሪያ ክፍሎችም አሉት።

    በሁለቱ ክፍሎች ተጠቃሚው የተለያዩ መተግበሪያዎችን በሁለቱ ስክሪኖች እንዲከፍት የማድረግ ስራን ያግዛሉ።

    ለምሳሌ በአንደኛው ስክሪን ላይ የመልዕክት መላላኪያ መተግበሪያ ቢከፍት፥ ማለትም ፌስቡክ፣ ዋትስ አፕ ወይም ቫይበር ከፍቶ ቢጠቀም፥

    በተመሳሳይ ጊዜ በሁለተኛው ስክሪን የሞባይል ጨዋታዎችን (ጌሞችን) መጠቀም ያስችላሉ ማለት ነው።

    ከዚህ ውጭ ሁለቱም ስክሪኖች በአንድ ላይ በመለጠጥ ቪዲዮን በትልቁ መጠን ለማየት እና ሌሎችን ምስሎችን በግዝፈት ለማየት ይረዳሉ።

    የዜድ ቲ ኢ ዋና ስራ አስፈፃሚ ሌክሲን ቼንግ አዲሱ ስማርት ስልክ በቻይና፣ በአውሮፓ እና በጃፓን አገልግሎት ላይ እንደሚውል ታነግረዋል።

    በመጪው ህዳር ወር የሞባይልክ አከፋፋዮች አክሰን ኤም ስልክን ለደንበኞቻቸው እንደሚያቀርቡ ተነግሯል።

    ምንጭ:- ኤፍ ቢ ሲ(FBC)

    Read more
  • NEWS: በግድቡ ዙሪያ ጥናቶችን የሚያጠኑ ኩባንያዎችና የሶስቱ ሀገራት የቴክኒክ ኮሚቴዎች የሚመሩበት ረቂቅ መመሪያ ተዘጋጀ - Ethiopian Renaissance Dam

                                                          

    የኢትዮጵያ፣ ሱዳንና የግብጽ የውሀ ሚኒስትሮች ያደረጉት ስብሰባ በታላቁ የኢትዮጵያ ህዳሴ ግድብ ዙሪያ ሁለት ጥናቶችን የሚያጠኑ ሁለት ኩባንያዎችና የሶስቱ ሀገራት የቴክኒክ ኮሚቴዎች የሚመሩበትን ረቂቅ መመሪያ በማዘጋጀት ተጠናቋል።

    የሶስቱ ሀገራት የውሃ ሚኒስትሮች ዛሬ ስብሰባ ያደረጉት በሚፈለገው ደረጃ መጓዝ ያልቻሉትን ሁለት ጥናቶች ለማስቀጠል ነበር።

    ሚኒስትሮቹ በውይይታቸው አማካሪ ድርጅቶቹን እና የቴክኒክ ኮሚቴውን በቀጣይ የሚመራ ረቂቅ መመሪያ አዘጋጅተዋል።

    ይህም በቀጣዩ የሶስቱ ሀገራት ጉባኤ ላይ ጸድቆ ስራ ላይ ይውላል ተብሎ ይጠበቃል።

    አሁን የተዘጋጀው ረቂቅ መመሪያ ጥናቱን ለማስቀጠል ይረዳል ነው የተባለው።

    የታላቁ የኢትዮጵያ ህዳሴ ግድብ የውሃ አያያዝና አለቃቀቅ እንዲሁም በታችኛው የተፋሰሱ ሀገራት ላይ ያለው የማህበራዊና ኢኮኖሚያዊ ተጽዕኖ እንዲጠና ነበር ሶስቱ ሀገራት ቢ አር ኤልና አርቴሊያ ከተባሉ የፈረንሳይ ኩባንያዎች ጋር ከአመት በፊት ውል የገቡት።

    ሆኖም ሁለቱ ኩባንያዎች ባቀረቡት የጥናት ወሰን ላይ ከመግባባት ባለመደረሱ ጥናቱ ዘግይቷል።

     

    ምንጭ:- ኤፍ ቢ ሲ(FBC)

     

    Read more
  • በሆድ ጥገኛ ትላትል (ፓራሳይት) መጠቃታችንን የሚጠቁሙ 10 ምልክቶች!!

                                                              

    1. ከባድ የምግብ ስልቀጣ(መፈጨት) ችግር
    የአንጀት ጥገኛ ትላትሎች የአንጀት ሽፋን እንዲያብጥና እንዲጠፋ(እንዲጎዳ) በማድረግ ከባድ ለሆነ ተቅማጥ ይዳርጉናል። በተጨማሪም በጥገኛ ትላትሎቹ የሚመረተው መርዛማ ተረፈምርት ከባድ የሆድ ድርቀት፣ ግሳት፣ የሆድ መነፋት፣ ማቅለሽለሽና የሆድ ማቃጠል ስሜት ያስከትላል።

    2. የሆድ ህመም
    ሌላኛው በሆድ ጥገኛ ትላትሎች የሚከሰት ችግር የሆድ ህመም ነው። በትንሹ አንጀት ላይኛው አካባቢ የሚገኙ ጥገኛ የሆድ ትላትሎች በዚሁ አካባቢ የእብጠትና ማቃጠል ስሜትን ይፈጥራሉ። ይህም የሆድ መነፋትና የሆድ ህመም እንዲከሰት ያደርጋል።

    3. መቀመጫ አካባቢን ማሳከክ
    በመቀመጫ አካባቢ ማሳከክ ሌላኛው በሆድ ጥገኛ ትላትል መጠቃት ምልክት ነው።በተለይ በፒን ወርም የተያዙ/የተጠቁ ሰዎች በመቀመጫ አካባቢ ማሳከክና ምቾት ማጣት ይታይባቸዋል። መቀመጫ አካባቢ የሚያሳክክበት ምክንያት ሴቷ ፒንወርም በምሽት ወይም በሌሊት በመቀመጫ አካባቢ ዕንቁላሏን ስለምትጥል ነው።

    4. የድካም ስሜት
    የድካም ስሜት ምናልባት የሆድ ጥገኛ ትላትል ኢንፌክሽን ምልክት ሊሆን ይችላል።ይህም የሚያያዘው የአንጀት ትላትሎች ከምንመገበው ምግብ ውስጥ የሚገኙ ለሰውነታችን ጠቃሚ የሆኑ ንጥረ ነገሮችን ስለሚመገቧቸውነው።

    5. የምግብ ፍላጎት መቀየርና የሰውነት ክብደት መቀነስ
    በምግብ አመጋገብዎ ላይ ድንገተኛ የሆነ ለውጥ ካዮ በተለይ የአመጋገብዎ ሁኔታ ከጨመረ የዚህ ምክንያት ምናልባት በሰውነትዎ ውስጥ ጥገኛ ትላትል ስለሚኖር ሊሆን ይችላል።

