Latest Articles

  • የከተራ በዓል ዛሬ ይከበራል - Today "Ketera" Festival Will be Celebrated

                                                                                 

    የከተራ በዓል በመላ ሀገሪቱ በክርስትና እምነት ተከታዮች ዘንድ ዛሬ በድምቀት ይከበራል።

    በዓሉ በተለይም በአዲስ አበባ የኢትዮጵያ ኦርቶዶክስ ተዋህዶ ቤተ ክርስቲያን ፓትርያርክ ብፁእ ወቅዱስ አቡነ ማቲያስ፣ ብፁዓን ሊቃነ ጳጳሳት፣ ምዕመናን፣ የመንግስት የስራ ሃላፊዎች፣ የውጭ ሀገራት አምባሳደሮች እና በርካታ ጎብኝዎች በተገኙበት በጃን ሜዳ ይከበራል።

    ከሰዓት በኋላም የሰንበት ትምህርት ቤት ተማሪዎች፣ መዘምራን፣ ዲያቆናት፣ ቀሳውስትና ምእመናን የተለያዩ መንፈሳዊ ዝማሬዎችን እያቀረቡ ታቦታቱ አዳራቸውን ወደሚያደርጉበት ጃን ሜዳ ያመራሉ።

    በነገው እለትም የጥምቀት በዓል በምዕመኑ ዘንድ በድምቀት የሚከበር ይሆናል።

    በዓሉ ኢየሱስ ክርስቶስ በመጥምቁ ዮሃንስ እጅ ለመጠመቅ ወደ ባህረ ዮርዳኖስ የወረደበትን እለት ለማሰብ የሚከበር ነው።

    ምንጭ:- ኤፍ ቢ ሲ(FBC)

    Read more
  • የአካል ብቃት እንቅስቃሴ ለመስራት ትክክለኛው ሰዓት የቱ ነው? - What's the Best Time to Exercise?

                                                                 

    አብዛኞቻችን የአካል ብቃት እንቅስቃሴን ጠዋት ከእንቅልፍ ስንነቃ የምንሰራ ሲሆን፥ በርካቶች ደግሞ ማታ ከስራ መልስ ወደ ስፖርት ቤት ጎራ በማለት መስራትን ያዘወትራሉ።

    የአካል ብቃት እንቅስቃሴ ባለሙያዎች የአካል ብቃት እንቅስቃሴን ለመስራት ትክክለኛ ሰዓት እና የአካል ብቃት እንቅስቃሴን በአግባቡ ለመስራት ምን ማድረግ አለብን የሚለው ላይ ምክር ለግሰዋል።

    የአካል ብቃት እንቅስቃሴን ለመስራት ትክክለኛው ሰዓት የቱ ነው…?

    የአካል ብቃት እቅስቃሴ ባለሙያ የሆነው ባን ሃስ፥ የአካል ብቃት እንቅስቃሴን የግድ ጠዋት ወይም ማታ መስራት የለብንም፤ የአካል ብቃት እንቅስቃሴ ለመስራት ትክክለኛው ሰዓት ውስጣችን በጣም ተነሳሽነት በሚኖረው ጊዜ ነው ይላል።

    ወደ ስፖርት ቤት ለመሄድ የማመንታት ስሜት በማይሰማን ሰዓት፣ እዛም ሄደን ያለ ድካም ለመስራት ውስጣችን ተነሳሽነት ሲሰማው እና የድካም ስሜት እየተሰማን ካልሆነ ይህ ትክክለኛው ሰዓት ነው ብለዋል።

    ጠዋት ወይም ማታ ላይ የአካል ብቃት እንቅስቃሴ መስራት የማይመቸን ከሆነ ደግሞ ምሳ ሰዓታችንን ተጠቅመን እንደ ዮጋ ያሉ ቀለል ያሉ የአካል ብቃት እንቅስቃሴዎችን ብንሰራም መልካም ነው ይላሉ ባለሙያዎቹ።

    የአካል ብቃት አሰልጣኝ የሆነው ጆናታን ቴይለር በበኩሉ፥ በዓለም አቀፍ ደረጃ የአካል ብቃት እንቅስቃሴን ለመስራት ትክክለኛው ሰዓት ይህ ነው ተብሎ የተቀመጠ ነገር የለም፤ ሰዓቱ እንደ ግለሰቡ ምርጫ የሚወሰን ይሆናል ብሏል።

    በጠዋትም ይሁን በማታ የአካል ብቃት እንቅስቃሴ በመስራት በምናገኘው የጤና ጠቀሜታ ላይ ላይ የሚያመጣው ተጨባጭ ልዩነት እንደሌለም ነው ጆናታን የሚናገረው።

    ዋናው ውስጣችን የአካል ብቃት ለመስራት ተነሳሽነት መኖሩ ነው እንጂ በማንኛውም ሰዓት የአካል ብቃት እንቅስቃሴ ብንሰራ የጤና ጠቀሜታ እንደሚያስገኝልን ነው አሰልጣኑ ያስታወቀው።

    ምንጭ:- ኤፍ ቢ ሲ(FBC)

    Read more
  • በሆድ ጥገኛ ትላትል (ፓራሳይት) መጠቃታችንን የሚጠቁሙ 10 ምልክቶች - 10 Signs You May Have A Parasite

                                                                   

    1. ከባድ የምግብ ስልቀጣ(መፈጨት) ችግር

    የአንጀት ጥገኛ ትላትሎች የአንጀት ሽፋን እንዲያብጥና እንዲጠፋ(እንዲጎዳ) በማድረግ ከባድ ለሆነ ተቅማጥ ይዳርጉናል። በተጨማሪም በጥገኛ ትላትሎቹ የሚመረተው መርዛማ ተረፈምርት ከባድ የሆድ ድርቀት፣ ግሳት፣ የሆድ መነፋት፣ ማቅለሽለሽና የሆድ ማቃጠል ስሜት ያስከትላል።

    2. የሆድ ህመም
    ሌላኛው በሆድ ጥገኛ ትላትሎች የሚከሰት ችግር የሆድ ህመም ነው። በትንሹ አንጀት ላይኛው አካባቢ የሚገኙ ጥገኛ የሆድ ትላትሎች በዚሁ አካባቢ የእብጠትና ማቃጠል ስሜትን ይፈጥራሉ። ይህም የሆድ መነፋትና የሆድ ህመም እንዲከሰት ያደርጋል።

    3. መቀመጫ አካባቢን ማሳከክ
    በመቀመጫ አካባቢ ማሳከክ ሌላኛው በሆድ ጥገኛ ትላትል መጠቃት ምልክት ነው።በተለይ በፒን ወርም የተያዙ/የተጠቁ ሰዎች በመቀመጫ አካባቢ ማሳከክና ምቾት ማጣት ይታይባቸዋል። መቀመጫ አካባቢ የሚያሳክክበት ምክንያት ሴቷ ፒንወርም በምሽት ወይም በሌሊት በመቀመጫ አካባቢ ዕንቁላሏን ስለምትጥል ነው።

    4. የድካም ስሜት
    የድካም ስሜት ምናልባት የሆድ ጥገኛ ትላትል ኢንፌክሽን ምልክት ሊሆን ይችላል።ይህም የሚያያዘው የአንጀት ትላትሎች ከምንመገበው ምግብ ውስጥ የሚገኙ ለሰውነታችን ጠቃሚ የሆኑ ንጥረ ነገሮችን ስለሚመገቧቸውነው።

    5. የምግብ ፍላጎት መቀየርና የሰውነት ክብደት መቀነስ
    በምግብ አመጋገብዎ ላይ ድንገተኛ የሆነ ለውጥ ካዮ በተለይ የአመጋገብዎ ሁኔታ ከጨመረ የዚህ ምክንያት ምናልባት በሰውነትዎ ውስጥ ጥገኛ ትላትል ስለሚኖር ሊሆን ይችላል።

    6. የአእምሮ ጭንቀት
    የሆድ ጥገኛ ትላትሎች የሙድ መቀየር፣ ድብርት እና መብሰክሰክ/መበሳጨት
    ሊያስከትሉ ይችላሉ ነገር ግን እነዚህ ምልክቶች ከምግብ ስልቀጣ/መፈጨት ችግር ጋር የተያያዙ መሆን አለበት።

    7. ጥርስን ማፋጨት
    እንቅልፍ ተኝተው ጥርስዎን የሚያፋጩ ከሆነ አንድ የዚህ ችግር መነሻ ሊሆን የሚችለው የፓራሳይት ኢንፌክሽን ነው። የጥርስ ማፋጨት ዋናው መነሻ መንስኤው በሰውነትዎ ውስጥ የሚገኝው ፓራሳይት የሚለቀው ተረፈ ምርትና መርዛማ ነገሮች ውጤት ነው።

    8. የደም ማነስ (በብረት እጥረት)
    የአንጀት ራውንድ ወርምና ፒንወርም (roundworm and pinworm) በሰውነታችን ውስጥ የብረት ማዕድን እጥረት እንዲፈጠር በማድረግ ለደም ማነስ ያጋልጡናል።ፓራሳይቱ የብረት ማዕድንን ጨምሮ ሌሎች ጥሩ ቫይታሚኖችን ከተመገብነው ምግብ ውስጥ ይሰርቃል።

    9. የቆዳ ችግር
    የአንጀት መስመርን የወረሩ ጥገኛ ትላትሎች በሰውነታችን ውስጥ እብጠት በመፍጠርእንዲሁም የተለያዩ የቆዳ ችግሮች ያስከትላሉ ከነዚህ የቆዳ ችግሮች መካከል ሽፍታ ሌሎች የቆዳ አለርጂዎችን ያጠቃልላል።

    10. የጡንቻና መገጣጠሚያ ህመም
    አንዳንድ ፓራሳይቶች የመገጣጠሚያና ጡንቻዎች ስስ አካሎችን በመውረር ራሳቸውን በሲስት (cyst-like) መሳይ ሽፋን ይከልላሉ። የዚህም ውጤት ማቃጠልና ህመም ያስከትላል። እነዚህ ምልክቶች ከሪህ (Arthritis) በሽታ ጋር በመመሳሰል ብዥታ ይፈጥራል።

    ምንጭ:- ዶክተር አለ(Doctor Alle)

