PLANET  ETHIOPIA.com

News


  • በሚሊዮን የሚቆጠሩ የመድሃኒት ስህተቶች እየተፈጠሩ ነው

     

                          

    በሚሊዮን የሚቆጠሩ የመድሃኒት ስህተቶች እየተፈጠሩ መሆኑን አንድ ጥናት አስታወቀ።

    በጥናቱ መሰረት ከፍተኛ አደጋ እና ሞት እያስከተሉ መሆኑን እንግሊዝ የጤና ሚንስትር ጀርሚ ሃንት ገልጸዋል።

    የጤና ተቋማት በየዓመቱ 237 ሚሊዮን ስህተቶችን እየፈጠሩ ሲሆን ይህም ከሚሰጡ አምስት መድሃኒቶች በአንዱ ስህተት ይፈጠራል እንደማለት ነው።

    እንደጥናቱ ከሆነ ስህተቱ በአብዛኛው ችግር ባይፈጥርም አንድ አራተኛ የሚሆነው ግን አደጋ አስከትሏል።

    ስህተቶቹ ከ22ሺህ በላይ ለሚሆኑ ሞቶችም ምክንያት ሊሆን ይችላል ተብሏል።

    ጥናቱን ያካሄዱት የማንቸስተር፣ የሼፊልድ እና ዮርክ ዩኒቨርሲቲዎች እንዳሉት በጉዳዩ ላይ በቂ መረጃ ባለመኖሩ በቀደምት ጥናቶች ላይ ተመሰረተ ግምት ወስደዋል።

    ሆኖም ማስጠንቀቂያ ለመስጠት በቂ ሆኖ አግኝተውታል።

    ከሚፈጠሩት ስህተቶች መካከል፡

    • የተሳሳተ መድሃኒት መስጠት
    • የተሳሳተ መጠን መስጠት
    • ህክምና ለመስጠት መዘግየት

                        

    አጭር የምስል መግለጫ ሌላ ታካሚ መድሃኒት በስህተት የተሰጣቸው ካትሪን ያንግ እና አናታቸው ኢሪን

    አንድ አምስተኛ የሚሆኑት ስህተቶች ከሆስፒታል እንክብካቤ ጋር የሚያያዙ ሲሆን እንደምሳሌ የተጠቀሰው በቀዶ ህክምና በፊት ከማደንዘዣ ጋር የተገናኘ ስህተት ነው።

    በመድሃኒት ስህተት ችግር ከደረሰባቸው ሰዎች መካከል የካትሪን ያንግ እናት የሆኑት ኢሪን ይገኙበታል።

    የመድሃኒት ማዘዣቸው ከሌላ ሰው ጋር በመቀላቀሉ ምክንያት ለሳምንታት በስህተት ብዙ መድሃኒቶችን ወስደዋል።

    ይህን ተከትሎም በትከሻቸው፣ አንገታቸው እና አይናቸው ላይ ህመም አጋጥሟቸዋል።

    ስህተት መፈጸሙን ህክምና ባለሙያዎች ሊያውቁት አለመቻላቸውን ልጃቸው ገልጸዋል።

    "ምንም የህክምና ትምህርት የሌለኝ ሰው ነኝ ምክንያቱ ምን ሊሆን እንደሚችል ፍንጭ የሰጠሁት" ብለዋል።

    "በጊዜ ችግሩ ላይ ብንደርስበትም ሌሎች በዚህ በኩል እድለኛ አይደሉም" ሲሉ ያንግ አስረድተዋል።

    ችግሩ አሳሳቢ መሆኑን የጠቆሙት ሃንት ችግሩ ዓለም አቀፍ መሆኑን አስታውቀዋል።

    "ከሚታሰበው በላይ ትልቅ ችግር ነው። መከላከል እየተቻለ ግን ፍተና ችግር እና ሞት እያስከተለ ነው።" ብለዋል።

    ስህተቶቹ ላይ ግልጽነት ኖሮ ለወደፊት ትምህርት ሊወሰድባቸው ይገባል ሲሉ አስረድተዋል።

     

    ምንጭ፦ ቢቢሲ

     

     

     

    Read more »

  • ከመስከረም ወር ጀምሮ ህግ የጣሱ አሽክርካሪዎች 7 ነጥብ 5 ሚሊየን ብር ተቀጥተዋል

                                    