    6. የአእምሮ ጭንቀት
    የሆድ ጥገኛ ትላትሎች የሙድ መቀየር፣ ድብርት እና መብሰክሰክ/መበሳጨት
    ሊያስከትሉ ይችላሉ ነገር ግን እነዚህ ምልክቶች ከምግብ ስልቀጣ/መፈጨት ችግር ጋር የተያያዙ መሆን አለበት።

    7. ጥርስን ማፋጨት
    እንቅልፍ ተኝተው ጥርስዎን የሚያፋጩ ከሆነ አንድ የዚህ ችግር መነሻ ሊሆን የሚችለው የፓራሳይት ኢንፌክሽን ነው። የጥርስ ማፋጨት ዋናው መነሻ መንስኤው በሰውነትዎ ውስጥ የሚገኝው ፓራሳይት የሚለቀው ተረፈ ምርትና መርዛማ ነገሮች ውጤት ነው።

    8. የደም ማነስ (በብረት እጥረት)
    የአንጀት ራውንድ ወርምና ፒንወርም (roundworm and pinworm) በሰውነታችን ውስጥ የብረት ማዕድን እጥረት እንዲፈጠር በማድረግ ለደም ማነስ ያጋልጡናል።ፓራሳይቱ የብረት ማዕድንን ጨምሮ ሌሎች ጥሩ ቫይታሚኖችን ከተመገብነው ምግብ ውስጥ ይሰርቃል።

    9. የቆዳ ችግር
    የአንጀት መስመርን የወረሩ ጥገኛ ትላትሎች በሰውነታችን ውስጥ እብጠት በመፍጠርእንዲሁም የተለያዩ የቆዳ ችግሮች ያስከትላሉ ከነዚህ የቆዳ ችግሮች መካከል ሽፍታ ሌሎች የቆዳ አለርጂዎችን ያጠቃልላል።

    10. የጡንቻና መገጣጠሚያ ህመም
    አንዳንድ ፓራሳይቶች የመገጣጠሚያና ጡንቻዎች ስስ አካሎችን በመውረር ራሳቸውን በሲስት (cyst-like) መሳይ ሽፋን ይከልላሉ። የዚህም ውጤት ማቃጠልና ህመም ያስከትላል። እነዚህ ምልክቶች ከሪህ (Arthritis) በሽታ ጋር በመመሳሰል ብዥታ ይፈጥራል።

    ምንጭ:- ዶክተር አለ(Doctor Alle)

    Read more
  • ምላሳችን ስለ ጤናችን ምን ይናገራል?

                                                                       

    ምላሳችን እንደ አንድ የሰውነታችን ክፍል ስለ ጤናችን በርካታ ጉዳዮችን ይናገራል።የምላሳችን ቀለም በመመልከት ብቻ ለተለያዩ ችግሮች መጋለጣችንን መረዳት እንችላለን።ይሁን እንጂ ከዚህ በታች የተዘረዘሩት የምላስ ቀለም ለውጦች ሲያጋጥሙን ወዲያውኑ ወደ ህክምና ተቋማት በማምራት ሀኪሞችን ማማከር ተገቢ ነው።
    1. ቀላ ያለ ምላስ
    - ምላሳችን ይህን አይነት ቀለም ሲኖረው ሰውነታችን እንደ ቫይታሚን ቢ 
    ኮምፕሌክስ እና አይረን ያሉ ንጥረ ነገሮች እጥረት እንዳጋጠመው የሚያሳይ 
    ነው።
    - አንዳንድ የባህላዊ መድሃኒት አዋቂዎች ደግሞ ይህ ሁኔታ በአንድ በተወሰነ 
    የሰውነታችን ክፍል ሙቀት ሲፈጠር የሚከሰት ነው ይላሉ።
    - የጥርስ ሳሙና፣ መድሃኒት አልያም አሲዳማ ምግቦች በአፍ ውስጥ 
    ከሚፈጥሩት ውህደት ጋር ተያይዞም ሊከሰት ይችላል።
    2. ሀምራዊ ምላስ
    - ለጉሮሮ ቁስል (ብሮንካይትስ) መጋለጥን የሚያሳይ ነው።
    - ሰውነታችን በቂ ኦክስጂን አለማግኘቱንም ያመላክታል።
    - ዝቅተኛ የደም ዝውውር እና ከፍተኛ የኮሊስትሮል መጠንንም ይጠቁማል።
    - በጣም የቀዘቀዙ ምግቦችን እንዲሁም ነጭ ሽንኩርትና ዝንጅብል መውሰድ 
    ደግሞ ለችግሩ ሊያጋልጥ ይችላል።
    3. ሻካራ እና ቢጫ ምላስ
    - አነስተኛ የሆሞግሎቢን መጠንን ያሳያል።
    - ድካም እና መዛል፣ ከሳንባ እና ትልቅ አንጀት ጋር የተያያዙ ችግሮችንም 
    ያመለክታል።
    - ዝንጅብል፣ ቀረፋ እና ነጭ ሽንኩርት መጠቀም ከዚህ ችግር ለመውጣት 
    ይረዳል።
    - የሄሞግሎቢን መጠንን ከፍ ለማድረግ እንደ ስፒናች፣ ቀይ ስር፣ አፕል፣ ቀይ ስጋ፣ 
    ዘቢብ፣ ማንጎ፣ ለውዝ እና የመሳሰሉ የምግብ አይነቶችን መመገብ 
    ይመከራል።
    4. ጥቁር ምላስ
    - ከጊዜ ወደ ጊዜ የሰው ልጆች ምላስ ወደ ጥቁርነት እና ጸጉር የበዛበት መሆን 
    ይሸጋገራል።
    - ጥቁርና ጸጉር የሚያወጣ ምላስ ከፍተኛ ጉዳት እንደሚያስከትል ነው 
    የሚነገረው።
    - በምላስ ላይ የሚወጣው ጸጉር በአፍ ውስጥ ለባክቴሪያዎች መራባትና 
    ለቆሻሻዎች መጠራቀሚያነት በማገልገል በርካታ የጤና ችግሮችን ያስከትላል።
    5. ነጭ ምላስ
    - በምላስ ጸጉሮች ባክቴሪያዎች መሰግሰጋቸውን ያመለክታል።
    - የሞቱ ህዋሳት እና ቆሻሻዎች በምላሳችን ጸጉሮች መመሸጋቸውንም 
    ያመለክታል።
    - ሲጋራ ማጨስ፣ የውሃ ጥም፣ የአፍ መድረቅ እና መሰል ምክንያቶች ለችግሩ 
    በምክንያትነት ይጠቀሳሉ። 
    6. ቀይ ምላስ
    - በአብዛኛው በህጻናት ጤና ላይ የሚከሰቱ ችግሮችን ያሳያል።
    - የእንጆሪ ቀለም ያለው ምላስ ደግሞ ህጻናት ለትኩሳት እና የደም ስሮችን 
    ለሚያጠቃ በሽታ መጋለጣቸውን ያመለክታል።
    - ይህ አይነት ቀለም ያለው ምላስ በወጣቶች ላይ ብዙ ጊዜ አይታይም።
    - ምላሳችን በጣም ለስላሳና ቀይ ከሆነ የቫይታሚን ቢ በተለይም የኒያሲን 
    እጥረት እንዳጋጠመን ያሳያል።
    7. ግራጫ ምላስ
    ይህ ደግሞ ሜላኖማ ለተባለ የቆዳ ካንሰር በሽታ መጋለጥን ያሳያል።
    8. ቀይ ነጠብጣቦች የበዙበት ምላስ
    - በምላስ ላይ የሚታዩ ቀይ ነጠብጣቦች የበርካታ ችግሮች ምልክት መሆናቸው ይነገራል።
    - ከቫይታሚን ሲ የሚገኙ ባዮፍላቮዶይሶችን በበቂ ሁኔታ አለማግኘትን ያመለክታል። 
    - ትኩስ መጠጦችን ማዘውተር ለችግሩ በምክንያትነት ይጠቀሳል። 
    - የአስም እና የተለያዩ አለርጂዎች ምልክትም ነው።
    9. ደረቅ ምላስ
    - ሰውነታችን በርካታ ንፍጥ እያመረተ መሆኑን ያሳያል።
    - ችግሩን ለመፍታት ከስኳር ምርቶችና ከወተት ተዋጽኦዎች መራቅ ያስፈልጋል።
    - ጭንቀት ምራቅ አመንጪ እጢዎች እንዲያብጡ በማድረግ ምላስ እንዲደርቅ የማድረግ አቅም አለው። 
    - አንድ ብርጭቆ የሎሚ ውሃ መጠጣት የምላስ ድርቀትን ለማስወገድ ይረዳል።
    10. ያበጠ ምላስ
    - ለአለርጂ ወይም ኢንፌክሽን የመጋለጥ እድልን ያመለክታል።
    - የቫይታሚን ቢ 12 እጥረትንም ያሳያል።