    Read more
  • የከተራና የጥምቀት በዓላት በሰላም እንዲከበሩ ዝግጅት ተጠናቋል - All Arrangements and Pre-questions are Taken To Celebrate Ethiopian Ketera in Piece

                                                                     

    የከተራና የጥምቀት በዓላት በሰላም እንዲከበሩ ዝግጅት ማጠናቀቁን የአዲስ አበባ ፖሊስ ኮሚሽን አስታወቀ።

    ኮሚሽኑ የከተራ እና የጥምቀት በዓላት በሰላም እንዲከበሩ ከበዓሉ አዘጋጅ ኮሚቴ፣ ከፀጥታና የፍትህ አካላት እንዲሁም ከመዲናዋ ነዋሪ ጋር እየሰራ መሆኑን አስታውቋል፡፡

    በዓላቱ በሰላም ተጀምረው እንዲጠናቀቁ ለወንጀል እና ትራፊክ አደጋ መከላከል ተግባሩ ልዩ ትኩረት በመስጠት በርካታ የሰው ኃይል ማሰማራቱንም ኮሚሽኑ ገልጿል።

    በታቦት ማደሪያ ስፍራዎች በተለይም በርካታ የበዓሉ ታዳሚዎች በሚገኙበት ጃን ሜዳ ግቢ ውስጥ፥ ምርመራ በማጣራት አፋጣኝ ውሳኔ መስጠት የሚያስችል ጊዜያዊ ፖሊስ ጣቢያ አገልግሎት የሚሰጥ ይሆናል። 

    ህብረተሰቡ ፀበል በሚረጭበት ወቅት በሚፈጠር ግፊያ ጉዳት እንዳይደርስበት፣ ንብረቶቹ እንዳይሰረቁበት እንዲሁም የመንገድ ላይ የትራፊክ አደጋ እንዳይከሰት ተገቢውን ጥንቃቄ ማድረግ አለበትም ነው ያለው ኮሚሽኑ።

    የእምነቱ ተከታዮች በተለይ ወጣቶች ከዚህ በፊት እንደሚያደርጉት ሁሉ በተደራጀ መንገድ ከፖሊስ እና ከሌሎች የፀጥታ አካላት ጎን በመቆም ለበዓሉ በሰላም መከበር የሚያደርጉትን ትብብር እንዲቀጥሉ ጥሪውን አስተላልፏል፡፡ 

    ታቦታት በሚያልፉበት ወቅትም አሽከርካሪዎች ሆኑ የበዓሉ ታዳሚዎች ለፀጥታ አካላት አስፈላጊውን ትብብር እንዲያደርጉም ኮሚሽኑ ጥሪውን አቅርቧል።

    ለዚህም ከጥር 10 ቀን 2010 ዓ.ም ጀምሮ በዓሉ እስከሚጠናቀቅ ድረስ በጃን ሜዳ ዙሪያ ተሽከርካሪ ለአጭርም ሆነ ለረጅም ጊዜ አቁሞ መሄድ የተከለከለ መሆኑን አሽከርካሪዎች ተገንዝበው አማራጭ ስፍራዎችን እንዲጠቀሙ አሳስቧል። 

    ህብረተሰቡ በማንኛውም ወቅት ከፀጥታ ስራ ጋር ተያያዥ እና አጠራጣሪ ነገሮች ሲያጋጥሙት ጥቆማ ለመስጠት እንዲሁም የፖሊስ አገልግሎትን ለማግኘት፥

    በ01-11-26-43-77፣ 01-11-26-43-59፣ 01-18-27-41-51፣ 01-11-11-01-11 እና በ991 ወይም 916 ነፃ የስልክ መስመሮችን መጠቀም እንደሚችል ኮሚሽኑ አስታውቋል፡፡

     

    ምንጭ:- ኤፍ ቢ ሲ(FBC)

     

    Read more
  • NEWS: በየመን ጦርነት ከ5 ሺህ በላይ ህፃናት ሞተዋል- ዩኒሴፍ - UNICEF: Over 5,000 Kids Killed by Saudi War on Yemen

                                                                                      

    ሳዑዲ አረቢያ መራሹ ጦር በየመን እያካሄደ ባለው ጦርነት የበርካታ ህፃናት ህይወት እንዲያልፍ ማድረጉን የተባበሩት መንግስታት ድርጅት የህጻናት አድን ኤጀንሲ አስታወቀ።

    ዩኒሴፍ ትናንት ባወጣው መረጃ ጦርነቱ ከተጀመረበት እንደ አውሮፓውያን አቆጣጠር ከየካቲት ወር 2015 ጀምሮ እስካሀን ባለው ጊዜ ውስጥ ከ5 ሺህ በላይ ህፃናት ህይወታቸው አልፏል።

    ይህ አሃዝም በአማካይ በቀን የ5 ህጻናት ህይወት እንደሚያልፍ ያሳያል ነው ያለው ሪፖርቱ።

    እንዲሁም ከ2 ሚሊየን በላይ የመናውያን ህፃናት ከትምህረት ገበታ ውጭ ለመሆን ተገደዋል ያለው ሪፖርቱ፥ ከ400 ሺህ በላይ የሚሆኑት ህፃናት ደግሞ ለምግብ እጥረት መጋለጣቸውን አስቀምጧል።

    ጦርነቱ ከተጀመረ ወዲህ ከ3 ሚሊየን በላይ ህፃናት ተወልደዋል የተባለ ሲሆን፥ እነዚህ ህፃናትም በግጭቶች፣ ከመኖሪያ መፈናቀል፣ በሽታ፣ ድህነት እና የምግብ እጥረት ስጋት ውስጥ የወደቁ መሆናቸውም በሪፖርቱ ተብራርቷል።

    በየመን የዩኒሴፍ ተወካይ ሜሪክሴል ሬናሎ፥ “አዲሱ የየመን ትውል ግጭትን ብቻ እያቀ ነው በማደግ ላይ የሚገኘው፤ ሀገሪቱ የሚገኙ ህፃናት በጦርነት ምክንያት ከፍተኛ ጉዳት እየደረሰባቸው ነው” ብለዋል።

    የተባበሩት ምንግስታት ድርጅት ቀደም ብሎ ባወጣው ሪፖርት በእርዳታ ላይ ጥገኛ የሆኑ የመናውያን ቁጥር 22 ነጥብ 2 ሚሊየን ደርሷል።

    የየመን ጦርነት እንደ አውሮፓውያኑ 2015 ከተጀመረ ወዲህ እስካሁን ከ13 ሺህ በላይ ሰዎች መሞታቸውንም ሪፖርቱ ያመለክታል።

    በጦርነቱ ምክንያት በርካታ የመሰረተ ልማቶች በመውደማቸውም በሀገሪቱ የኮሌራ ወረርሽኝ መከሰቱን ደግሞ የዓለም ጤና ድርጅት ያወጣው ሪፖርት ያመልከታል። 

    ድርጅቱ ባወጣው ሪፖርት በወረርሽኙ 2 ሺህ 167 ሰዎች የሞቱ ሲሆን፥ ከግማሽ ሚሊየን በላይ ሰዎች ደግሞ በበሽታው ተጠቅተዋል።

    ምንጭ:- ኤፍ ቢ ሲ(FBC)

    Read more
  • ሴቶች ከወንዶች የላቀ ችግርን የመቋቋም ጥንካሬ አላቸው - Women Have The Strength to Withstand Problems Than Men

                                                                         

    ሴቶች ከወንዶች በላይ በእድሜ ብዙ አመት በመኖር ይታወቃሉ።

    ተመራማሪዎች እንደሚሉት ሴት ህፃናት ከወንድ ህፃናት በተሻለ ረሃብ፣ ወረርሽኝ እና ሌሎች ጉዳቶችን የመቋቋም አቅም አላቸው። 

    ይህም ሴቶች በጨቅላነታቸው ይህ ጠቀሜታ ለማግኘት የሚያስቸሉ ስነ ህይወታዊ የሆነ የባህሪ ልዩነቶች እንዳሉ ተመራማሪዎቹ ጠቁመዋል።

    ቨርጂኒያ ዛሩሊ እና ጃምስ ቫውፔል የተባሉት ተመራማሪዎች፥ የምርምር ውጤቶቹ ለፆታዊ ልዩነቱ ሌላ ተጨማሪ ማሳያ ማግኘታቸውን ይናገራሉ። 

    ተመራማሪዎቹ የ250 ዓመታት በ2 ዓመት እና ከዚያ በታች የአድሜ ክልል ውስጥ የሚገኙ ሰዎች በአስቸጋሪ ሁኔታ ውስጥ ያለፉባቸውን አጋጣሚዎች መርምረዋል።

    በአሜሪካ እና ትሪናዳድ በባርነት ውስጥ ያለፉ፣ በአየርላንድ፣ ዩክሬን እና ስዊዲን ተከስቶ በነበረው ረሃብ ውቅት የነበሩ እንዲሁም በአየስላንድ በኩሽፍኝ ወረርሽኝ ወቅት የኖሩ ሰዎችን የተመለከቱ መረጃዎችን መርምረዋል።

    ጥናቱ እንደሚያመለክተው ሴቶች ከወንዶች ይልቅ በአማካይ ከ6 ወር እስከ አራት ዓመት በሚደርስ ብልጫ ረዥም እድሜ አላቸው።

    ውጤቱ በእድሜ ደረጃ ሲታይም ተመራማሪዎቹ እንደሚያመለክቱት የሴት የመዳን እድሎች ብዙዎቹ ገና በሕፃንነታቸው የሚታይ ሲሆን፥ አዲስ የተወለዱ ሴት ህፃናት ከወንዶች ይልቅ ጠንካራ ናቸው ነው የተባለው። 

    ተመራማሪዎቹ እንደገለጹት ይህ የሴቶች ችግሮችን የመቋቋም አቅም በስነ ባህርይ ወይም ሆርሞን ምክንያት የመጣ ሊሆን ይችላል።

    ለዚህም ለምሳሌ የሴቶች ሆርሞን በሽታን ለመከላከል የሚያስችል ጉልበት እንዳለው ታይቶበታል ነው የተባለው።

    ምንጭ:- ኤፍ ቢ ሲ(FBC)

     