    በታሪክ አዱኛ

    በተሻሻለው የአሽከርካሪዎች የአፈጻጸም መመሪያ መሰረት ከመስከረም 2010 ዓ.ም ጀምሮ ህግ የጣሱ አሽክርካሪዎች 7 ነጥብ 5 ሚሊየን ብር ተቀጥተዋል።

    የአዲስ አበባ ትራንስፖርት ባለስልጣን ለፋና ብሮድካስቲንግ ኮርፖሬት እንደገለጸው፥ ከታሪፍ በላይ በማስከፈል፣ መስመር ባለመሸፈን እና አቆራርጦ በመጫን ህገ ወጥ ተግባር የፈጸሙ አሽከርካሪዎች ናቸው በገንዘብ የተቀጡት።

    በመዲናዋ የህብረተሰቡን የትራንስፖርት ችግር ለመቅረፍ የተሰማሩ አሽከርካሪዎች ህግን ተከትለው እንዲያገለግሉ ግንዛቤ የማሳደግ ስራዎች እየተሰሩ ነው ብለዋል፤ የባለስልጣኑ የትራንስፖርት ስምሪት ዳይሬክተር አቶ ጆኒ ተረፈ።

    ይሁን እንጂ ከማስተማር በዘለለ በህገ ወጦች ላይ በተወሰደ የገንዘብ ቅጣት 7 ነጥብ 5 ሚሊየን ብር መሰብሰቡን ነው ዳይሬክተሩ የገለጹት።

    አቶ ጆኒ፥ በሁሉም ቅርጫፎች እንዲሰራጭ በተደረገ የመስመር ታፔላ ሽያጭና ቅየራ አገልግሎትም 3 ነጥብ 8 ሚሊየን ብር ተሰብስቧል ብለዋል።

     

    ምንጭ:- ኤፍ ቢ ሲ(FBC)

     

     

     

     

    Read more »

  • ናሳ ከ6 ነጥብ 2 ቢሊየን ኪሎ ሜትር ርቀት ላይ ፎቶ ማንሳት መቻሉን ገለፀ

                             

    ናሳ ከምድራችን በ6 ነጥብ 2 ቢሊየን ኪሎሜትር ርቀት ላይ የሚገኝን አካል ፎቶ ማንሳቱን አስታወቀ።
    ይህም ከዚህ ቀደም ከተነሳው በስልሳ ሚሊየን ኪሎ ሜትር በመላቅ አዲስ ሪከርድ ሆኖ መመዝገቡን ነው ያመለከተው።
    ድርጅቱ ሐሙስ የለቀቀውንም ተከትሎ ካሜራው በምድራችን ላይ ከሚገኙት ሁሉ የላቀ መሆኑን ገልጿል።
    ፎቶው የተነሳው በታህሳስ ወር ላይ እንደነበረ ተነግሯል።
    ፎቶ ተነሳ የተባለው አካል እጅብ ያሉ “ዊሺንግ ዌል’’ በመባል የሚጠሩ ከዋክብት መሆናቸውን ናሳ አስታውቋል።

     

    ምንጭ:- ኤፍ ቢ ሲ(FBC)

     

     

    Read more »

  • በመዲናዋ ለወጣቶች የስራ እድል ፈጠራ የተመደበው ተዘዋዋሪ ፈንድ በሚፈለገው ጥቅም ላይ እየዋለ አይደለም

                                                                               

    በአዲስ አበባ ለወጣቶች የስራ እድል ፈጠራ የተመደበው ተዘዋዋሪ ፈንድ በሚፈለገው ደረጃ ጥቅም ላይ እየዋለ አለመሆኑን የአዲስ አበባ ጥቃቅንና አነስተኛ ኢንተርፕራይዞች ልማት ቢሮ ገለፀ።

    ከአመት በፊት በሃገር አቀፍ ደረጃ ለወጣቶች የስራ እድል ፈጠራ ከተመደበው 10 በሊየን ብር ተዘዋዋሪ ፈንድ፥ አዲስ አበባም የእድሉ ተጠቃሚ እንድትሆን የ2 ነጥብ አራት ቢሊየን ብር ተዘዋዋሪ ፈንድ ፀድቆላታል። ፈንዱ ጥቅም ላይ መዋል ከጀመረም አንድ አመት አስቆጥሯል።