    ምንጭ:- ዶክተር አለ(Doctor Alle)

    Read more
  • በእንቅልፍ ሰዓት ለምን ያልበናል…?

                                                             

    በእንቅልፍ ሰዓትም ይሁን በቀን በሙቀት የተነሳ ወይም በሌላ ምክንያቶች ሊያልበን ይችላል።
    ሆኖም ግን ሌሊት በእንቅልፍ ሰዓት የሚከሰት ላብ ለበርካቶች ችግር ሲሆን ይስተዋላል።
    አንዳንዶች የሚሞቅ የአየር ፀባይ በሌለበት ስፍራ ሁላ ከፍተኛ የሆነ ላብ እንደሚወጣቸው የሚናገሩ ሲሆን፥ በዚህም የተነሳ ልብስ እና አንሶላ ጭምር እንቀይራለን ይላሉ።
    ይህም በቂ እንቅልፍ እንዳያገኙ ችግር እንደሆነባቸው የ
    ሚናገሩ ሲሆን፥ ወደ ህክምና ተቋም በሚሄዱበት ጊዜም ህክምና የለውም በመባል የምንመለስበት ጊዜ ይበዛል ነው የሚሉት።

    ላብ በአካባቢ ላይ በሚከሰት ሙቀት አማካኝነት ሊከሰት የሚችል ሲሆን፥ ሲጀምር በብዛት ፊት፣ አንገት እና ደረት አካባቢ እርጥበት ሊሰማን ይችላል።
    በቅርብ የተሰራ ጥናት ግን በእንቅልፍ ሰዓት የሚከሰት ከፍተኛ የሆነ ማላብ የሌሎች ህመሞች ምልክት ሊሆን ይችላል እና ችላ ሊባል አይገባም ይላል።
    የህክምና ባለሙያዎችም ቢሆኑ የታካሚዎቻቸው ማህደር ላይ ላቡ እንዴት እንደጀመራቸው በመመዝገብ እና ክትትል በማድረግ ችግሩን ከስር ሊያገኙት ይገባል ሲሉም ጥናቱ አመልክቷል።
    በተለይም እንደዚህ አይነት ችግር ያለባቸው ሰዎች ትኩሳታቸውን መለካት፣ ያልተጠበቀ የሰውንት ክብደት መቀነስ እና ከፍተኛ የሆነ የድካም ስሜት ከተስተዋላባቸው በህክምና መከታተል ይገባል የሚለውም በጥናቱ 
    ተምልክቷል።

    በእንቅልፍ ሰዓት ከሚከሰት ከፍተኛ ላብ ጋር ግንኙነት ሊኖራቸው ይችላል የተባሉ ህመሞች 
    # ቲቢ (Tuberculosis)፦ በእንቅልፍ ሰዓት ከፍተኛ የሆነ ላብ እንዲከሰትብን ሊያደርጉ ይችላሉ ከተባሉ ህመሞች ውስጥ ቲቢ (የሳንባ ነቀርሳ) አንዱ ነው።
    በዚህ ሀመም ከተጠቁ ሰዎች ውስጥ 50 በመቶ ያክሉ በእንቅልፍ ሰዓት የሚከሰት ከፍተኛ የማላብ ችግር እንደሚታይባቸውም ይነገራል።
    ሆኖም ግን ሳል፣ ከፍተኛ ትኩሳት፣ የድካም ስሜትም የህመሙ መለያዎች መሆናቸው ተነግሯል።
    # “ብሩሴሎሲስ” (Brucellosis)፦ ብሩሴሎሲስ “ብሩሴላ” በተባለ ባክቴሪያ አማካኝነት የሚከሰት ኢንፌክሽን ሲሆን፥ በብዛት ከእንስሳት ወደ ሰዎች የሚተላላፍ ነው።
    በተለይም ጥሬ ወተት የሚጠቀሙ ሰዎች “ለብሩሴሎሲስ” ኢንፌክሽን የመጋለጣቸው እድል የሰፋ ነው ተብሏል።
    በዚህ ኢንፌክሽን የተጠቁ ሰዎችም በእቅልፍ ሰዓት ከፍተኛ የሆነ ላብ እንደሚታይባቸው ነው የተነገረው።
    እንዲሁም የሰውነት ክብደት መቀነስ፣ ከፍተኛ የሆነ ትኩሳት እና የሰውነት መዛልም ከምልክቶቹ ይጠቀሳሉ።