    Read more
  • NEWS: የዋይት ሃውስ ዶክተር የትራምፕ ''የማመዛዘን አቅም ጤነኛ ነው'' አሉ - Trump's Cognitive Ability is Normal, Says White House Doctor

                                                                                       

    የ71 ዓመቱ የአሜሪካው ፕሬዝደንት ዶናልድ ትራምፕ የስነ-አዕምሮ ምረመራ ከተደረገላቸው በኋላ በማመዛዘን አቅማቸው ላይ ያልተለመደ ነገር የለም፣ ጤንነታቸውም እጅግ ጥሩ የሚባል ደረጃ ላይ ነው ያለው ሲሉ የዋይት ሃውስ ዶክተሮች ተናግረዋል።

    ''በማመዛዘን አቅማቸው እና በነርቭ ስርዓታቸው ላይ ምንም አይነት ስጋት የለኝም'' ሲሉ ዶ/ር ሮኒይ ጃክሰን ተናግረዋል።

    ትራምፕ የአዕምሮ ጤና ምርመራ እንዲያደርጉ ያስገደዳቸው በቅርቡ ለህትመት የበቃው አነጋጋሪ መጽሃፍ የፕሬዝዳንቱን የአዕምሮ ጤና ጥያቄ ውስጥ ካስገባ በኋላ ነበር።

    እንደ 'ፋየር ኤንድ ፊዩሪ' መጽሃፍ ፀሐፊ ማይክል ዎልፍ ከሆነ በዋይት ሃውስ ውስጥ የሚገኙ የፕሬዝደንቱ አማካሪዎች ትራምፕን'' ሁሉም እንደሚያምረው ህጻን'' አድረገው ይመለከታሉ ብለዋል።

    ትራምፕ የማይክል ዎልፍን መጽሃፍ ''በውሸት የተሞላ'' ሲሉ ገልጸውታል። የውጪ ጉዳይ ሚንስትር ሬክስ ቲለርሰንም የትራምፕ የአዕምሮ ጤና እየተዳከመ ነው የሚለውን አስተያየት አጣጥለውታል።

    ባሳለፍነው ሳምንት ትራምፕ ፕሬዝዳንት ከሆኑ በኋላ ለመጀመሪያ ግዜ ለሶስት ሰዓታት የዘለቀ ምረመራ አድርገዋል።

    ዶክተር ሮኒይ ጃክሰን ለጋዜጠኞች በሰጠት መግለጫ ላይ አጠቃላይ የፕሬዝዳንቱ ጤና አስተማማኝ ደረጃ ላይ ይገኛል ሲሉ ተደምጠዋል።

    ''የምርመራ ውጤቶቹ እንደሚያሳዩት ፕሬዝዳንቱ ጤነኛ ናቸው። ከአልኮል መጠጦች እና ከሲጋራ ስለተቆጠቡ ወደፊት ከልብ እና ተያያዥ በሽታዎች የመጠቃት እድላቸው አነስተኛ ነው'' ያሉት ዶክተር ጃክሰን ፕሬዝደንት ትራምፕ ስብ የበዛበትን ምግብ መቀነስ እና አካላዊ እንቅስቃሴ ማዘውተር እንዳለባቸውም መክረዋል።

    ምንጭ: ቢቢሲ

    Read more
  • ከአለት ተፈልፍለው የተሰሩ ድንቅ አብያተ-ክርስቲያናት - The Incredible Rock-Hewn Churches

                                                                        

    በሰሜን ኢትዮጵያ የምትገኘው ላሊበላ ከአለት ተፈልፍለው የተሰሩት ድንቅ አብያተ-ክርስቲያናት የሚገኙባት ከተማ ናት። ለየት ያሉት እነዚህ አብያተ-ክርስቲያናት አሁን በዩኔስኮ ከተመዘገቡት የዓለማችን ድንቅ ታሪካዊ ስፍራዎች መካከል ይገኛሉ።

    ከአንድ ወጥ አለት በርና መስኮት እንዲኖራቸው ተደርገው የተሰሩት እነዚህ አብያተ-ክርስቲያናት አንዳንዶቹ እስከ 50 ሜትር የሚደርስ ጥልቀት አላቸው። የተገነቡትም በ12ኛው እና በ13ኛው ክፍለ ዘመን ነበር።

    በርካታ ምሁራንና የታሪክ አጥኚዎች እንደሚሉት ይህ ከአለት አብያተ-ክርስቲያናትን በመፈልፍል የመገንባት ጥበብ ከ500 ዓመታት ቀደም ብሎ የቀረ እንደሆነ ያምናሉ።

    ነገር ግን አሁን ባለንበት ዘመንም ከአንድ ወጥ አለት አብያተ-ክርስቲያናትን የመቅረፁ ሥራ በሰሜናዊ ኢትዮጵያ ውስጥ እየተከናወነ መሆኑ ታውቋል። የቢቢሲው ዘጋቢ ኢማኑኤል ኢጉንዛ ወደ ስፍራው ተጉዞ ነበር።

    "እነዚህን አብያተ-ክርስቲያናትን የመስራቱ ጥሪና አጠቃላይ ቅርፁ ከእግዚአብሄር ዘንድ ተገልፆልኝ ነው'' ይላሉ የአርባ ዓመቱ ጎልማሳ አባ ገብረመስቀል ተሰማ ከአለት ፈልፍለው የሰሩትን አዲሱን ቤተክርስቲያ ተዘዋውረው እያሳዩ።

    በስፍራው በአጠቃላዩ አራት አብያተ-ክርስቲያናት ሲኖሩ እያንዳንዳቸው እርስበርሳቸው በሚያገናኝ ዋሻዎች ተያይዘዋል። የውስጥ ግድግዳቸውም በጥንቃቄ በተሰሩ ውብ ስዕሎች ተውበዋል።

    አባ ገብረመስቀል ተሰማ የኦርቶዶክስ ቤተ-ክርስቲያን ቄስ ሲሆኑ፤ ከሌሎች ሦስት ሰራተኞች ጋር በመሆን በዙሪያቸው ያሉ ምዕመናን የአምልኮት ሥነ-ሥርዓት ለማከናወን ሊጠቀሙበት የሚችሉባቸውን አብያተ-ክርስቲያናት ከአለት ለመፈልፈል ሙሉ ጊዜያቸውን ሰውተዋል።

    "አዲሱ ላሊበላ ብዬ ብሰይመው ደስ የሚለኝን ይህን የውቅር የአብያተ-ክርስቲያናት ስብስብን ሰርቶ ለማጠናቀቅ አራት ዓመታትን ፈጅቶብናል'' ይላሉ።

    በእሳተ-ገሞራ የተፈጠረውን አለት ለመፈልፈልና ቅርፅ ለማበጀት በቅርብ የሚገኙትን መሮ፣ መጥረቢያና አካፋን ተጠቅመዋል። በዚህ ሂደት ከባዱ ሥራ የሚጀምረው ከግዙፍ አለት ጫፍ ላይ በመሆን እየጠረቡ ወደታች በመውረድ ነው። ይህም መስኮቶችን፣ በሮችንና መተላለፊያዎችን መጥረብን ይጨምራል።

                                                                     

    አብያተ ክርስቲያናቱ ከተቀረፁበት ቦታ ለመድረስ ቀላል አይደለም። አንደኛው ቤተክርስቲያን እየተቀረፀ ያለበት ስፍራ ለመድረስ ድንጋያማ የሆነ መንገድን ተከትሎ ለአንድ ሰዓት ያህል መጓዝን ይጠይቃል። አንዳንዶቹም በጣም የራቀ ቦታ ላይ ከመገኘታቸው የተነሳ የአካባቢው ባለስልጣናት ሳይቀሩ አብያተ-ክርስቲያናት መሰራታቸውን ሲሰሙ ተደንቀዋል።

    አዳዲሶቹ አብያተ-ክርስቲያናት የሚገኙት አስደናቂ ኮረብታዎች ባሉበትና ታዋቂዎቹ ከአለት የተፈለፈሉ የላሊበላ አብኣተክርስቲያናትን ለማየት በሚኣስችለው የሰሜን ኢትዮጵያ ክፍል ወሎ አካባቢ ነው።

    አስራአንዱ ከወጥ አለት የተፈለፈሉት የላሊበላ ውቅር አብያተ-ክርስቲያናት ለኢትዮጵያ ክርስትና ዋነኛ ሥፍራ በሆነው ቦታ ላይ በ12ኛው ክፍለዘመን ነበር የተሰሩት።

    ተፈልፍለው የተሰሩትም ወደ ኢየሩሳሌም ለመጓዝ ለሚቸገሩ ኢትዮጵያዊያን ምዕመናን ሲል አዲሲቱን ኢየሩሳሌም በቅርብ ለመገንባት በተነሳው በንጉሥ ላሊበላ ዘመን ነው።

    ረጅም ዘመንን ካስቆጠሩት የላሊበላ አብያተ-ክርስቲያናት መካከል ጣሪያው በመስቀል ቅርፅ የተሰራው ታዋቂው የቅዱስ ጊዮርጊስ ወይም ቤተ-ጊዮርጊስ እንዲሁም ከአንድ ወጥ አለት በመቀረፅ በዓለም ትልቁ የሆነው የቤተ-ማሪያም አብያተ-ክርስቲያናትን ጨምሮ አንዳንዶቹ ከመሬት በታች እስከ 40 ሜትር ይጠልቃሉ።

    አንዳንድ አፈ-ታሪኮች እንደሚሉት አብያተ-ክርስቲያናቱ በሚፈለፈሉበት ጊዜ በንጉሥ ላሊበላ ከውጪ እንዲመጡ የተደረጉ ሰራተኞች ቀን ቀን ሲሰሩ ይውሉና ሌሊት ደግሞ መላዕክት ሥራውን ያከናውኑ እንደነበር ይተርካሉ።

    ነገር ግን አባ ገብረመስቀል ይህንን አይቀበሉትም፤ አዲሶቹን ውቅር አብያተ-ክርስቲያናት ለመስራት የተነሳሱትም የላሊበላን አብያተ-ክርስቲያናት በእግዚአብሄር የተመሩ ኢትዮጰያዊያን የሰሩት መሆኑን ለማስመስከር እንደሆነ ይናገራሉ።

                                                                         