    በእነዚህ ጊዜያትም ከዚህ ቀደም ስራ ያልነበራቸዉ እና በራሳቸዉ ተንቀሳቅሰው የተሻለ ገቢን ለማግኘት እና ለሌሎችም የስራ እድል ለመፍጠር ፍላጎት ያላቸው ወጣቶች በተለያዩ ዘርፎች በመደራጀት ከፈንዱ ተበድረው ተጠቃሚ ሆነዋል።

    ፋና ብሮድካስቲንግ ኮርፖሬት ባደረገው የመስክ ምልከታ ከዚህ ቀደም ተዘዋዋሪ ፈንዱ ከመቅረቡ በፊት በየክፍለ ከተማቸው ብድር በመውሰድ እየተንቀሳቀሱ የሚገኙና ስራቸዉን ለማሳደግ የፈለጉም ከተዘዋዋሪ ፈንዱ ተጠቃሚ ለመሆን ዝግጅት ላይ የሚገኙ ኢንተርፕራይዞችንም አግኝቷል።

    በሌላ በኩል በተለያዩ የትምህርት ዘርፎች ተመርቀዉ እና የመስራት ፍላጎቱ እያላቸው እድሉን ሳያገኙ ከቤት የዋሉ ወጣቶችም አሉ። 

    በዚህም ከአዲስ አበባ አነስተኛና ጥቃቅን ኢንተርፕራይዞች ልማት ቢሮ ያገኘነው መረጃ እንደሚያሳየው፥ በብድር ገንዘቡ የስራ እድል ለመፍጠር በመጀመሪያ ዙር ለመዲናዋ ከተፈቀደው 419 ሚሊዮን ብር በአንድ አመት ውስጥ ጥቅም ላይ የዋለው 67 ሚሊዮን ብር ብቻ ነው። 

    በብድር ገንዘቡ ተጠቃሚ ለመሆንም 10 ሆኖ መደራጀት እንደ መስፈርት የተቀመጠ ሲሆን፥ ባለፈው አንድ አመት ማደራጀት የተቻለው የኢንተርፕራይዝ ቁጥርም ከ385 አልበለጠም።

    በኢንተርፕራይዙ የስራ እድል ፈጠራ ቡደን መሪ አቶ ነብዩ ውድነህ እንደተናገሩት፥ ከ57 ሺህ በላይ ኢንተርፕራይዞችን ለማደራጀት ከተቀመጠው እቅድ አንፃር ሲታይ አፈፃፀሙ ዝቅተኛ ነው። 

    በተዘዋዋሪ ፈንድ አሰጣጥ ላይ የግንዛቤ እጥረት፣ የወጣቶች ስራ ቅጥር ላይ የማተኮር እና በርካታ የስራ እድል የማይፈጥሩ የስራ መስኮች ላይ ለመሰማራት ያለው ፍላጎት ከፍተኛ መሆኑን ለአፈጻጸሙ ዝቅተኛ መሆን እንደ ምክንያት ይጠቅሳሉ።

    በተጨማሪም ለስራ እድል ፈጠራው ትኩረት በተሰጠው የማምረቻ እና የከተማ ግብርና ላይ ለመሰማራት የወጣቶቹ ፍላጎት አነስተኛ ነው ብለዋል።

    ይህን ችግር ለመፍታትም ከፍተኛ የግንዛቤ ማሳደግ ስራ መሰራት ይኖርበታል ነው ያሉት።

    ለዚህም በዚህ አመት የኢንተርፕራይዞችን ቁጥር ለማሳደግ እንዲቻል ከ30 ሺህ በላይ ወጣቶችን በቤቶች ልማት፣ ከ14 ሺህ በላይ ወጣቶችንም በተለያዩ የማምረቻ ዘርፎች ለማሰማራት ዝግጅት እየተደረገ መሆኑን ሃላፊው ጠቁመዋል።

    ከዚህም ባለፈ በቀጥታ የስራ እድል ፈጠራ እስከ 103 ሺህ ወጣቶች ተጠቃሚ ለማድረግ ከ21 የመንግስት ተቋማት ጋር እየተሰራ ነው ተብሏል።

    የማምረቻ ቦታዎች እጥረትን ለመቅረፍም በዚህ ዓመት ከ700 በላይ የማምረቻ ሼዶች ግምባታ ይከናወናል።

    ምንጭ:- ኤፍ ቢ ሲ(FBC)