    # ካንሰር፦ ከበርካታ የካንሰር ምልክቶች ውስጥ በእንቅልፍ ሰዓት የሚከሰት ከመጠን በላይ ያለፈ ላብ አንዱ ሊሆን ይችላል ይላሉ ተመራማሪዎች።
    በተለይም “ለይምፎማ” በመባል የሚታወቀው እና የደም ማስተላለፊያ ትቦን የሚያጠቃው የካንሰር አይነት በእንቅልፍ ሰዓት ከፍተኛ ላብ እንዲከሰት ያደርጋል ተብሏል።
    # የምግብ አለመፈጨት ችግር እና ቃር (heartburn) በእንቅልፍ ሰዓት ከፍተኛ የሆነ ላብ እንዲከሰት ያደርጋል የሚለውም በጥናቱ ላይ ተጠቅሷል።
    ከዚህ በተጨማሪም በህክምና ባለሙያ ታዘውልን የምንውጣቸው መድሃኒቶችም በቀንም ይሁን በማታ ከፍተኛ የሆነ ላብ እንዲከሰትብን ያደርጋሉ።
    ስለዚህ በእንቅልፍ ሰዓት ከፍተኛ የሆነ ላብ የሚያልበን ከሆነ ወደ ህክምና ተቋም በመሄድ አስፈላጊውን ህክምና ማድረግ እና የህክምና ባለሙያዎችን ማማከር መልካም ነው ተብሏል።

    ምንጭ:- ዶክተር አለ(Doctor Alle)

    Read more
  • ግላውኮማ(Glaucoma)

                                                      

    ግላውኮማ የምንለው የአይን ህመም በአይናችን ነርቭ ላይ ችግር የሚያስከትል ሲሆን በአይናችን ውስጥ የሚገኘው ግፊት መጨመር ምክንያት የሚከሰት ነው። የዚህ ግፊት መጨመር በአይናችን የምናያቸውን ምስሎች ወደ አንጎል የሚውስደውን የአይናችንን ነርቭ ይጎዳል ይህም በቀጣይነት ቋሚ ለሆነ የአይን ብርሃንን እጦት ይዳርጋል።

    ግላውኮማ በሚጀምርበት ጊዜ የሚያሳየው ቀዳሚ ምልክት ወይንም የህመም ስሜት ስለሌለ ማንኛውም ሰው መደበኛ የሆነ የአይን ህክምና ማድረግ አስፈላጊ ነው ይህም አይናችን ለከፋ ጉዳት ከመጋለጡ በፊት ህክምና እንድናደርግለት ይረዳናል። ከ 40 አመት እድሜ በላይ ያሉ ሰዎች በአመት አንድ ጊዜ ወደ ሃኪም በመሄድ ምርመራን ማድረግ አለባቸው።
    የአይናችን ውስጥ ግፊት ለምን ይጨምራል?
    ግላውኮማ የሚከሰተው በአይናችን ውስጥ የሚገኘው ግፊት ሲጨምር ነው ያልን ሲሆን ይህ ደግሞ በዘር ፣ በኢንፌክሽን፣በአይን በቀዶ ጥገና ምክንያት በፊተኛው የአይናችን ውስጥ የሚገኘው ፈሳሽ በጤናማ ሁኔታ መንሸራሸር ሲያዳግተው ነው።
    ግላውኮማ በአብዛኛው ሁለቱንም አይነቶች የሚያጠቃ ሲሁን የህመሙ ክብደት ግን ሊለያይ ይችላል።
    በግላውኮማ የሚጠቁ እነማን ናቸው?
    * ከአርባ አመት እድሜ በላይ የሆኑ
    *በግላውኮማ የተጠቃ ቤተሰብ ያላቸው
    *የስኳር ህመምተኞች
    *የአይን ጉዳት የደረሰባቸው ሰዎች

    የግላውኮማ ህመም ምልክቶች ምንድን ናቸው?

    በአብዛኛው ግላውኮማ በቅድሚያ የህመም ምልክት ላያሳይ ቢችልም ከጊዜ በሗላ ግን የመጀመሪያ ምልክት የሚሆነው በጥግ በኩል የሚጀምር የአይን ብርሃን ችግር ነው።
    ከምልክቶቹ ውስጥ:-
    *ድንገተኛ የሆነ የአይን ህመም
    *ከፍተኛ የራስ ምታት
    *የአይን ብዥታ
    *ጥርት ያለ እይታ አለመኖር
    *የአይን መቅላት
    *የአይን ብርሃን ማጣት
    *የአይን እይታ ጥበት ናቸው
    እነዚህ ሁኔታዎች ሲያጋጥምዎ በአፋጣኝ ወደ አይን ሀኪም መሄድ ይጠበቅቦታል።

    ግላውኮማን መከላከል ይቻላል?

    ግላውኮማ እንዳይከሰት መከላከል የማንችል ሲሆን ነገር ግን በቶሎ የህመሙ መኖር ከታወቀ ለመቆጣጠርና እንዳይባባስ ለማድረግ ከፍተኛ ጠቀሜታ አለው።
    በግላውኮማ ምክንያት የተከሰተ የአይን ብርሃን ጉዳት ተመልሶ ሊስተካከል የማይችል ሲሆን የነበረው ጉዳት እየተባባሰ እንዳይሄድ ግን የአይን ግፊት መጠኑን መቀነስ ይቻላል። ህክምናቸውን በሚገባ የሚከታተሉ ታካሚዎች የአይን ብርሃናቸውን ማዳን ይችላሉ።

    ምንጭ:- ዶክተር አለ(Doctor Alle)

     

    Read more
  • አማዞንና ኢቤይ በቀጥታ ኢንተርኔት የሚፈፀምን የታክስ ማጭበርበር መቆጣጠር አለመቻላቸው ተነገረ

                                                               

    አማዞንና ኢቤይን ጨምሮ ሌሎችም የቀጥታ ኢንተርኔት ግብይት ማስፈፀሚያ ኩባንያዎች በቀጥታ ኢንተርኔት የሚፈፀምን የታክስ ማጭበርበር መቆጣጠር እንዳልቻሉ የብሪታኒያ የህግ አውጭ ምክር ቤት አባላት ገለፁ።