    "ኢትዮጵያዊያን ይህን መሰለ ተግባርን ለማከናወን የሚያበቃ እውቀትና ክህሎት አልነበራቸውም ብለው የሚያምኑ አንዳንዶች አሉ። ቢሆንም ግን አሁን እኔ በምሰራበት ጊዜ ማንም አንዳች ነገር አላሳየኝም፤ ይህን ድንቅ ሥራ እውን ያደረኩት በመንፈስ-ቅዱስ አማካይነት ነው'' ይላሉ።

    "በሰሜናዊው ኢትዮጵያ እየተገኙ ላሉት አዳዲስ አብያተ-ክርስቲያናት መንፈሳዊነት ዋነኛው መሰረት ነው'' ሲሉ የሚያብራሩት የቶሮንቶ ዩኒቨርሲቲው ፕሮፌሰር ማይክል ገርቨርስ ናቸው።

    ፕሮፌሰር ማይክል ከሥነ-ህንፃ እና ከፊልም ባለሙያዎች ጋር በመሆን ይህንን እየጠፋ ያለውን የግንባታ ጥበብ መዝግቦ ለማስቀመጥ አንድ ሥራ ጀምረዋል። በዩናይትድ ኪንግደሙ አርኬዲያ ፈንድ ቢደገፈው እቅዳቸውም ዘመናዊ የመረጃ ቋት በማዘጋጀት ለሕዝብ ክፍት ማድረግ ነው።

    "ከድንጋይ የሚፈለፈሉ አብያተ-ክርስቲያናትን መስራቱ የሚቀጥል ከሆነ ዘመናዊነት እየተስፋፋ በሚመጣበት ጊዜ መፈልፈያ መሳሪያዎችን መጠቀም ስለሚጀመር፤ በእጅ የመስራቱ ጥበብ ሙሉ ለሙሉ ይጠፋል'' ይላሉ።

    "ስለሆነም ከአንድ የግንባታ ቦታ ወደ ሌላ ቦታ እየሄድን የግንባታውን ጥበብ የሚያውቁትን ባለሙያዎችን በማነጋገር ሥራቸውን እንዴት እንደሚያከናውኑ ያላቸውን የግል ዕውቀት እንመዘግባለን። አላማችንም ያገኘውን መረጃ ለሕዝብ ክፍት ማድረግ ነው።

    ቡድኑ እስካሁን 20 አዳዲስ አብያተ-ክርስቲያናትን በተራራማዎቹ በሰሜናዊ የአማራና የትግራይ ክፍሎች ውስጥ አግኝቷል።

    "የበለጠ በፈለግን ቁጥር ተጨማሪ እናገኛለን። በርካታ አብያተ-ክርስቲያናት እንዳሉ ስለማምን ሌሎች በርካቶቸን አግኝተን እንደምንመዘግባቸው ተስፋ አደርጋለሁ። ከአለት የተፈለፈሉ አብያተ-ክርስቲያናት አንድ ጊዜ አገልግሎት መስጠት ከጀመሩ በኋላ ብዙም ጥገና የሚፈልጉ አይደሉም። ለሺህ ዓመታት አገልግኦት ሊሰጡ ይችላሉ'' ሲሉ ፕሮፌሰር ገርቨርስ ይጨምራሉ።

    ለአባ ገብረመስቀል ሥራቸው አብያተ-ክርስቲያናቱን የገነቡበት ጥበብ መኖሩን ከማረጋገጥ በእጅጉ የበለጠ ነው።

    "አብያተ-ክርስቲያናቱበይፋ ተከፍተው በአካባቢዬ ያለው ሕብረተሰብ የሐይማኖታዊ ሥነ-ሥርዓቶችን ሲያከናውን ለማየት ጓጉቻለሁ። በቅርቡ... በጣም በቅርቡ እነዚህ የእግዚአብሄር ቤቶች በደስተኛ ሰዎች ይሞላሉ'' ብለዋል ገፃቸው በፈገግታ በርቶ።

    ምንጭ: ቢቢሲ

     

    Read more
  • NEWS: በካሊፎርኒያ 13 ልጆች በቤታቸው ውስጥ በሰንሰለት ታስረው ተገኙ - Shackled Siblings Found in Perris, California Home

                                                                             

    ሁለት ወላጆችን በመኖሪያ ቤታቸው ውስጥ 13 ልጆቻቸውን በሰንሰለት አስረው በማቆየታቸው በቁጥጥር ስር እንዳዋላቸው የካሊፎርኒያ ፖሊስ አስታወቀ።

    የ57 ዓመቱ ዴቪድ ተርፒን እና የ49 ዓመቷ ባለቤቱ ሉዊዝ አን ልጆችን በማሰቀየት እና አደጋ ላይ መጣል የሚሉ ክሶች ተመስርቶባቸዋል።

    ካሊፎርኒያ በሚገኘው መኖሪያ ቤታቸው ውስጥ በሰንሰለት ታስረውና ተቆልፎባቸው የተገኙት ልጆች እድሜያቸው ከ 2-29 እንደሆነ ፖሊስ አስታውቋል።

    ፖሊስ ጨምሮ እንዳስታወቅም ታስረው የተገኙት 13ቱ ሰዎች ወንድምና እህት ናቸው።

    የፖሊስ አዛዡ በሰጡት መግለጫ፤ ፖሊስ ከቦታው መድረስ የቻለው ከታሳሪዎቹ መካከል የ10 ዓመት እድሜ ያላት ህጻን አምልጣ ቤቱ ውስጥ ባገኘችው ተንቀሳቃሽ ስልክ ወደ ፖሊስ ከደወለች በኋላ ነው ብለዋል።

    የ10 ዓመቷ ህጻን ወደ ፖሊስ ደውላ ሌሎች 12 ወንድም እና እህቶቿ በወላጆቻቸው ታስረው እንደሚገኙ ተናግራለች።

    ፖሊስ በቦታው ሲደርስ በምግብ እጥረት የተጎሳቆሉ እና ንጸህና በጎደለው ጨለማ ክፍል ውስጥ የታሰሩ 12 ሰዎችን ማግኘቱን ተናግሯል።

    ወላጆቹ ልጆቻቸውን ለምን በዚህ አይነት ሁኔታ እንዳቆዩ ለቀረበላቸው ጥያቄ መልስ መስጠት አልቻሉም።

    ፖሊስ ከታሳሪዎቹ መካከል 7ቱ እድሜያቸው ከ18-29 የሚገመቱ አዋቂ መሆናቸው ድንጋጤን ፈጥሮብኛል ብሏል።

    13ቱም ልጆች አሁን በአካባቢው በሚገኙ ሆስፒታሎች እርዳታ እየተደረገላቸው ነው።

    ምንጭ: ቢቢሲ

    Read more
  • NEWS: አብዱል ፈታህ አል ሲሲ ግብፅ በአባይ ላይ ያላትን ጥቅም ለማስጠበቅ ቃል ገቡ - Abdul Fattah al-Sisi Promissed to Protect Egypt's Interests in The Nile

                                                                   

    የግብፁ ፕሬዝዳንት አብድል ፈታህ አል ሲሲ የሀገራቸውን የውሃ አቅርቦት እያስጠበቁ ከኢትዮጵያ እና ከሱዳን ጋር ያላቸው ሰላማዊ ግንኝነት ዙሪያ አትኩረው እንደሚሰሩ መናገራቸውን የፈረንሳዩ የዜና ወኪል ዘግቧል።

    ግብፅ ከሱዳን እና ከኢትዮጵያ ጋር በድንበር እና በአባይ ውሃ አጠቃቀም ዙሪያ አለመግባባት ውስጥ መሆኗ ይታወቃል።

    ግብፅ የውሃ አቅርቦቷ የተመሰረተው ሙሉ በሙሉ አባይ ላይ ሲሆን የኢትዮጵያ ታላቁ የህዳሴ ግድብ የሀገሪቱ የውሃ ድርሻ ይጎዳዋል ሲሉ ይናገራሉ።

    ግብፅ ለረዥም ዓመት አባይን መጠቀም ተፈጥሮአዊ መብቷ እንደሆነ በመጥቀስ በዓለም ትልቁ ወንዝ ላይ የሚካሄዱ ፕሮጀክቶችን ትቃወም ነበር።

    ግብፅ ለረዥም ጊዜ የቆየ በማእድን ሃብቱ የታወቀው እና ቀይ ባህር አቅራቢያ በሚገኘው ሀላየብ ትራያንግል ጋር በተያያዘ ከሱዳን ጋር ግጭት ውስጥ ናት።

    ሁለቱም ሀገራት የይገባኛል ጥያቄ የሚያነሱ ሲሆን ቦታው በግብፅ ቁጥጥር ስር ይገኛል።

    ባለፈው ግንቦት ወር ሱዳን ከግብፅ የሚገቡ የግብርና እና የእንስሳት ተዋፅኦችን ማገዷ ይታወሳል። በቅርቡም "ለመመካከር" በሚል ሰበብ አምባሳደሯን ከካይሮ ጠርታለች።

    አል ሲሲ በሀገሪቱ ቴሌቪዥን ባደረጉት ንግግር ሀገራቸው ወታደራዊ አቅሟን ታጠናክራለች።

    በተጨማሪም "ይህ ደህንነታችን ነው፤ ሀገራችንን መከላከል የሚችል በቂ ወታደራዊ ሃይል አለን። አሁን የምናገረው ይህንን ሰላም ለማስጠበቅ ነው። በድንበር አካባቢ ያለውን ሁሌም እናጠናክራለን፤ ከማንም ጋር አናብርም በሌላ ሃገር ጉዳይ ጣልቃ አንገባም" ብለዋል።

    አል ሲሲ መልእክታቸው ለግብፃውያን ቢመስልም "ለኢትዮጵያ እና ሱዳን ወንድሞቻችን ጉዳዩ ግልፅ ይሆንላቸዋል" ብለዋል።

    የግብፅ ፕሬዝዳንት ባለፈው ሳምንት ያለውን የውሃ እጥረት ያስወግዳል ተብሎ የታለመ ከየቤቱ የሚወገዱ ውሃዎችን ለማከም የሚያገለግል ትልቅ የውሃ ማጣሪያ እየገነባች እንደሆነ ይፋ አድርገው ነበር።

