NEWS: በኢራንና ኢራቅ የመሬት መንቀጥቀጥ የ135 ሰዎችን ህይወት ቀጥፏል - 35 People Died in Iran-Iraq Earthquake Tremor

                                                                                                           

በሬክተር ስኬል 7.3 የተመዘገበ የመሬት መንቀጥቀጥ በሰሜናዊ የኢራቅና የኢራን ድንበር አከባቢ ተከስቶ ቢያንስ 135 ሰዎች ሲሞቱ በመቶዎች የሚቆጠሩት ደግሞ ተጎድተዋል።

በኢራን ምዕራባዊ ክርማንሻህ ግዛት ቢያንስ 129 ሰዎች መሞታቸው ባለስልጣናት ለሃገሪቱ መገናኛ ብዙሃን ገልጸዋል።

በኢራቅ ደግሞ ስድስት ሰዎች ህይወታቸው እንዳለፈ ታውቋል። የጉዳቱ መጠን ከፍ ሊል እንዲችል ተገምቷል።

የመሬት መንቀጥቀጡ ከፈጠረው አለመረጋጋት በተጨማሪ ሌላ አደጋ ሊኖር ይችላል በሚል ነዋሪዎች ቤታቸውን ለቀው ወደ መንገዶች እየወጡ ነው።

በኢራቅ ዋና ከተማ የሚገኙ መስጊዶች የጸሎት ስነ-ስርዓት ጀምረዋል።

አብዛኛዎቹ ተጎጂዎች ከድንበር 15 ኪሎ ሜትር ርቃ የምትገኘው የሳርፖል ዛሃብ ከተማ ነዋሪዎች መሆናቸውን የኢራን ድንገተኛ አደጋ ኃላፊ ፒር ሁሴን ኮሊቫነድ ለሃገሪቱ ቴሌዢቭን አስታውቀዋል።

እንደ መገናኛ ብዙሃን ከሆን የከተማዋ ሆስፒታል በአደጋው በመጎዳቱ በመቶዎች ለሚቆጠሩና አደጋ ለደረሰባቸው ሰዎች አገልግሎት ለመስጠት አዳጋች ሆኖበታል።

                                                                   

አደጋው ቢያንስ በስምንት ገጠሮች መከሰቱን የሃገሪቱ ቀይ ጨረቃ ማህበር ኃላፊ ሞርቴዛ ሳሊም አስታውቀዋል።

"አንዳንድ አካባቢዎች የመብራት እና ስልክ አግልግሎታቸው ተቋርጧል" ሲሉም በተጨማሪ ገልጸዋል።

የአደጋ ጊዜ ሰራተኞች ስራቸውን እንዳያከናውኑ የመሬት መንሸራተት ችግር እንደሆነባቸው ኩሊቫንድ አስታውቀዋል።

በኢራቅ በኩል ከባድ አደጋ የተከሰተው በኩርዲስታን ግዛት ከሱላይማኒያህ ከተማ 75 ኪሎ ሜትር ርቃ በምትገኘው ዳርባንዲካን ነው።

"በአካባቢው ያለው ሁኔታ አደገኛ ነው" ሲሉ የኩርድ የጤና ሚንስትር ሬክዋት ሃማ ራሺድ ለሮይተርስ አስታውቀዋል።

እንደ አሜሪካ ጂኦሎጂካል ሰርቬይ ከሆነ የመሬት መንቀጥቀጡ የተከሰተው ከሃላብጃ 30 ኪሎ ሜትር ርቆ በሚገኘው አካባቢ ነው ።

መሬት ውስጥ 33.9 ኪሎሜትር ላይ የተከሰተው የመሬት መንቀጥቀጥ ያስከተለው ንዝረት ቱርክ፣ እስራኤልና ኩዌት ድረስ ተሰምቷል።

ኢራን ለተደጋጋሚ የመሬት መንቀጥቀጥ ተጋላጭ በሆነ አካባቢ ትገኛለች።

ምንጭ: ቢቢሲ

 

Post your comment

Related Articles