    ህግ አውጭ አባላቱ ይህን ችግር ለመቅረፍ ከሀገሪቱ መንግስት የታክስ አስተዳደር ጋር እንዲሰሩ ነው ያሳሰቡት።

    የኦዲት አስተዳደር እና ቁጥጥር ኮሚቴ አባላት የታክስ አስተዳደር ተቋሙ እያንዳንዱ የቀጥታ ኢንተርኔት ግብይት ሻጭ እና ገዥ የተጨማሪ እሴት ታክስ እንዲከፍል በማድረግ ረገድ ዝቅተኛ ውጤት ነው ያለው ብለዋል።

    ታክሱን ያልከፈሉ ተቋማት ላይ ቁጥጥር ያለማድረግ ክፍተት መኖሩንም ጠቁመዋል።

    በዚህ ከፍተት መንግስት ማግኘት የነበረበትን 2 ቢሊየን የአሜሪካ ዶላር በየዓመቱ እያጣ መሆኑንም ገልጸዋል።

    የቀጥታ ኢንተርኔት የግብይት ማዕከላት የተጨማሪ እሴት ታክስ የሚያጭበረብሩ ሻጭ እና ሸማቾችን እንደሚቆጣጠሩ ቢናገሩም በተግባር ግን አፈፃፀማቸው ዝቅተኛ ሆኖ መገኘቱን የኮሚቴው ሊቀመንበር ሜግ ሂሊየር ተናግረዋል።

    በቀጥታ ኢንተርኔት የሚፈፀም የታክሰ ማጭበርበር ከጊዜ ወደ ጊዜ እየተባባሰ መሆኑም ተመላክቷል።

    ለዚህም ምክንያቱ በኢንተርኔት ግብይት እንዲከናወን የሚያደርጉት ኩባንያዎች ሻጮች ከሚሸጡት ምርት መክፈል የሚጠበቅባቸውን 20 በመቶ የተጨማሪ እሴት ታክስ እንዳልከፈሉ በምትኩም ሁለቱን ብቻ ተጠቃሚ ማድረጋቸው ነው።

    አማዞን እና ኢቤይ በበኩላቸው በቀጥታ ኢንተርኔት የሚፈፀም የተጨማሪ እሴት ታክስ ማጭበርበርን ለመከላከል ከታክሰ አስተዳደር መስሪያ ቤቱ ጋር እየሰራን ነው ብለዋል።

    አማዞን በግሉ የታክሰ ህጎችን አክብረው ሽያጭ እና ግዥ የሚያከናውኑ ድርጅቶችን ከዝርዝሩ እንዲያስወጣ እና ግብይት እንዳያከናውኑ እንደሚከለክል ገልጿል።

    ምንጭ:- ኤፍ ቢ ሲ(FBC)

    Read more
  • በኢትዮጵያ የኤች አይ ቪ/ኤድስ ወረርሽኝ ሊባል በሚችል ደረጃ እየተስፋፋ መምጣቱ ተገለፀ

                                                           

    በትዕግስት አብርሀም

    በኢትዮጵያ የኤች አይ ቪ/ኤድስ ወረርሽኝ ሊባል በሚችል ደረጃ እየተስፋፋ መምጣቱ ተገለፀ።

    በዓመት ከ27 ሺህ በላይ ሰዎች በቫይረሱ ይይዛሉ የተባለ ሲሆን፥ ከ19 ሺህ በላይ የሰዎች ደግሞ በቫይረሱ አማካኝነት ይሞታሉ ነው የተባለው።

    በዚህ ጉዳይ ላይ ያተኮረ ውይይት በጤና ጥበቃ ሚኒስቴር እና በፌዴራል የኤች አይ ቪ/ኤድስ መከላከያ እና መቆጣጠሪያ ፅህፈት ቤት አዘጋጅነት በአዳማ ከተማ እየተካሄደ ነው።

    በመድረኩ እንደተገለፀው ይበልጥ ተጋላጭ በሆኑ የህብረተሰብ ክፍሎች የስርጭት ምጣኔው ከ2 ነጥብ 5 እስከ 25 በመቶ ደርሷል።

    በትልልቅ የኤሌክትሪክ ማመንጫ ፕሮጀክቶች፣ ከፍተኛ የትምህርት ተቋማት፣ የአበባ ልማትና መሰል ሰፋፊ የልማት አካባቢዎች የኤች አይ ቪ አጋላጭ ባህሪያት መስፋት ለቫይረሱ ስርጭት ከፍተኛ ስጋት ሆኗል።

    የጤና ጥበቃ ሚኒስትር ዴኤታው ዶክተር ከበደ ወርቁ፥ የቫይረሱን ስርጭት ለመቆጣጠር በተደረገው ጥረት የተመዘገበው ለውጥ መዘናጋት መፍጠሩን አንስተዋል።

    ከአምስት እና ስድስት ዓመት በፊት የነበረውን ኤች አይ ቪን የመግታት ስራ ለመድገም ሁሉም ባለድርሻ አካላት ሀላፊነታቸውን እንዲወጡም ጠይቀዋል።

    ምንጭ:- ኤፍ ቢ ሲ(FBC)

     

    Read more
  • NEWS: የፌደራል መንግስት ግጭት በተቀሰቀሰባቸው የኦሮሚያና የኢትዮጵያ ሶማሌ አዋሳኝ አካባቢዎች ነፃ ቀጠና አቋቁሞ ለማረጋጋት እየሰራ መሆኑን ገለፀ

                                                   

    የፌደራል መንግስት ግጭት በተቀሰቀሰባቸው የኦሮሚያና የኢትዮጵያ ሶማሌ ክልሎች አዋሳኝ አካባቢዎች ከግጭት ነፃ ቀጠና አቋቁሞ ለማረጋጋት እየሰራ መሆኑን የመንግስት ኮሙዩኒኬሽን ጉዳዮች ፅህፈት ቤት ሃላፊ ሚኒስትር ዶክተር ነገሪ ሌንጮ ገለፁ።

    ሚኒስትሩ በወቅታዊ ጉዳዮች ላይ ዛሬ በሰጡት ጋዜጣዊ መግለጫ በክልሎቹ አንዳንድ አዋሳኝ አካባቢዎች ግጭት በመቀስቀስ እና ጉዳት በማድረስ ተጠያቂ የሆኑ አካላትን መንግስት በቁጥጥር ስር የማዋሉን ስራ አጠናክሮ እንደሚቀጥል አስታውቀዋል።

    ዶክተር ነገሪ ሌንጮ በግጭቱ ሳቢያ ለተፈናቀሉ ዜጎች ጊዜያዊ ድጋፎች እየተደረጉ ሲሆን፥ ዜጎች ለዘለቄታው ራሳቸውን ስለሚችሉበት ሁኔታ መንግስት በየደረጃው ከህዝብ ጋር እየመከረ ነው ብለዋል፡፡