     

    Read more »

  • አሜሪካ በሩሲያ ተጨማሪ ማዕቀብ ለመጣል እያሰበች ነው

                                                                                           

    የአሜሪካው ፕሬዚዳንት ዶናልድ ትራምፕ አስተዳደር በሩሲያ ላይ ተጨማሪ ማዕቀብ ለመጣል እያሰበ መሆኑ ተገለፀ።

    የታሰበው ተጨማሪ ማዕቀብ ከሞስኮ የአሜሪካ ፕሬዚዳንታዊ ምርጫ ጣልቃ ገብነት ጋር የተያያዘ ነው ተብሏል።

    አጃንስ ፍራንስ ፕሬስን ዋቢ በማድረግ ፕሬስ ቲቪ እንደዘገበው፥ በመጭው ህዳር ወር 2018 በሚካሄደው የአሜሪካ አጋማሽ ምርጫ የሩሲያን ጣልቃ ገብነት ሊከታተል የሚችል ግብረ ሃይል ተቋቁሟል ነው የተባለው።

    ከ2016ቱ የአሜሪካ ፕሬዚዳንታዊ ምርጫ ጋር ተያይዞ በሮበርት ሚውለር የሚመራው ልዩ ምክር ቤት ማጣራቶችን እያደረገ ይገኛል።

    ምክር ቤቱ በሩሲያ ግለሰቦችና ተቋማት ላይ ከምርጫው ሂደት ጋር ተያይዞ ክስ ማቅረቡን ተከትሎም፥ ፕሬዚዳንት ትራምፕና ተባባሪዎቻቸው ላይ ጫናው እየበረታ ስለመሆኑ ይነገራል።

    በትራምፕ አስተዳደር የታሰበው ማዕቀብ ከምርጫው ጋር ተያይዞ የሩሲያን ተሳትፎ ለመጣራት የሚደረግ ጥረት አንድ አካል መሆኑም ነው የተነገረው።

    አሁን ላይም ፕሬዚዳንት ትራምፕ ሩሲያ ላይ ከፍተኛ ጫና እያደረጉ መሆኑን መረጃዎች ያመላክታሉ።

    አሜሪካ ሩሲያን ከ2016ቱ ፕሬዚዳንታዊ ምርጫ ጋር በተያያዘ ብትወነጅልም ሞስኮ ግን ጉዳዩን አስተበናብላለች።

    የቀረበውን ውንጀላም መሰረተ ቢስ በማለት አጣጥላዋለች።

    ምንጭ:- ኤፍ ቢ ሲ(FBC)

    Read more »

  • እስራኤል ካገር አልወጣም ያሉ ኤርትራውያን ስደተኞችን አሰረች

                                                                        

    ወደ ሩዋንዳ አንሄድም ያሉ 16 ኤርትራውያን ስደተኞች ለእስር ተዳረጉ።

    የእስራኤል መንግሥት ስደተኞችን ካገር የማስወጣትንም እቅድ ተከትሎም ለእስር የበቁ የመጀመሪያዎቹ ስደተኞች ናቸው።

    የእስራኤል መንግሥት በሀገሪቷ ተቀማጭነታቸውን ያደረጉ የኤርትራና የሱዳን ስደተኞችን ወደ ሩዋንዳና ኡጋንዳ በመላክ ሙሉ በሙሉ ካገር የማስወጣት እቅድ አላት።

    እስካሁን ባለው 600 የሚሆኑ ስደተኞች ከሀገር እንዲወጡ ትዕዛዝ የተሰጣቸው ሲሆን ወደ 35 ሺ የሚሆኑ ስደተኞችም ከሀገር የመባረር አደጋ ላይ እንደሆኑ አንድ የእስራኤል የስደተኞች መብት ድርጅት አስታውቋል።

    ስደተኞቹ ሆሎት ከሚባለው የማቆያ ማዕከል የተወሰዱ ሲሆን በማእከሉም የረሀብ አድማ መነሳቱ ታውቋል።

    የእስራኤል መንግሥት በጥር ወር አካባቢ ስደተኞቹ ካገር እንዲወጡ ቀነገደብ ያስቀመጠ ሲሆን ካለበለዚያ ግን እስር እንደሚጠብቃቸው ማስጠንቀቂያ ሰጥቶ ነበር።

