Advertisment

NEWS: የአዲስ አበባ ቄራዎች አገልግሎትን ለማዘመን ከ70 ሚሊየን ዩሮ በላይ የብድር ስምምነት ተፈረመ

                                             

የአዲስ አበባ ቄራዎች አገልግሎትን ለማዘመንና ለማስፋፋት የሚያግዝ የ70 ነጥብ 5 ሚሊየን ዩሮ ብድር ስምምነትተፈርሟል።

ስምምነቱን የገንዘብና ኢኮኖሚ ትብብር ሚኒስቴር እና ፈረንሳዩ የልማት ተራዕዶ ድርጅት በኢትዮጵያ ናቸው የተፈራረሙት።

በከተማዋ እያደገ የመጣውን የቄራዎች ፍላጎት በጥራትና የአካባቢ ተጽዕኖ በማያስከትል መልኩ የሚያቀርቡ ቄራዎች አናሳ በመሆናቸው አገልግሎቱን ለማዘመንና ለማስፋፋት ስምምነቱ መፈረሙ ተጠቅሷል።

ስምምነቱን የተፈራረሙት የገንዘብና ኢኮኖሚ ትብብር ሚኒስቴር ዲኤታ አቶ አድማሱ ነበበ እንደገለፁት፥ የሁለቱ ሀገራት ወዳጅነት ከአንድ ክፍለ ዘመን በላይ የዘለቀ ነው።

በመሆኑም "ዛሬ የተፈረመው የብድር ስምምነት የሁለቱን ሀገራት ትብብር የሚያጠናክር ነው" ያሉት ሚኒስቴር ዲኤታው፥ በተለይም በከተማዋ መሰረተ ልማት ግንባታና ለነዋሪዎቿ የዘመነ አገልገሎት ለማቅረብ የሚከናወነውን ሥራ ይደግፋል ብለዋል።

የብድር ስምምነቱ የአዲስ አበባ ቄራዎች አገልግሎትን ለማዘምንና ለማስፋፋት በተያዘው ፕሮጀክት ጥራቱን የጠበቀ የእርድ አገልግሎት በማከናወን የስጋ ውጤቶችን ለሀገር ውስጥና ለውጭ ገበያ ለማቅረብ እንደሚያስችል ገልፀዋል።

በኢትዮጵያ የፈረንሳይ አምባሳደር ፍሬድሪክ ቦንቲምስ በበኩላቸው፥ እያደገ የመጣውን የአዲስ አበባ ከተማ የቄራዎች ፍላጎትና አቅርቦት ለማጣጣም የአዳዲሰ ቄራዎች ግንባታና ማስፋፋያ አስፈላጊ መሆኑን ገልፀዋል።

በመሆኑም በአዳዲስና በማስፋፊያ ቄራዎች ፕሮጀክት የአዲስ አበባ ቄራዎች ድርጅት የአሁንና የወደፊት የከተማውን የሥጋ አቅርቦት ፍላጎት ከማርካት ባለፈ ለውጭ ገበያ በማቅረብ ትርፋማ እንዲሆን ያስችለዋል ነው ያሉት አምባሳደሩ።

በሥጋ አቅርቦትና በቆዳ ጥራትም ደረጃውን የጠበቀ ምርት ለማቅረብ እንደሚያስችል ተናግረዋል።

ፕሮጀክቱ በፈረንጆቹ በ2022 ተጠናቆ ሥራ ሲጀምር በዓመት ከ800 ሺህ በላይ እንስሳትን ለእርድ በማቅረብ ከ60 በመቶ በላይ የሚሆነውን የከተማዋን የሥጋ ተጠቃሚዎች ፍላጎት ማርካት እንደሚችል ተገልጿል።

ምንጭ:- ኤፍ ቢ ሲ(FBC)

Post your comment

Advertisment
Advertisment