    በግጭቱ ህይወት መጥፋቱን፣ የአካል ጉዳት መድረሱን እና ነዋሪዎች ከመኖሪያ ቀያቸው ወጥተው በጊዜያዊ መጠለያዎች እየኖሩ መሆኑን ዶክተር ነገሪ ተናግረዋል።

    በምክትል ጠቅላይ ሚኒስትር ደመቀ መኮንን የተመራ ሀገር አቀፍ ግብረ ሃይል በዜጎች ላይ የደረሰውን ጉዳት፣ በድሬዳዋ፣ ሀረር ከተማ አማሬሳና በባቢሌ የሚገኙ መጠለያዎችን መጎብኘቱን እና በግጭቱ ሳቢያ ጉዳት የደረሰባቸውን አካላት ማነጋገሩን ነው ሚኒስትሩ የጠቀሱት።

    ከተፈናቃዮች ጋር በተደረገ ውይይትም ጉዳቱን ያደረሱት የፀጥታ ሃይሎች እንጅ ህዝቦች እንዳልሆኑ፣ የከፋ ጉዳት እንዳይደርሰባቸው በማድረግ በኩል የሀገር መከላከያ ሰራዊት ትልቅ እገዛ ማድረጉን፣ በግጭት ወቅት የሁለቱም ክልሎች ህዝቦች አንዱን ከሌላው ጥቃት በመከላከል መስዋዕትነት መክፈላቸውን መናገራቸውን ነው ያስታወሱት።

    የልኡካን ቡድኑ በዜጎች ላይ ከፍተኛ ጉዳት እንደደረሰ ያረጋገጠ ሲሆን፥ ለተጎጅዎች እየተደረገላቸው የሚገኘውን ድጋፍ መገምገሙን በመግለጫቸው ጠቅሰዋል።

    ግብረሃይሉ ችግሮች በጊዜያዊነትና በዘለቄታ የሚፈቱበትን አቅጣጫ ማስቀመጡን ጠቁመው፥ በአሁኑ ወቅት በሁለቱም ክልሎች የስጋት ቀጠናዎች አካባቢ የታጠቁ ሃይሎች እንዳይደርሱ መደረጉን ገልጸዋል።

    ዶክተር ነገሪ የፌደራል ፖሊስ ኮሚሽን ሪፖርትን ዋቢ አድርገው እንደገለጹት፥ በኦሮሚያ ክልል አወዳይ ከተማና አካባቢ በቀጥታ በግጭቱ ላይ በሰብዓዊ መብት ጥሰት እና በግድያ ወንጀል የተሳተፉ አጥፊዎች በቁጥጥር ስር ውለው ጉዳያቸው እየተጣራ ነው ብለዋል፡፡

    በአንፃሩ በኢትዮጵያ ሶማሌ ክልል በተመሳሳይ መልኩ በወንጀል ድርጊት የተሳተፉ ግለሰቦችን በቁጥጥር ስር ለማዋል በክልሉ በኩል የተወሰደ ያለው እርምጃ አጥጋቢ እንዳልሆነ አንስተዋል።

    ለዚህም የፌደራል ፖሊስ አስፈላጊውን መረጃ እያደረጀ ተጠርጣዎቹን በቁጥጥር ስር ለማዋል የሚስራው ስራ ተጠናክሮ እንደቀጠለና የክልሉ አመራሮችም ሀላፊነታቸውን መወጣት እንዳለባቸው የፌደራል ፖሊስ ማሳሰቡን ተናግረዋል፡፡

    አካባቢው የወጪ ገቢ ንግዶች መተላለፊያ ኮሪደር እንደመሆኑ መጠን በመንገዶች ላይ ገና ያልተፈቱ ችግሮች እንዳሉና የወጭ ገቢ ምርቶች ላይ መስተጓጎሎች መኖራቸውን ነው ያነሱት።

    ችግሩን ለመፍታት የንግድ ሚኒስቴር እና ጉዳዩ የሚመለከታቸው የሁለቱ ክልሎች አካላት እየተነጋገሩ መሆኑን ጠቁመዋል፡፡

    ጫትና ሌሎች የወጪ ምርቶችን በማምረትና በመሸጥ በሚተዳደሩ አርሶ አደሮችና ላኪዎች ላይ ኢኮኖሚያ ኪሰራ መድረሱን፥ ሀገሪቱ ከዘርፉ በምታገኘው የውጭ ምንዛሬ ላይ ተጽዕኖ እንደሚኖረው ዶክተር ነገሪ አመላክተዋል፡፡

    እንደ ሚኒስትሩ ገለፃ በዚህ ጉዳይ ላይ ጠቅላይ ሚንስትር ኦቶ ሃይለማሪያም ደሳለኝ ባስቀመጡት አቅጣጫ መሰረት የፌደራል ፖሊስና የመከለከያ ሰራዊት በኮሪደሩ አካባቢዎች የዜጎችን ህገ መንግስታዊ መብትና የህግ የበላይነትን የማስከበር ስራ ሲሰሩ ቆይተዋል፡፡

    ችግሮችን በሰላማዊ መንገድ የመፍታት አማራጮች እንዳሉ ሆነው ከዚህ ያለፈ መጉላላት፣ ሁከትና ግርግር የሚፈጥሩ አካለት ላይ መንግስት ከመቼው የበለጠ ክትትል እና እርምጃ እንደሚወስድ አሳስበዋል፡፡

    ለተፈናቃዮች አስፈላጊው የእለት ደራሽ እርዳታ በፌደራል የአደጋ መከላከልና ዝግጁነት ኮሚሽንና በሁለቱም ክልሎች በኩል እየቀረበላቸው መሆኑ በመግለጫው ተጠቅሷል።

    በመግለጫው እንደተጠቀሰው ለህፃናትና እናቶች አልሚ ምግብ እየቀረበላቸው ሲሆን፥ የፌደራል ጤና ጥበቃ ሚኒስቴር እና ክልሎች በጋራ የህክምና ባለሙያዎችን የያዘ ሰባት የህክምና ቡድን 24 ሰዓት የጤና ክትትል እያደረገ ነው።

    ከትምህርት ገበታቸው የተፈናቀሉ ህጻናት ወደ ቀያቸው እስኪመለሱ ድረስ ጊዜያዊ የትምህርት አማራጭ የሚያገኙበት እድል እንዲመቻችላቸው አቅጣጫ ተቀምጧል፡፡

    አንዳንድ የዩኒቨርሲቲ ተማሪዎች ከአንዱ ክልል ወደ ሌላው ክልል ሄደው ለመማር ስጋት እንዳለባቸው መግለፃቸውን ያነሱት ዶክተር ነገሪ፥ ተማሪዎች ትምህርታቸውን መከታተል እንደሚችሉና ምንም ችግር እንደማይደርስባቸው መንግስት ከትምህርት ተቋማት ጋር እየሰራ መሆኑን አስረድተዋል፡፡