    ባለፈው ወር የውጭ ጉዳይ ሚኒስትሩ ሳሜህ ሹክሪ በአዲስ አበባ በመገኘት ስለ ታላቁ ሕዳሴ ግድብ መነጋገራቸው ይታወቃል።

    የሃይል ማመንጫ ግድቡ 6000 ሜጋ ዋት ያመነጫል ተብሎ የታሰበ ሲሆን ይህም ከስድስት የኒውክሌር ማብላያ ጣበያ ጋር የሚስተካከል ያደርገዋል።

    ግንባታው በ2012 የተጀመረ ሲሆን ግድቡ እስካሁን ድረስ 60% ብቻ መጠናቀቁን የሃገሪቱ መገናኛ ብዙሃን ዘግበዋል።

    ምንጭ: ቢቢሲ

    Read more
  • ሳምሰንግ ተጣጣፊ አዲስ የስልክ ዓይነቱን በ2019 ይፋ እንደሚያደርግ ገለፀ - Samsung Reviles to Release Folding Smartphone in 2019

                                                   

    ሳምሰንግ ኤሌክትሮኒክስ ኩባንያ በአውሮፓውያኑ 2019 ተጣጣፊ ስማርት የሞባይል ስልክን ይፋ እንደሚያደርግ ገለፀ።

    ኩባንያው የሚተጣጠፍ የመመልከቻ ስክሪን ያለው ይህ ስልክ ይፋ ይደረጋል ከተባለ ረዥም ጊዜ አስቆጥሯል።

    በተለይም ከተጠቃሚዎች ዘንድ ያለ ፍላጎት ይህን አዲስ የስልክ ሞዴል ይፋ ማድረጊያ ጊዜን እንዳራዘመው ነው ኩባንያው የጠቆመው።

    samsung_folding2_15012018.jpg

    ሆኖም በተያዘው የፈረንጆቹ ዓመት መጨረሻ ላይ ስልኩን ወደ ማምረት እንደሚገባ ነው ኩባንያው ያስታወቀው።

    ኩባንያው ሊሰራ ያቀደውን ስማርት ስልክ ለተመረጡ ደንበኞቹም በ2018 ያቀርባል ተብሎ ይጠበቃል።

    ምንጭ:- ኤፍ ቢ ሲ(FBC)

    Read more
  • የዛሬ የዕለተ ሰኞ የጥር 07 ቀን 2010 የሸገር ወሬዎች - Today Jan, 15 2018 Sheger FM Radio News

                                                               

    ለባቡር መስመር ዝርጋታና የትራንስፖርት አገልግሎቱ ያስፈልጋሉ ተብለው በውጭ ሀገር ስልጠና ካገኙ ከ440 በላይ ኢትዮጵያውያን መካከል ያለ ስራ የተቀመጡ አሉ ተባለ፡፡ በሌላ በኩል ኮርፖሬሽኑ በአገር ውስጥ የባቡር ባለሙያዎች ማሰልጠኛ ተቋም ሊገነባ መሰናዳቱ ተነግሯል፡፡ (ትዕግስት ዘሪሁን)

    የፌዴራል ጠቅላይ ዐቃቤ ሕግ የተወሰኑ እስረኞችን ክስ ማቋረጡን ዛሬ ተናግሯል፡፡ (የኔነህ ሲሳይ)

    ዘንድሮ እስከ 40 ሺህ የሚደርሱ የጋራ መኖሪያ ቤቶች ተገንብተው ለተጠቃሚዎች ሊተላለፉ ይችላሉ ተባለ፡፡ (ዮሐንስ የኋላወርቅ)

    የከንፈርና የላንቃ መሰንጠቅ እና በፊት ገፃችሁ ላይ ጉዳት የደረሰባችሁ በነፃ ታከሙ ተብላችኋል፡፡ (ወንድሙ ሀይሉ)

    የኦሮሚያና ሶማሌ ክልል ተፈናቃዮችን ወደ ነበሩበት ቀዬ ለመመለስ ባለመቻሉ ለጊዜው በየክልላቸው መልሶ ለማቋቋም ተወስኗል፡፡ (ትዕግስት ዘሪሁን)

    የ1970ዎቹንና የአሁኑ የኑሮ ሁኔታ በንፅፅር የሚያሰቃኝ “ዘመን” የተሰኘ የስዕል አውደ ርዕይ በአዲስ አበባ ሙዚየም ተከፈተ፡፡ (ቴዎድሮስ ብርሃኑ)

    የቅርስ ጥናትና ጥበቃ ባለስልጣን መጪውን የጥምቀት በዓል በዩኔስኮ የዓለም የማይዳሰስ ቅርስ አድርጌ ለማስመዝገብ የሚረዱትን ስራዎች ማከናወኑን ተናገረ፡፡ (ወንድሙ ሀይሉ)

    በአቃቂ 9 ሰዎችን በዕቃ መጫኛ ላይ አሳፍሮ ሲጓዝ የነበረ አይሱዙ ተገልብጦ የሰው ሕይወት አለፈ፡፡ (ወንድሙ ሀይሉ)

    ምንጭ:- ኤፍ ቢ ሲ(FBC)

    Read more
  • NEWS: በኢራቅ ባግዳድ በተፈፀመ የቦምብ ጥቃት ከ26 በላይ ሰዎች ሞተዋል - More than 26 people were killed in a Bomb Attack in Baghdad

                                                   

    በኢራቅ ባግዳድ ከተማ ዛሬ ጠዋት በተፈፀመ የቦምብ ጥቃት የበርካቶች ህይወት ማለፉ ተነግሯል።

    በሁለት ተሽከርካሪዎች ላይ ተጠምዶ በነበረ ቦምብ በተፈፀመው ጥቃትም በትንሹ የ26 ሰዎች ህይወት ማለፉ ነው የተነገረው።

    የኢራቅ የሀገር ውስጥ ጉዳይ ሚኒስትር እንዳስታወቀው፥ በቦምብ ጥቃቱ ህይወታቸውን ካጡት ሰዎች በተጨማሪ 65 ሰዎች ላይ የተለያየ መጠን ያለው ጉዳት ደርሷል።

    በምስራቃዊ ባግዳድ የሚገኙ የጤና ባለሙያዎች በበኩላቸው በቦብም ጥቃቱ የተጎዱት ሰዎች ቁጥር ከ90 እንደሚበልጥ ነው በመናገር ላይ የሚገኙት።

    በቦምብ ጥቃቱ የሞቱት ሰዎች ቁጥር አሁን ካለው ሊጨምር እንደሚችልም ነው የተገለፀው።

    ጥቃቱን ተከትሎ እስካሁን ሃላፊነት የወሰደ አካል የለም።

    ምንጭ:- ኤፍ ቢ ሲ(FBC)

    Read more
  • የአዲስ አበባ ቀላል ባቡር በግማሽ ዓመት ውስጥ ከ57 ሚሊዮን ብር በላይ ገቢ ማስገኘቱ ተገለፀ - Addis Ababa Light Railway Has Secured Over 57 Million birr in Half Fiscal Year

                                                                 

    የአዲስ አበባ ቀላል ባቡር በግማሽ ዓመቱ ከ57 ሚሊዮን ብር በላይ ገቢ ማስገኘቱን የኢትዮጵያ ምድር ባቡር ኮርፖሬሽን አስታወቀ።

    ኮርፖሬሽኑ የ2010 የመጀመሪያ ግማሽ አመት የእቅድ አፈጻጸሙን ለመንግስት የልማት ድርጅቶች ቋሚ ኮሚቴ አቅርቧል።

    ኮርፖሬሽኑ በግማሽ ዓመቱ በአዲስ አበባ ቀላል ባቡር ፕሮጀክት 32 ሚሊዮን መንገደኞችን በማጓጓዝ 98 ነጥብ ስድስት ሚሊዮን ብር ገቢ ለማግኘት አቅዶ እንደነበር ይታወቃል።

    የኮርፖሬሽኑ ዋና ስራ አስፈጻሚ ዶክተር ብርሃኑ ባሻህ እንደገለጹት፥ የእግረኞች ህገ-ወጥ የባቡር መስመር አጠቃቀም ባቡሮቹን ፍጥነት በማዘግየት የታሰበው ገቢ እንዳይገኝ እንቅፋት ፈጥሯል።

    እግረኞች ከተፈቀዱ ሟቋረጫዎች ውጭ በባቡር መስመሮች እየገቡ ባቡሩ ከአንድ ጣቢያ ወደ ሌላኛው መድረስ ያለበትን ጊዜ እያራዘሙበት መሆኑንም ተናግረዋል።

    ችግሩን ለመፍታት ሁሉም የሚመለከተው አካል በቅንጅት እንዲሰራም ጥሪ አቅርበዋል።

    ከዚህ በተጨማሪ ከወልድያ ሀራ ገበያ መቀሌ የባቡር ፕሮጀክት በወሰን ማስከበርና በውጭ ምንዛሬ እጥረት በታቀደው መልኩ ሊሰራ እንዳልተቻለም ገልፀዋል።

    ኮርፖሬሽኑ በግማሽ ዓመቱ 12 ቢሊዮን ብር ከአገር ውስጥ ባንክ ለመበደር ቢያቅድም ማግኘት የቻለው 4 ቢሊዮን ብር መሆኑን የተናገሩት ዶክተር ብርሃኑ፤ ይህም እየተገነቡ ያሉ የባቡር ፕሮጀክቶች አፈፃፀም እንዲጓተት ማድረጉን ገልፀዋል።

    የመንግስት የልማት ድርጅቶች ቋሚ ኮሚቴ በበኩሉ ኮርፖሬሽኑ ለሚያነሳቸው ችግሮች አስቀድሞ የድጋፍ ጥያቄ እንዳልቀረበለት ገልጿል።

    የቋሚ ኮሚቴው ምክትል ሰብሳቢ አቶ ተክሌ ተሰማ እንደተናገሩት፤ ምክር ቤቱ በቀጣይ የተገለፁ ችግሮችን ለመፍታት ከኮርፖሬሽኑ ጋር በቅንጅት ይሰራል።