    ስደተኞቹ እሰራኤልን በሚቀጥሉት ሦስት ወራት ውስጥ ለቀው ለመውጣት ከተስማሙ 3500 ዶላር ይሰጣቸዋል ተብሏል።

    በዚህ ወር መጀመሪያም የእስራኤል መንግሥት የቀድሞ የሰራዊት አባላት ኤርትራውያን ስደተኖችን ጥገኝነት እንደሚሰጥ ቃል ገብቶ ነበር።

    ምንጭ፦ ቢቢሲ

    Read more »

  • በቦኮሀራም ጥቃት የጠፉ ሴት ተማሪዎች ተመለሱ

                                                                                    

    ሰኞ እለት በምዕራብ ናይጀሪያ ተከስቶ የነበረውን የቦኮ ሀራምን ጥቃት ተከትሎ ጠፍተው የነበሩ ሴት ተማሪዎች በሰራዊቱ እገዛ እንደዳኑ ባለስልጣናቱ ገልፀዋል።

    ጥቃቱን ተከትሎ ወደ 100 የሚጠጉ ተማሪዎችና መምህራን ዳፓቺ በምትባለው ከተማ አካባቢ ወጣ ብሎ ወደሚገኝ ጫካ ሸሽተው ነበር።

    የተማሪዎቹ ቤተሰቦች ለቢቢሲ እንደተናገሩት ተማሪዎች በጭነት መኪና ተጉዘው ሲሄዱ አይተናል ብለው ነበር።

    ይህ ጥቃትቦኮ ሀራም ቺቦክ ከተማ 270 ሴት ልጃገረዶችን ከትምህርት ቤት ከጠለፈ ከአራት አመት በኋላ የተከሰተ ነው።

    የዮቤ ከተማ አስተዳደር በመግለጫቸውም እንደገለፁት ቁጥራቸው የማይታወቅ ልጃገረዶች "ከጠለፏቸው አሸባሪዎች" በሰራዊቱ እገዛ ሊድኑ ችለዋል ብለዋል።

    የሮይተርስ ዜና ወኪል በበኩሉ ቤተሰቦችና የመንግሥት ባለስልጣናትን ጠቅሶ እንደዘገበው ወደ 76 የሚሆኑ እንደተመለሱና አሁንም 13 የመሆኑት እንደጠፉ ነው።

    በተጨማሪም ሮይተርስ ምክንያቱን ባይጠቅስም ሁለት ልጃገረዶች ሞተው እንደተገኙም ዘግቧል።

    የዮቤ አስተዳደር ከዚህ ቀደም ልጃገረዶቹ ስለመጠለፋቸው ምንም አይነት መረጃ የለም ብለው ነበር።

    ዳፓቺ ከቺቦክ በሰሜናዊ ምእራብ 275 ኪ.ሜ ርቀት የምትገኝ ከተማ ናት።

    ኢስላማዊ አክራሪዎቹ ከተማዋ ከደረሱ በኋላ የተኩስ ሩምታ ከመክፈት በተጨማሪ ተቀጣጣይ መሳሪያዎችን ያፈነዱ ሲሆን ይሄም ሁኔታ ተማሪዎቹንና መምህራኖቹን ወደ ጫካ እንዲሸሹ አድርጓቸዋል።

    የከተማዋ ነዋሪዎች የናይጀሪያ የፀጥታ ኃይል በጦር ጀት በመታጀብ ለጥቃቱ ምላሽ እንደሰጠ ተናግረዋል።

    ምንጭ፦ ቢቢሲ

    በትምህርት ቤቱ አቅራቢያ ያሉ የአካባቢዋ ነዋሪዎች ለቢቢሲ እንደተናገሩት የሸሹት ብዙዎቹ ልጆች በአካበቢው በሚገኙ መንደሮች እንደተገኙና አንዳንዶቹም 30 ኪ.ሜ ርቀት እንደተጓዙም ተናግረዋል።

    የዮቤ የፖሊስ ሚኒስትር እንደገለፁት ከ926 ተማሪዎች ውስጥ 815ቱ ወደ ትምህርት ቤት ተመልሰዋል።

    Read more »

  • በሻንጣ ውስጥ ተጉዞ ስፔን የደረሰው ልጅ አባት ከእስር ነፃ ሆነ

                                     