    አዲስ ተመዳቢ ተማሪዎች ገና ያልተጠሩ እና ወደ ዩኒቨርሰቲዎች ያልገቡ ቢሆንም፥ ነባር ተማሪዎች ትምህርታቸውን እየተከታተሉ መሆኑን ሚንስትሩ በመግለጫቸው ጠቅሰዋል፡፡

    በሁለቱ ክልልች ለሚኖሩ ህዝቦች የሚሰራጩ መረጃዎች በአንድም ሆነ በሌላ መልክ ግጭቱን የሚያባብሱ መሆን እንደሌለባቸው፥ ይልቁንም ግጭቱን ለዘለቄታው በመፍታት ላይ ያተኮሩ፣ የሀገራችንን ሰላም የሚያስጠብቁ እና የህዝቦቻችንን የአብሮነት እሴቶች የሚያጎለብቱ ሊሆኑ ይገባቸዋል ነው ያሉት በመግለጫቸው።

    ምንጭ:- ኤፍ ቢ ሲ(FBC)

    Read more
  • NEWS: በኢትዮጵያ ኦሮምያና ሶማሌ ክልል የግጭት ሰለባዎች ጉዳይ መግለጫ

                                                                         

    በኦሮሚያ እና በሶማሌ ክልል አዋሳኝ ወረዳዎች በተከሰተው ግጭት የተሳተፉና ጉዳት ያደረሱ አካላት በቁጥጥር ሥር መዋላቸውን የመንግሥት ኮሙዩኒኬሽን ጉዳዮች ኃላፊ ሚኒስትር አስታወቁ፡፡

    በኦሮሚያ እና በሶማሌ ክልል አዋሳኝ ወረዳዎች በተከሰተው ግጭት የተሳተፉና ጉዳት ያደረሱ አካላት በቁጥጥር ሥር መዋላቸውን የመንግሥት ኮሙዩኒኬሽን ጉዳዮች ኃላፊ ሚኒስትር አስታወቁ፡፡

    በግጭቱ የተፈናቀሉት ሰዎች በመቶ ሺሕዎች የሚቆጠሩ መሆናቸውን የገለፁት ሚኒስትሩ ዶ/ር ነገሪ ሌንጮ በተለይ መንግሥት የአሰማራው የሰብዓዊ መብት ጥሰት መርማሪ ቡድን ሪፖርት ሲጠናቀቅ ተጨማሪ እርምጃዎች እንደሚወሰዱ ተናግረዋል፡፡

    ምንጭ:- ቪ ኦ ኤ(VOA)

    Read more
  • የሩቅ እይታ የሚያጠቃቸው ታዳጊዎች በትምህርታቸው ላይ አሉታዊ ጫና እንደሚፈጥር ተመራማሪዎች ገለፁ

                                                        

    የሩቅ የእይታ ትክተት ወይም በቅርበት ያለማየት ችግር ልጆች በትምህርታቸው ላይ ትኩረት እንዳያደርጉ አሉታዊ ጫና እንደሚፈጥር ተመራማሪዎች ገለፁ።

    ይኸውም በትምህርት ሰዓት በቂ ግንዛቤ እንዳይኖራቸው እና በክፍል ውስስ በእይታ ችግር ምክንያት እንዲወድጉ ሊያደርጋቸው እንደሚችል የኦሃዮ ዩኒቨርሲቲ ተመራማሪዎች ያጠኑት ጥናት ያሳያል።

    ያልተስተካከለ ወይም የከፋ የሩቅ እይታ ችግር ያለባቸው የቅድመ መደበኛ እና የመዋዕለ ህፃናት ተማሪዎች የመማር አቅማቸው ደካማ እና ነገሮችን የመላመድ ችሎታቸው አዝጋሚ እንደሚሆን ከዚህ በፊት የወጡ ጥናቶች ያሳያሉ።

    አሁን የኦሃዩ ዩኒቨርሲቲ ተመራማሪዎች በሰሩት ጥናት ደግሞ ችግሩ ከዚህም እንደሚከፋ ነው የገለፁት።

    ያልተስተካከል የሩቅ እይታ ትክተት እድሜያቸው ለመደበኛ ትምህርት ያልደረሱ ህፃናት ላይ ሌሎች ጉዳቶች እንዳሉት የጠቀሱት ፕሮፌሰር ማርዥያን ቴይለር ኩልፕ ናቸው።

    ከ4 እስከ 14 በመቶ ያህል የቅድመ መደበኛ ትምህርት ተማሪዎች የከፋ የሩቅ እይታ እንዳለባቸው በጥናቱ ተጠቅሷል። 

    የሩቅ እይታ ትክተት ማለት ለዓይን የቀረበን ነገር በደንብ አስተካክሎ ያለማየት ችግር ነው።

    ይህን ዓይነቱን ችግር ብዙ ጊዜ በምርመራ ለመለየት እና መፍትሄውን ለማስቀመጥ ያስቸግራል ብለዋል ተመራማሪዎች።

    ጥናቱ የከፋ የሩቅ እይታ ችግር ያለባቸው 250 የቅድመ መደበኛ ትምህርት እና የመዋዕለ ህፃናት ተማሪዎችን እና ጤናማ የእይታ ሁኔታ ያላቸውን 250 ተማሪዎች በተመሳሳይ አካቷል።

    ተመራማሪዎች በሁለት የተከፈሉትን የጥናቱ ተሳታፊ ህፃናት ያጠኑ ሲሆን፥ የሩቅ እይታ የሚያጠቃቸው ህፃናት የእይታ ትኩረታቸው፣ አቀባበላቸው እና የእይታ ችሎታቸው ደካማ መሆኑን አረጋግጠናል ነው ያሉት።

    ለአብነትም የእይታ ችሎታቸው የዓይን እና የእጅ ጥምረትን በሚጠይቁ ስራዎች ላይ ደካማ ውጤት ማስመዝገባቸው ተነግሯል።

    የከፋ የሩቅ እይታ የሚያጠቃቸው ህፃናት በሚመረመሩበት ጊዜ የዓይን መነፅር እንዲጠቀሙ አይመከረም፤ ምክንያቱም በዓይን መነፅር እና በልጆች የእይታ መስተካከል ላይ ስምምነት ስለማይኖር ነው ብለዋል።

    ተመራማሪዎቹ አሁን ላይ የከፋ የሩቅ እይታ ወይም በቅርበት ላይ ያሉ ነገሮችን ያለማየት ችግር ያለባቸውን ህፃናት ችግር ለመቅረፍ የዓይን መነፅር አስፍላጊ ነው ወይ የሚለውን ለማጥናት የገንዘብ ድጋፍ እያፈላለጉ ነው።