    ኮርፖሬሽኑ በአዲስ አበባ ቀላል ባቡር የሚስተዋሉ የእግረኞች አጠቃቀም ችግርን ለመቅረፍ ተከታታይ የግንዛቤ ማስጨበጫ ስራዎችን መስራት እንዳለበትም አሳስበዋል።

    ምንጭ:- ኤፍ ቢ ሲ(FBC)

    Read more
  • የአፍሪካ ህብረት ትራምፕ የአፍሪካ አገራትን ለገለፁበት ዘረኛና ፀያፍ አነጋገር ይቅርታ እንዲጠይቁ ይፈልጋል - Donald Trump Must Apologise for "Shithole" Comments on African Countries - African Union

               

     

     

     

     

     

     

    የአፍሪካ ህብረት የአሜሪካው ፕሬዚዳንት ዶናልድ ትራምፕ የአህጉሪቱን አገራት ለገለፁበት ፀያፍ ንግግር በይፋ ይቅርታ እንዲጠይቁ እያሳሰበ ነው።

    ባለፈው ሀሙስ ፕሬዚዳንቱ በዋይት ሀውስ ስደተኞችን አስመልክቶ በተደረገ ውይይት ላይ አገራቸው ተቀብላ የምታኖራቸው ስደተኞች በተለይም ለጥቁር ስደተኛ አገራት “እጅግ ቆሻሻ” የሚል ስያሜን የሰጠ ንግግር አድርገዋል።

    በተለይም ከሄይቲ ጋር ተሳስሮ ቀረበ የተባለውን አገላለፅ ፕሬዚዳንቱ አልተናገርኩም ሲሉ አስተባብለዋል።

    ፕሬዚዳንት ትራምፕ በዚህ ንግግራቸው ላይ “ዩናይትድ ስቴትስ በተፈጥሮ አደጋ ከተጎዱ፣ በጦርነት እና በበሽታ ወረርሽኝ ውስጥ ካሉ አገራት ለሚመጡ ስደተኞች ጊዜያዊ የመኖሪያ ፈቃድ ከምትሰጥ ኖርዌይን ከመሰሉ አገራት የሚመጡ ስደተኞችን ብትቀበል ይሻላል” ሲሉ ተደምጠዋል።

    ትራምፕ በንግግራቸው “ከእነዚህ ቆሻሻ አገራት ስደተኞችን ለምን እንቀበላለን” የሚልም ንግግር አውጥተዋል ነው የተባለው።

    የአፍሪካ ህብረት ባወጣው መግለጫ ይህ የትራምፕ ንግግር “አስደንጋጭ እና የሚያስቆጣ” ነው ብሏል።

    ህብረቱ ለዚህ ንግግራቸውም ፕሬዚዳንቱ ይቅርታ እንዲጠይቁ ይፈልጋል።

    አሁን ላይ ያለው የአሜሪካ አስተዳደር አፍሪካን የተገነዘበበት መንገድ ችግር ያለበት መሆኑንም ነው የህብረቱ መግለጫ ያመለከተው።

    በመሆኑም ከዚህ አስተዳደር ጋር የአፍሪካ አገራት መነጋገር አለባቸው ብሏል።

    ምንጭ: ቢቢሲ

    Read more
  • ፌስቡክ በመረጃ ፍሰት ላይ ማሻሻያ ሊያደርግ ነው - Facebook Plans Major Changes to News Feed

                                                                 

    ፌስቡክ የዜና መረጃዎችን የሚሰጥበትን አካሄድ በማሻሻል ከንግድ ድርጅቶች፣ ከተቋማትና ከመገናኛ ብዙሃን ለሚመጡ መረጃዎች የሚሰጠውን ትኩረት ዝቅ ሊያደርግ ነው።

    የፌስቡክ ዋና ሥራ አስፈጻሚ ማርክ ዙከርበርግ በገጹ ላይ እንዳስነበበው በቤተሰብ እና በጓደኛሞች መካከል ውይይት ለሚፈጥሩ ይዘቶች ከፍተኛ ትኩረት ይሰጣል።

    ፌስቡክን የሚጠቀሙ ድርጅቶች የሚለቋቸው መረጃዎች ያላቸው ተደራሽነት በዚህ ምክንያት እንደሚቀንስ ፌስቡክ አስታውቋል።

    ይህ ለውጥ በመጪዎቹ ሳምንታት ተግባራዊ ይደረጋል።

    "የንግድ ድርጅቶች፣ መገናኛ ብዙሃን እና ሌሎች ተቋማት የሚያወጧቸው መረጃዎች የግል መረጃዎችን በማሳነስ የግለሰቦችን የፌስቡክ ገጽ እየሞሉት ነው፤ የሚል አስተያየት ከተጠቃሚዎች ስለደረስን ነው ግለሰቦች ብዙ ትስስር እንዲኖራቸው ለመስራት የወሰነው" ሲል ዙከርበርግ ጽፏል።

    ከመሰል ድርጅቶች የሚመጡ ይዘቶች እንዲተዋወቁ የሚፈለግ ከሆነም ህብረተሰቡን የሚያወያዩ ሊሆኑ ይገባል ሲል ይገልጻል።

    ውይይት የሚያጭሩ የቀጥታ የፌስቡክ ስርጭቶች እንደምሳሌ ተጠቅሰዋል።

    "ይህንን ለውጥ በማድረግ ሰዎች ፌስቡክ ላይ የሚቆዩበት ጊዜ እና አንዳንድ የተሳትፎ መለኪያዎች እንደሚቀንሱ እጠብቃለሁ" ብሏል።

    "ሆኖም በፌስቡክ ላይ የምታሳልፉት ጊዜ የበለጠ ውጤታማ ይሆናል" ሲል ዙከርበርግ አስታውቋል።

                                                                           

    እ.አ.አ. በ2018 ፌስቡክን "በመጠገን" ተጠቃሚዎችን ከጥቃት ለመጠበቅ እና በገጹ ላይ የሚኖራቸውን ቆይታ ውጤታማ ለማድረግ እንደሚሰራ ቀደም ሲል ዙከርበርግ አስታውቆ ነበር።

    ፌስቡክን ከአንዳንድ ሃገራት እንደሚጠብቅም ቃል ገብቶ ነበር።

    ጥናቶች እንደሚያሳዩት ሩሲያን ጨምሮ አንዳንድ አካላት በማህበራዊ ሚዲያ ላይ ያሉትን ይዘቶች ለመቀየር ሞክረዋ።

    የሃርቫርድ ዩኒቨርሲቲ ባልደረባ ሆኑት ላውራ ሃዛርድ ኦዌን "በጣም ጠቃሚ ለውጥ ነው" ብለዋል።

    "አታሚዎች ላይ ይበልጥ ተጽዕኖ ይኖረዋል። በገጻችን ላይ የምንመለከታቸው ዜናዎች ቁጥር አነስተኛ ነው የሚሆነው" ብለዋል።

    ሆኖም ፌስቡክ የትኛዎቹን መረጃዎች ቅድሚያ በመስጠት ለመልቀቅ ዝግጁ እንደሆነ ግልጽ አይደለም ሲሉ ገልጸዋል።

    ምንጭ: ቢቢሲ

    Read more
  • ዓለም አቀፍ ጉዲፈቻን ማገድ አዋጭ ነው? - Is Child Detention Better Solution?

                                                                           

    የህዝብ ተወካዮች ምክር ቤት ከቀናት በፊት የውጭ ጉዲፈቻን የሚያግድ አዋጅ አፅድቋል። የአዋጁን መፅደቅ ተከትሎ ቀጣዩ እርምጃ ምን ይሆናል? እገዳውስ የሚያዋጣ አካሄድ ነው ወይ? የሚሉ ጥያቄዎች ተነስተዋል።

    ከዚህ ውሳኔ ላይ የተደረሰው በጉዲፈቻ ወደ ተለያዩ አገራት የሚሄዱ ህፃናት ለማንነት ቀውስና ለተለያዩ ጉዳቶች እየተጋለጡ በመሆናቸው እንደሆነ መንግሥት ገልጿል።

    ችግሩ በጉዲፈቻ ወደ ውጭ አገራት ከሄዱ በኋላ የህፃናቱ ለማንነት ቀውስ መጋለጥ ብቻም ሳይሆን የሚሄዱበት መንገድም በብዙ ችግሮች የተሞላ መሆኑ ነው።

    የውጭ አገር ጉዲፈቻ ለብዙ ተቋማትና ግለሰቦች ትልቅ የገቢ ምንጭ ሆኖ ነበር። ልጆች የተሻለ ህይወት ይኖራቸዋል በሚል የሀሰት ተስፋ ወላጆችን አታሎ ህፃናትን በጉዲፈቻ መላክን ሥራቸው ያደረጉ ደላሎችና ኤጀንሲዎችም በርካታ ነበሩ።

    ልጆቻቸውን ወደ ውጭ ለመላክ የተሰለፉ ወላጆችም ነበሩ።

    በዚህ መልኩ ከኢትዮጵያ ይወሰዱ የነበሩ ህፃናት ቁጥር በከፍተኛ ሁኔታ ጨምሮ ነበር። በአንድ ወቅት በአጠቃላይ በዓለም አቀፍ ደረጃ በጉዲፈቻ ከሚሄዱ ህፃናት አንድ አራተኛ የሚሆኑት ከኢትዮጵያ የሚወሰዱ እንደነበሩ መረጃዎች ያሳያሉ።

    ብዙዎች ለትርፍ ተሰማርተውበት የነበረው ይህ የኢትዮጵያ ዓለም አቀፍ ጉዲፈቻ የተለያዩ የውጪ መገናኛ ብዙሃንን ትኩረትም ስቦ ነበር።

    ህገ-ወጥና ህጋዊ አሰራሮች ተደበላልቀው ህፃናት በገፍ ወደ ውጭ ሃገር የመላካቸው ነገር 'የኢትዮጵያ አዲሱ የወጪ ንግድ ዘርፍ' እስከመባል ደርሶ እንደነበርም ይታወሳል።

    ከዓመታት በፊትም መንግሥት የውጭ አገር ጉዲፈቻን 90 በመቶ እንደሚቀንስ አስታውቆ ነበር። በአሜሪካ አሳዳጊዎች ተወስዳ በረሃብና በስቃይ የሞተችው የ13 ዓመቷ ሃና አለሙ ታሪክ ደግሞ የውጭ ጉዲፈቻ በምን ያህል ደረጃ ህፃናትን ለስቃይ እየዳረገ እንደሆነ ማሳያ ሆነ።