    የአይቮሪኮስት ዜግነት ያለው አባት የስምንት አመት ልጁ በሻንጣ ውስጥ ከሞሮኮ ተጉዞ ስፔን የደረሰ ሲሆን፤ አባትየው በቅርቡ ከእስር ነፃ ተደርጓል።

    የመንግሥት ዓቃቤ ህግ አባትየውን አሊ ኡታራን ልጁን በህገወጥ መንገድ ወደ ስፔን አጓጉዟል በሚል እስር ይገባዋል ብለዋል።

    ነገር ግን አባትየው ልጁ በሻንጣ ውስጥ እንደሚጓጓዝ ስለማወቁ ምንም ማስረጃ ባለማገኘቱ ቀለል ባለ ቅጣት ታልፏል።

    "እኔም ይሁን አባቴ በሻንጣ እንደሚወስዱኝ አላወቅንም" በማለት አሁን የ10 ዓመቱ ልጁ አዱ ለዳኞች ተናግሯል።

    ልጅየው ጨምሮ እንደተናገገረው በእስር ለአንድ ወር የቆየው አባቱ የነገረው ጉዞው በመኪና እንደሚሆን ነው።

    ከሞሮኮ ወደ ስፔን ድንበር በማቋረጥ ላይ ባሉበትም ወቅት በሻንጣው ውስጥም መተንፈስ ተቸግሮ እንደነበር ይናገራል።

    በአውሮፓውያኑ 2015ም በድንበር ላይ የሚገኙ ኃላፊዎች ከባድ የሆነ ሻንጣ አንዲት ሴት ስትጎትት አይተው ተጠራጥረው አስቁመዋታል።

    አባትየውም 115 ዶላር የሚጠጋ የብር ቅጣትም እንዲከፍሉ ተደርጓል።

    ልጅየው ከእናቱ ጋር ከፓሪስ ወጣ ብሎ በሚገኝ ስፍራ የሚኖር ሲሆን ለመመስከርም ወደ ስፔን አቅንቶ ነበር።

    "አሁንም ሁሉ ነገር ተፈፅሟል። ከአሁን በኋላ ከሚስቴና ከልጆቼ ጋር እንዳዲስ ህይወታችንን የምናቃናበት ጊዜ ነው" በማለት ኦታራ በሰሜናዊ ስፔን አዲስ ህይወት እንደሚጀምሩም ተናግሯል።

    ምንጭ፦ ቢቢሲ

    Read more »

  • ትራምፕ ተሻሽለው የተሰሩ መሳሪያዎች ላይ እገዳ እንዲጣል አዘዙ

                                                          

    የአሜሪካው ፕሬዚዳንት ዶናልድ ትራምፕ "ባምፕ ስቶክ" የሚባሉትን የመሳሪያ አይነቶች ለማገድ ትዕዛዝ ፈረሙ።

    ባለፈው አመት ላስቬጋስ በነበረ ኮንሰርት 58 ሰዎችን የገደለው ተኳሽ የተጠቀመበትም ተመሳሳይ መሳሪያ ነው።

    በደቂቃ ውስጥ ከመቶዎች ጊዜ በላይ መተኮስ እንደሚያስችል ተዘግቧል።

    በዋይት ሀውስ ባደረጉት ንግግር የፍትህ ክፍሉ እነዚህ መሳሪያዎች ህገወጥ ለማድረግ የሚያስችል ህግም እንዲያረቁ አዘዋል።

    ይህ የመሳሪያ ቁጥጥር ክርክር ባለፈው ሳምንት በፍሎሪዳ ለ17 ሰዎች ህይወት መቀጠፍ ምክንያት የሆነው ተኩስ ከተፈጠረ በኋላ እንደ አዲስ መወያያ ርዕስም ሆኗል።

    በማርጆሪ ስቶንማን ዳግላስ ሁለተኛ ደረጃ ትምህርት ቤት በደረሰው ጭፍጨፋ የተጎዱ ተማሪዎችና ቤተሰቦች በመዲናዋ ታልሀሲ ዛሬ ሰላማዊ ሰልፍ ለማድረግ እቅድ ይዘዋል።

    አንዳንዶቹ ተማሪዎች ማክሰኞ እለት ህግ አስፈፃሚዎች መሳሪያዎችና መፅሄቶችን እንዲከለክል የረቀቀውን ህግ ውድቅ ሲደረግም በጊዜው ተገኝተው ታዛቢ ሆነዋል።