    የሩቅ እይታ ያለባቸው ልጆች የመማር ችሎታቸው ፈጣን እንዳይሆን እንደሚያደርግ ህብረተሰቡ ሊረዳ እንደሚገባ መክረዋል።

    ምንጭ:- ኤፍ ቢ ሲ(FBC)

    Read more
  • ለልጆች ደህንነት የተመረቱ ሰዓቶች በመረጃ ጠላፊዎች የመጋለጥ እድላቸው ሰፊ ነው

                                                          

    ለህፃናት ደህንነት ተብለው የተዘጋጁ ስማርት ሰዓቶች ለመረጃ ጠላፊዎች ተጋላጭ የሚያደርጓቸው የደህንነት ጉድለቶች መኖራቸውን አንድ የክትትል ቡድን አስታወቀ።

    ስማርት ሰዓቶች በአብዛኛው እንደ መሰረታዊ የስማርት ሞባይል ስልኮች አገልግሎት ያላቸው ሲሆን፥ ይህም ወላጆች ከልጆቻቸው ጋር እንዲነጋገሩ እና ልጆቻቸው እንዲከታተሉ የሚያስችል ነው ተብሏል።

    የኖርዌይ ኮንሲዩመር ካውንስል (ኤን. ሲ. ሲ.) ጋቶር እና ጂ.ፒ.ኤስ. ለህጻናት ጨምሮ ሌሎች ታዋቂ ኩባንያዎች የሚያቀርቡዋቸው ስማርት ሰዓቶችን ፈትሾዋል።

    የፍተሻው ውጤት እንደሚያመለክተውም አሁን በገበያ ላይ ያሉት የህፃናት ስማርት ሰዓቶች ጥቃት የሚሰነዝሩ ሰዎች ሊከታተሏቸው፣ ሊያደምጧቸው ወይም ከልብሶቻቸው ጋር በመገናኘት ለጠለፋ ምቹ ሊሆኑ ይችላሉ።

    ይህን ተከትለው አምራቾችም ችግሮቹን እና መፍትሔዎችን በመፈለግ ላይ ናቸው ተብሏል።

    ዋጋቸውም 131 የአሜሪካን ዶላር መሆኑን ተጠቁሟል።

    የኖርዌይ ሸማች ካውንስል እንዳለው ጋቶር እና ጂ.ፒ.ኤስ. የተባሉ ለህፃናት የሚዘጋጁ ሰዓቶች ላይ ሙከራ አድርጓል።

    ባደረገው ሙከራም በእነዚህ ሰዓቶች አማካይነት የመረጃ ጠላፊዎች ክትትል ሊያደርግ እና ሰዓቶቹን ከለበሱቸው ልጆእች ጋር የመልዕክት ለውውጥ በማድረግ አደጋ ሊፈጥሩ እንደሚችሉ ደርሸበታለሁ ነው ያለው።

    ይህ ማለት መሰረታዊ የጠለፋ ዘዴዎችን በመጠቀም ልጆች በሚንቀሳቀሱበት ጊዜ መከታተል ወይም ልጆች በተለየ ሁኔታ ውስጥ ሆኖ እንዲገኝ ሊያደርግ ይችላሉ።

    ሰዓቶችን የሚያመርተው ድርጅትም ተጨማሪ ምክር እና ማረጋገጫ ከአቅራቢው እስኪሰጠው ድረስ፥ አሁን ያለውን ስጋት እንደ ቅድመ ጥንቃቄ ወስዶ ምርቱን ለደንበኞች በመሸጥ ላይ እንደሆነ ተናግሯል።

    የጋቶር ሰዓት አከፋፋይ ስጋቱን ለመቅረፍ የደህንነት ስልት ነድፎ እየሰራ መሆኑን ጠቅሶ፥ ለደንበኛ አዲስ እና ደህንነቱ የተጠበቀ መተግበሪያ እያዘጋጀሁ ነው ብሏል።

    ምንጭ:- ኤፍ ቢ ሲ(FBC)

    Read more
  • ለመወገድ ከተዘጋጁ ዛፎች አስደናቂ ቅርጻ ቅርጾችን የሚሰራው ሮማኒያዊ

                                                                    

    ሮማኒያዊው የ42 አመት ጎልማሳ ጋቢ ሪዚያ በዛፎች ላይ በሚሰራቸው አስደናቂ ቅርጻ ቅርጾች ተቀባይነትን እያገኘ መጥቷል።

    የቀድሞው የደን ተንከባካቢ ባለሙያ ጎልማሳ በሚኖርበት የክራዮቫ ከተማ መናፈሻ ፓርክ፥ በዛፎች ላይ አይን የሚስቡና ማራኪ ቅርጻ ቀርጾችን እየሰራ ነው።

    ለዚህ ስራው ደግሞ እድሜ ጠገብውና በጡረታ ምክንያት ለመወገድ የተዘጋጁ ዛፎችን ብቻ ነው የሚጠቀመው።

    ከቀድሞ ስራው ከተገለለ በኋላ ይህን የቅርጻ ቅርጽ ስራ የጀመረው ጎልማሳ፥ የሚሰራቸው ቅርጻ ቅርጾች በከተማዋ የሚገኘውን የመናፈሻ ፓርክ ውበት አላብሰውለታል።

    የእርሱ ስራ በእድሜ መግፋት ምክንያት ይወገዱ የተባሉ ዛፎችንም ሙሉ በሙሉ ከመወገድ ታድጓቸዋል።

    ተቆርጠው ሊወገዱ የተዘጋጁ ዛፎችን የተለየና ማራኪ ቅርጽ በመስጠት ባሉበት ቦታ የአካባቢው መስህብ እንዲሆኑም አድርጓቸዋል።

    መጋዝ፣ መሮ እና መቁረጫ ግራይንደር በመጠቀም ከሰራቸው ቅርጻ ቅርጾች መካከልም፥ “ከባሊ በሚቀዳ ውሃ” ምስል የሰራው ቅርጽ ታዋቂነትን አትርፎለታል።

    ይህን ስራውን ያዩ ሌሎች የሮማኒያ ከተማ አስተዳደሮችም ቀራጺውን በከተማቸው ተመሳሳዩን ይሰራ ዘንድ ጥሪ አቅርበውለታል።

    የጋቢን የዛፍ ላይ አስደናቂ ቅርጻ ቅርጾች ከዚህ በታች መመልከት ይቻላል፤

    ምንጭ:- ኤፍ ቢ ሲ(FBC)

     

    Read more