    ይህን ተከትሎም መንግሥት በርካታ የጉዲፈቻ ኤጀንሲዎችን ዘጋ። ከዓመታት በኋላም አሁን የፀደቀው የክልከላ አዋጅ ረቂቅም መጣ።

    ቢሆንም ግን በጉዲፈቻ ወደ ውጭ የሚሄዱ ህፃናት ሁሉ ለችግር ይጋለጣሉ ማለት አይቻልም። ይልቁንም የተሻለ ህይወትና እድል የሚያጋጥማቸው በርካቶች ናቸው።

    የአገር ውስጥ ጉዲፈቻ

    ሦስት ልጆች ወልደዋል። ነገር ግን ከአስራ ሦስት አመታት በፊት መንገድ ላይ ያገኟትን የአራት ቀን ህፃን አራተኛ ልጃቸው አድርገው እያሳደጉ ነው። ይህች ልጃቸው ስለማንነቷ የምታውቀው ነገር ስለሌለ ስማቸው እንዲጠቀስ አልፈለጉም። በወቅቱ የህፃኗ እናት በተወሰነ መልኩ አዕምሮዋ ትክክል ስላልነበር ህፃኗን ትቶ ማለፍ አልቻሉም።

    "ህፃኗን በዚያ ሁኔት ብንተዋት በጥቂት ቀን ውስጥ ትሞት ነበር" ይላሉ።

    ኢትዮጵያ ውስጥ የትም ቦታ ቢኬድ ችግረኛ ህፃናት አሉ። ጥሩ ኑሮ ያላቸው በርካታ ሰዎች ግን ምናልባትም እነዚህን ህፃናት አንድ ጊዜ መርዳት እንጂ ወስደው እንደማያሳድጉ ይናገራሉ። ይህ የእሳቸው አስተያየት ብቻም ሳይሆን ብዙዎች የሚስማሙበት ነው።

    "ምንም እንኳን ጉዲፈቻ ከጥንት ባህላችን ነው ቢባልም፤ ሁሉ የሞላላቸው እንኳ ልጅ ሲያሳድጉ አይታይም" በማለት ያስረግጣሉ።በጉዲፈቻ ልጅ የሚያሳድግ የሚያውቁት አንድ ሰው ብቻ እንደሆነም ይናገራሉ።

    መንገድ ላይ ያገኟትን ህፃን በጉዲፈቻ ለማሳደግ ያለፉበት የህግ ሂደት ቀና የነበረ ቢሆንም መንግሥት የአገር ውጥ ጉዲፈቻን በሚገባ አስተዋውቆታል ብለው ግን አያምኑም።

    "በስፋት ካልተዋወቀ የአገር ውስጥ ጉዲፈቻ አለ ቢባል ምን ይጠቅማለ? ማነው ስለዚህ የሚያውቀው?" ሲሉም ይጠይቃሉ።መንግሥት ከዓመታት በፊት ጀምሮ መስፋፋት ያለበት የአገር ውጥ ጉዲፈቻ ነው፤ በዚህ ረገድም የግንዛቤ መፍጠር ስራ እየሰራሁ ነው ቢልም ዛሬም እንደ እሳቸው ተመሳሳይ ጥያቄ የሚያነሱ ብዙዎች ናቸው።

    ብዙዎቹ የጉዲፈቻ ኤጀንሲዎች በመዘጋታቸው ደስተኛ ቢሆኑም፤ መንግሥት ሙሉ ለሙሉ የውጪ ጉዲፈቻን እንዲቀር ማድረጉ ላይ ግን አይስማሙም።

                                                                      

    ጊዜው አሁን ነው?

    ችግር ላይ ያሉ ህፃናትን ለመርዳት የውጭ አገር ጉዲፈቻ የመጨረሻው የማራጭ እንደሆነ መንግሥት ሁሌም ቢናገርም በውጭ ጉዲፈቻ የሄዱ ህፃናት ቁጥር ደግሞ የሚናገረው ተቃራኒውን ነው።

    በህፃናትና ሴቶች ጉዳይ ሚኒስቴር የህግ ክፍል ሃላፊ የሆኑት አቶ ደረጀ ተክይበሉ የአገሪቱን የህፃናት ፖሊሲ በመጥቀስ፤ ቀጣዩ የአገር ውስጥ ጉዲፈቻ እረምጃ የሚያተኩረው የማህበረሰብ ድጋፍ፣ የአገር ውስጥ ጊዲፈቻና የአደራ ቤተሰብ ላይ መሆኑን ይናገራሉ።

    ከተቻለ ልጆች በቅርብ ዘመዶቻቸው ባሉበትና በሚያውቁት ማህበረሰብ እንዲያድጉ ይደረጋል። ይህ ካልሆነ በአገር ውስጥ ጉዲፈቻ እንዲያድጉ ይመቻቻል። በአገር ውስጥ ተቋም (በህፃናት ማሳደጊያ) እንዲያድጉ ማድረግ ደግሞ የመጨረሻው አማራጭ ነው።

    ቀደም ሲል በህጋዊና ህጋዊ ባልሆነ መንገድም ወደ ውጭ ይሄዱ የነበሩ ህፃናት ቁጥር ከፍተኛ የነበረ ቢሆንም በተለይም ከ2007 ዓ.ም ወዲህ በዓመት ከአራት መቶ የሚበልጥ እንዳልሆነ አቶ ደረጀ ገልፀዋል።

    በሌላ በኩል ክልሎች ቁጥሩን በመቀነስ ቀድመው የውጭ ጉዲፈቻን ማቆማቸውንም ይናገራሉ። "ከህብረተሰቡ ግንዛቤ፣ ልጆች ለመውሰድ ከሚመዘገቡ ወላጆች ቁጥር አንፃርም የውጭ ጉዲፈቻን አቁሞ በዚያ ሲሄዱ የነበሩ ሦስትና አራት መቶ ልጆችን አገር ውስጥ ማስቀረት ቀላል ነው" ይላሉ አቶ ደረጀ።

    ለችግር የተጋለጡ ህፃናት ቁጥር ከፍተኛ ከመሆኑ አንፃር ችግሩን በአገር ውስጥ አማራጭ ብቻ መፍታት አይቻልም የሚል አስተያየት ያላቸውም አሉ።

    ከዚህ ባለፈም ውሳኔው የህፃናትን በተሻለ ሁኔታ የማደግ መብትን የሚጋፋ ነው የሚል ሃሳብ ያላቸው አልታጡም።አቶ ደረጀ ደግሞ የአገሪቱ ህግ (የቤተሰብ ህግ) ዓለም አቀፍ ጉዲፈቻን የመጨረሻ አማራጭ አድርጎ ስለሚመለከት ውሳኔው ትክክል መሆኑን አስረግጠው ይናገራሉ።

    "ህጉ ታሳቢ የሚያደርገው የህፃናት ጥቅምና ደህንነት ማስቀደምን ነው። ህፃናት ደግሞ በአገራቸው፣ በባህላቻውና በሚያውቁት ማህበረሰብ ውስጥ ማደጋቸው ነው ጠቃሚ ተደርጎ የሚታሰበው።"

    ህፃናትን በአገር ውስጥ ለማሳደግ የተመዘገቡ ወላጆች ቁጥር ከፍተኛ በመሆኑ በአገር ውስጥ ጉዲፈቻ መተማመን እንደሚቻልም አቶ ደረጀ ያስረግጣሉ።

    አቶ ደረጀ እንደሚያስታውሱት በ2001 እና 2002 ዓ.ም ላይ በዓመት አምስት ሺህ የሚሆኑ ህፃናት ወደ ውጪ ይሄዱ ነበር። ባለፉት ሦስት ዓመታት ደግሞ ቁጥሩ ወደ ሦስትና አራት መቶ ወርዷል።

    በአንፃሩ የአገር ውስጥ ጉዲፈቻስ ባለፉት ዓመታት እየጨመረ ነው? የሚል ጥያቄ ለአቶ ደረጀ ቀርቦላቸው የነበር ቢሆንም መረጃው ከክልሎች ያልተሰበሰበ በመሆኑ ለጥያቄው መልስ ማግኘት አልተቻለም።

    መዝጋት ወይስ ቁጥጥር ማድረግ?

    በአገሪቱ ለችግር የተጋለጡ ህፃናት ቁጥር ከፍተኛ ከመሆኑ አንፃር ችግሩን በአገር ውስጥ አማራጮች ብቻ መፍታት አዋጭ እንዳልሆነ የአዲስ አበባ ዩኒቨርሲቲ ሶሻልወርክ ትምህርት ክፍል ሃላፊ ዶ/ር አሸናፊ ሃጎስ ይናገራሉ።

    ይልቁንም ለእርሳቸው እርምጃው መንግሥት በአቅም ውስንነት ወይም ባለመቻል ከቁጥጥሩ ውጭ የሆነበትን የውጭ ጉዲፈቻ ለማቆም የወሰደው ነው።

    ስለዚህም የህፃናት ደህንነትና ጥቅምን የሚያረጋግጥ ቁጥጥር ማድረግ ወይስ ሙሉ በሙሉ መዝጋት ያስኬዳል? ሲሉ ይጠይቃሉ።

    "ለችግሩ መፍትሄ መሆን ያለበት የውጪ ጉዲፈቻን መዝጋት ነው የሚለው አያስማማኝም። ተገቢ ቁጥጥር ማድረግ የሚያስችል ስትራቴጂ መንደፍ ነው ትክክለኛው ነገር።"

    በአገሪቱ ለችግር የተጋለጡ ህፃናት ቁጥር ከፍተኛ ሲሆን በተቃራኒው በአገር ውስጥ ልጆችን ወስዶ የማሳደግ ልምድ እምብዛም እንደሆነ የሚያመለክቱ ጥናቶች መኖራቸውን ዶ/ር አሸናፊ ይናገራሉ።

    ከዘህ በመነሳት ይህን ከፍተኛ ቁጥር በአገር ውስጥ ጉዲፈቻ ለመሸፈን ማሰብ "ደፍሬ ልበለው በህፃናት ላይ መፍረድ ነው" ይላሉ።

    ምንጭ: ቢቢሲ

     