    ነገር ግን በአጠቃላይ በተወሰነ መልኩ የመሳሪያ ቁጥጥር ማድረግ የሚያስችል ክልከላዎች እንደሚቀመጡ ተዘግቧል።

    ወደ 100 የሚሆኑ ተማሪዎች በሶስት አውቶብሶች ተጭነው የሰባት ሰዓት ጉዞ በማድረግ ቦታው ላይ ደርሰዋል።

    ለአብዛኛዎቹ ተማሪዎች ታልሀሲ ሲገኙ የመጀመሪያቸው ሲሆን በሀገራዊ ሁኔታ ህግ አውጭዎችን መሞገትም የማይታሰብ ሁኔታ ነበር።

    በሀገሪቱ እንቅስቃሴ ጀማሪዎች መሆናቸውም በተማሪዎቹ ደስታን እንደፈጠረም ተገልጿል።

    "ወደ መዲናዋ ተጉዘን የመጣነው አብረናቸው ያደግናቸውና የምናቃቸው ሰዎች ሲሞቱ ዝም ብለን አንመለከትም ብለን ነው" በማለት ጁሊያ ሳልሞን የተባለች የ18 ዓመት ልጅ ተናግራለች።

    እነዚህ ተማሪዎች ፖለቲከኞቹ እንዴት እንዲቀበሏቸው ይፈልጋሉ? "በእውነቱ ከሆነ ያለንን ቁርጠኝነት ከፊታችን ሲረዱት የሚገረሙ ይመስለኛል። አሁን የምንታገለው ለዚህ ነው" በማለት የምትናገረው የ16 ዓመቷ ሬይን ቫላዴርስ ስትሆን "ፊታችንን አይተው የማንመለስበት ደረጃ ላይ እንደደረስን ያዩታል" ብላለች።

    ምንጭ፦ ቢቢሲ

    Read more »

  • ዓይኖች በእነዚህ ሰዎች ላይ ናቸው

                                       

    ያሳለፍነው ሳምንት በኢትዮጵያ የፖለቲካ ታሪክ ውስጥ ትልቅ ቦታን ይዞ አልፏል። በመጀመሪያዎች የሳምንቱ ቀናት በኦሮሚያ ክልል ውስጥ ጠንካራ የሚባል የቤት ውስጥ መቀመጥ አድማ ተከናወነ። በቀጣዮቹ ቀናት በሽብር ወንጀል የተከሰሱና ተፈርዶባቸው የነበሩ ፖለቲከኞች፣ ጋዜጠኞችም ተፈቱ።

    በሳምንቱ መገባደጃ ላይ ደግሞ ጠቅላይ ሚንስትሩ የስልጣን ልልቀቅ ጥያቄያቸውን ማቅረብ ተከትሎም አርብ ማምሻውን ደግሞ አነጋጋሪ የሆነው የአስቸኳይ ጊዜ አዋጅ ታወጀ።

    ከዚህ ሁሉ በኋላ ተሰናባቹን ጠቅላይ ሚንስትር ኃይለማርያም ደሳለኝን ማን ይተካቸዋል የሚለው መነጋገሪያ ሆኗል። በርካቶችም በማህበራዊ ድረ-ገፆች እና መገናኛ ብዙሃን ላይ ጠቅላይ ሚንስትሩን ሊተኳቸው ይችላሉ የሚሏቸውን ሰዎች ሲጠቅሱ ቆይተዋል።

    የኢፌዲሪ ሕገ መንግሥት አንቀጽ 73 ንዑስ አንቀጽ 1 ስለ ጠቅላይ ሚንስትሩ አሰያየም በግልጽ እንደሚያትተው፤ ጠቅላይ ሚንስትሩ ከሕዝብ ተወካዮች ምክር ቤት አባላት መካከል ይመረጣል። ሊመረጥ የታሰበው ግለሰብ ግን የምክር ቤቱ አባል ካልሆነ፤ የህዝብ ተወካዮች ምክር ቤት የምርጫ ቦርድ ሟሟያ ምርጫ እንዲያካሂድ ከጠየቀ በኋላ፤ ዕጩውን ግለሰብ በሟሟያ ምርጫው የህዝብ ተወካዮች ምክር ቤት አባል ሆኖ መመረጥ አለበት።

