NEWS: በመዲናዋ የበዓል ገበያው ተመጣጣኝ በሚባል መልኩ እየተካሄደ መሆኑን ነዋሪዎች ገለጹ

                                     

የ2010 አዲስ አመትን አስመልክቶ በየአካባቢው ያሉ የገበያ ስፍራዎች ሞቅ ደመቅ ብለው ከርመዋል።

በመዲናዋ የተለያዩ ስፍራዎች እየተካሄደ ያለው የበዓል ገበያ ለበዓሉ አስፈላጊ ግብይቶች የሚካሄድበት መሆኑን ለግብይት የወጡ የከተማዋ ነዋሪዎች ይናገራሉ።

ነዋሪዎቹ እንደሚሉት የዘንድሮው የበዓል ገበያ በአብዛኛው ተመጣጣኝ በሚባል መልኩ እየተካሄደ ነው።

በተለያዩ ስፍራዎች ያለው የዶሮ ዋጋም እንደ ዶሮዎቹ መጠንና አይነት የሚለያይ ሲሆን፥ አንድ ዶሮ ከ190 ብር ጀምሮ እየተሸጠ መሆኑን ይገልጻሉ። 

ከአምናው ጋር ሲነጻጸር የተወሰነ የዋጋ ጭማሪ ቢያሳይም ዘንድሮ እየተሸጠ ያለበት ዋጋ ጥሩ መሆኑንም ገዥዎች ገልጸውልናል።

እንቁላል በተለያዩ ገበያዎች ከ3 እስከ 4 ብር ድረስ የሚሸጥ ሲሆን፥ ነጭ ሽንኩርት በኪሎ ከ30 ብር ጀምሮ ቀይ ሽንኩርትም በአማካይ ከ9 ብር ጀምሮ በተለያዩ ገበያዎች ውስጥ ዛሬ ሲሸጥ መዋሉን ተመልክተናል።

ሽንኩርት አምና ከነበረት ዋጋ ጋር ሲነጻጸር የተሻለ ዋጋ ያለው መሆኑንም ገዢዎች አንስተዋል።

በአንድ ጭብጥ የሚለካ የጥብስ ቅጠልና ለአንድ ድፎ ዳቦ የሚበቃ የኮባ ቅጠልም በ5 ብርና በ10 ብር በተመለከትናቸው የቄራ፣ የፒያሳና የመርካቶ ገበያዎች ሲሸጡ ውለዋል።

ቅቤም በኪሎ ከ2 መቶ ብር ጀምሮ እየተሸጠ ሲሆን፥ በተለያየ ምክንያት የበዓል ዝግጅት ማድረግ ላልቻለ ሰውም ተዘጋጅተው የሚሸጡና ያለቀላቸው የበዓል ምግቦች በተለያዩ የገበያ ስፍራዎች ቀርበዋል።

የተዘጋጁ ድፎ ዳቦዎች 2 ኪሎ በ70 ብር፣ 3 ኪሎ በ120 ብር ሲሸጥ፥ ለጠላ የሚሆን ተዘጋጅቶ ያለቀለትና ተበጥብጦ ብቻ ለመጠቀም የተዘጋጀ እህል በኪሎ 38 ብር እንዲሁም የተቆላ ገብስም በኪሎ 30 ብር ይሸጣል።

ተጠቃሚዎቹም ይህን መሰል የገበያ አቅርቦት መኖሩ የተጠቃሚዎችን ጊዜ ከመቆጠብ በላይ ኑሮን ቀለል ለማድረግ የሚያግዝ መሆኑን ገልጸዋል።

ከዚህ ባለፈም የገዙትን ዶሮ እዛው አርደውና በልተው የሚያስረክቡ ነጋዴወች መኖራቸውንም በቅኝታችን አረጋግጠናል።

በዚህ ስራ የተሰማሩ ነጋዴዎችም ከራሳቸው ለገዙም ሆነ ከሌላ ቦታ ገዝተው ላመጡት ዶሮ፥ የማረድና የመበለት አገልግሎት በ10 ብር ይሰጣሉ።

 

ምንጭ:- ኤፍ ቢ ሲ(FBC)

 

 

Post your comment

Related Articles