     

    Read more
  • በመዲናዋ በተንቀሳቃሽ ቄራ የእርድ አገልግሎት ሊጀመር ነው - Mobile Slaughtering Service is Going to Start in Addis Abeba

                                                            

    በአዲስ አበባ በተንቀሳቃሽ ቄራ የእርድ አገልግሎት ሊጀምር መሆኑን የከተማዋ ቄራዎች ድርጅት አስታወቀ።

    በተለይም በበዓላት ወቅት በከተማዋ የተለያዩ አካባቢዎች ሕገ-ወጥ የእንስሳት እርድ እየተባባሰ በመምጣቱ ንጽህናውን ባልጠበቀ ስጋ እና በአካባቢ ብክለት ምክንያት ነዋሪዎች ለተለያዩ ህመሞች ይጋለጣሉ።

    ህብረተሰቡ የሚመገበውን ስጋ ከጤናማ እንስሳት የተገኘ መሆኑን የሚያረጋግጥበት መንገድ ባለመዘርጋቱ፣ የቄራዎች ድርጅት ተደራሽ አለመሆንና በአመለካከት ጉድለት ሳቢያ በህገ ወጥ እርድ የሚገኝ ስጋን ለመመገብ ምክንያቶች ናቸው።

    ከድርጅቱ የተገኘው መረጃ እንደሚያሳየው፥ በአዲስ አበባ እርድ በብዛት በሚፈጸምባቸውን በዓላት ብቻ ከ20 ሺህ በላይ ከብቶች በሕገ-ወጥ መንገድ ይታረዳሉ።

    በሕገ-ወጥ እርድ ምክንያት መንግሥት ማግኘት ከሚገባው ገቢ ከግማሽ ቢሊየን ብር በላይ እንደሚያጣም ተጠቅሷል። 

    ይህን የተረዳው የአዲስ አበባ ቄራዎች ድርጅት በማዕከል ከሚዘጋጅ የስጋ ማዕከል በተጨማሪ በከተማዋ የተለያዩ አካባቢዎች በመዟዟር አገልግሎቱን ሊጀምር መሆኑን አስታውቋል፡፡ 

    የአዲስ አበባ ቄራዎች ድርጅት ዋና ሥራ አስኪያጅ አቶ ንብረት በቃ እንደገለጹት፥ ድርጅቱ የእርድ አገልግሎቱን ሕዝቡ በሚፈልገው ደረጃ ተደራሽ ከማድረግ አኳያ ውስንነቶች ይስተዋላሉ። 

    በመሆኑም ተንቀሳቃሽ ቄራው የእርድ አገልግሎት መስጠት ሲጀምር ሕገ ወጥ እርድን ከመከላከል ባለፈ ጤንነቱ የተጠበቀ ሥጋ ለሕብረተሰቡ ማድረስ ያስችላል ብለዋል።

    አገልግሎቱን ለመጀመር ድርጅቱ ከሣይንስ እና ቴክኖሎጂ ሚኒስቴር ጋር በመተባበር ጥናቶችን እያካሄደ መሆኑን ገልጸዋል።

    አገልግሎቱ በርካታ ሕዝብ በሚገኝባቸው በጋራ መኖሪያ ቤቶች አካባቢ ላይ የሚከናወን መሆኑ ሕብረተሰቡን ተደራሽና ተጠቃሚ በማድረግ በተለይም በበዓላት ወቅት የሚፈጸሙ ሕገ-ወጥ እርድን ለመከላከል ይረዳል ነው ያሉት።

    እንደ አቶ ንብረት ገለጻ ከሆነ፥ የእርድ አገልግሎት የሚሰጠው ተንቀሳቃሽ ቄራው ዘመናዊ ቴክኖሎጂዎችን የያዘ ሲሆን፤ አስፈላጊ ነገሮችን በማሟላት በሚቀጥለው ዓመት አገልግሎት መስጠቱን ይጀምራል ብለዋል። 

    የተንቀሰቃሽ ቄራዎች ቴክኖሎጂ እንደ አሜሪካ፣ ቻይና፣ አውስትራሊያና ካናዳ ባሉ የበለፀጉ ሀገራት በስፋት አገልግሎት እንደሚሰጥ መረጃዎች ያመለክታሉ።

    ምንጭ:- ኤፍ ቢ ሲ(FBC)

    Read more
  • NEWS: ኢትዮጵያ የውጭ ሃገር ጉዲፈቻን አገደች - Ethiopia Bans Foreign Adoptions

                                                                                

    ህፃናት ጥቃት እና መገለል ይደርስባቸዋል በሚል ፍራቻ ኢትዮጵያ ወደ ውጭ ሃገር የሚደረግን ጉዲፈቻን በሕግ ከለከለች።

    በዓለም አቀፍ ደረጃ በአሜሪካዊያን በጉዲፈቻ ህጻናት ከሚወስዱባቸው ሃገራት ኢትዮጵያ ተጠቃሽ ናት። አሜሪካዊያን በጉዲፈቻ ከተለያዩ ሃገራት ከሚወስዷቸው ህጻናት 20 በመቶ የሚሆኑትን ከኢትዮጵያ ነው የሚወስዱት።

    ብራድ ፒት እና አንጀሊና ጆሊ በጉዲፈቻ ልጅ ከኢትዮጵያ ከወሰዱ ታዋቂ አሜሪካዊያን መካከል ተጠቃሾች ናቸው።

    እ.አ.አ በ2013 አሜሪካዊያን ጥንዶች ከኢትዮጵያ የወሰዷትን ልጅ ገድለዋል በሚል ጥፋተኛ ተብለዋል።

    ይህም ወደ ውጭ በጉዲፈቻ በሚላኩ ህፃናት ዙሪያ ክርክር እንዲፈጠር ምክንያት ሆኗል።

    በኢትዮጵያ ያለው የጉዲፈቻ አካሄድም ቢሆን ከመብት ተሟጋቾች ብዙ ጥያቄዎች ሲያስነሳበት ቆይቷል። ሕገ-ወጥ የሰው አዘዋዋሪዎች ይህንን ተጠቅመው ትልቅ ገቢ እያገኙበት ነው ይላሉ።

    ከሁለት ዓመት በፊት ዴንማርክ ህፃናትን በጉዲፈቻ ከኢትዮጵያ መውሰድን ከልክላለች።

    ህግ አውጪዎች እንደሚሉት አሳዳጊ የሌላቸው እና ለችግር ተጋላጭ ህፃናትን በሃገር ውስጥ በሚገኝ ዘዴ መደገፍ እና መከላከል ያስፈልጋል ብለዋል።

    አንዳንድ የፓርላማ አባላት ግን ወላጆቻቸውን ያጡና ለችግር ተጋላጭ የሆኑ ህፃናትን ለመርዳት ሃገሪቱ በቂ ተቋማት የላትም ብለዋል።

    እ.አ.አ ከ1999 ወዲህ ከ15 ሺህ በላይ ኢትዮጵያዊያን ህጻናት በጉዲፈቻ ወደ አሜሪካ አቅንተዋል።

    ብዙዎችም እንደ ፈረንሳይ፣ ስፔን እና ጣሊያን ወዳሉ የአውሮፓ ሃገራት ተወስደዋል።

    ምንጭ: ቢቢሲ

    Read more
  • የዛሬ የዕለተ ረቡዕ የጥር 2 ቀን 2010 የሸገር ወሬዎች - Today Jan, 10 2018 Sheger FM Radio News

                                                                                      

    ከዓሣና ከዶሮ ቆዳ የተለያዩ ምርቶችን ሰርቷል የተባለው የደብረ ብርሃን ቆዳ ፋብሪካ የዓሣ ቆዳ እየባከነ መሆኑን ተናገረ፡፡ (ወንድሙ ሀይሉ)

    በገንዘብ እጥረት የተነሳ የአዋሽ ወንዝን ከስጋት መታደግ አልተቻለም ተባለ፡፡ (ዮሐንስ የኋላወርቅ)

    በባህል ዕቃ መሸጫ ሱቆች ውስጥ የሚሸጡ የሰዕሊያን ኮፒ ስራዎች ባለሙያው ተገቢውን ጥቅም እንዳያገኝ እያደረጉ ነው ተባለ፡፡ (ቴዎድሮስ ብርሃኑ)

    የፍትህ አካላት ማሰልጠኛ ማዕከልና የፍትህ ሥርዓት ምርምር ኢንስቲትዩት ተዋሃዱ፡፡ (ትዕግስት ዘሪሁን)

    የአየር ንብረት ለውጥ ተፅዕኖን ለመቀነስ የሚያስችል የተፋሰስ ስራ ተጀመረ፡፡ (ወንድሙ ሀይሉ)

    ለ41 የውሃ መስመሮች አዲስ የኤሌክትሪክ ግንባታ ሊከናወን ነው፡፡ (ወንድሙ ሀይሉ)

    በኢትዮጵያ አስቸኳይ ክትባት የሚያስፈልጋቸው የእንስሳት በሽታዎች ተለይተዋል፡፡ አንድ መቶ አስራ ሰባት ሚሊዮን ክትባቶች ተሰራጭተዋል፡፡ (ወንድሙ ሀይሉ)

    የብሔራዊ ፀጥታው ምክር ቤት ዛሬ መግለጫ ሰጥቷል፡፡ መግለጫ የሰጡት የምክር ቤቱ ሰብሳቢ አቶ ሲራጅ ፈርጌሳ ናቸው፡፡ (የኔነህ ሲሳይ)

    በተለያዩ ፕሮጀክቶቻቸው የተራረፉና የማይጠቀሙባቸውን ቁርጥራጭ ብረቶች በሽያጭ በማስወገድና መልሰው ለመንግስት ሀብት በማድረግ ኢትዮ ቴሌኮምና መብራት ሀይል የተሻለ አፈፃፀም አላቸው ተባለ፡፡ የስኳር ፋብሪካዎች ላይ ግን እስካሁን ችግር መኖሩን ተቆጣጣሪ መስሪያ ቤቱ ተናግሯል፡፡ (ትዕግስት ዘሪሁን)

     

    ምንጭ:- የሸገር FM 102.1 ሬዲዮ

     

    Read more