    ማሟያ ምርጫ ማለት በይውረድልን ወይም በማንኛውም ምክንያት በየደረጃው የሚገኙ የተጓደሉ የምክር ቤት አባላት መቀመጫዎችን ለማሟላት የሚካሄድ ምርጫ ማለት ነው።

    ጠቅላይ ሚንስትሩን ለመተካት የሚታጨው ግለሰብ ግን የምክር ቤት አባል ከሆነ በተለመደው የኢህአዴግ አሰራር መሰረት፤ የድርጅቱ ጠቅላላ ጉባኤ ተካሂዶ ሊቀመንበሩን ከመረጠ በኋላ፤ ሊቀመንበሩን ለህዝብ ተወካዮች ምክር ቤት በማቅረብ በጠቅላይ ሚንስትርነት እንዲሰየም ይደረጋል።

    ሰሞኑን በተለያዩ መገናኛ ብዙሃን እና በማህበራዊ ድረ ገፆች ላይ በተደጋጋሚ ስማቸው እየተጠቀሰ የሚገኙት ሰዎች የሚከተሉት ናቸው። እነዚህ ግለሰቦች እነማን ናቸው?

    አጭር የሕይወት ታሪካቸውን እንደሚከተለው ቀርቧል። ስማቸው የተዘረዘረው በእንግሊዝኛ የፊደላት ቅደም ተከተል መሰረት ነው።

    ክተር አብይ አህመድ

    ዶክተር አብይ አህመድ በአጋሮ ከተማ የተወለዱ ሲሆን የመጀመሪያ ዲግሪያቸውን በኮምፒዩተር ኢንጂነሪንግ አግኝተዋል።

    ሁለተኛ ዲግሪያቸውን በደቡብ አፍሪካ ዩኒቨርሲቲ ሰርተዋል።

    በግሪንዊች ዩኒቨርሲቲ እና በሊደርሺፕ ተቋም ደግሞ የሥራ አመራር ሳይንስ አጥንተዋል። እንዲሁም አሽላንድ ዩኒቨርሲቲ በንግድ አስተዳደር ሁለተኛ ዲግሪ ያገኙ ሲሆን ከአዲስ አበባ ዩኒቨርሲቲ በሰላም እና ደህንነት ጥናት ፒኤችዲ አላቸው።

    በመጀመሪያ 40ዎቹ የሚገኙት ዶክተር አብይ ኦህዴድን የተቀላቀሉት በ1980ዎቹ መጀመሪያ ላይ ነው። ከፖለቲካ ተሳትፏቸው በተጨማሪ በወታደራዊ ጉዳዮች ሰፊ ተሳትፎ የነበራቸው ሲሆን የሌተናል ኮሎኔል ማዕረግ አላቸው።

    በተባበሩት መንግሥታት የስላም ማስከበር ተልዕኮን ለማስፈጸም ሩዋንዳ ዘምተዋል።

    ከ2000 እሰከ 2003 የመረጃ መረብ ደህንነት ኤጀንሲ መስራች እና ዳይሬክተር በመሆነ አገልግለዋል። ከዚያም የሳይንስ እና ቴክኖሎጂ ሚንስትር በመሆን ሰርተዋል።

    ከ2002 ጀምሮ የኦህዴድ ማዕከላዊ ኮሚቴ አባል የነበሩ ሲሆን፤ ከ2007 ጀምሮ ደግሞ የሥራ አስፈጻሚ ኮሚቴ አባል ሆነው በማገልገል ላይ ይገኛሉ። ከዚህ በተጨማሪ ላለፉት ሦስት ዓመታት የኢህአዴግ የሥራ አስፈጻሚ ኮሚቴ አባል ሆነው እየሰሩ ይገኛሉ። ዶክተር አብይ የኦህዴድ ማዕከላዊ ጽህፈት ቤት ኃላፊ ናቸው።

    ዶክተር አብይ በአሁኑ ጊዜ የህዝብ ተወካዮች ምክር ቤት አባል ናቸው።

    ክተር ደብረዮን ገብረ ሚካኤል

    በትግራይ ሽረ ወረዳ ነው የተወለዱት። አዲስ አበባ ዩኒቨርሲቲን ከተቀላቀሉ በኋላ ትምህርታቸውን አቋርጠው ወደ ትጥቅ ትግል ገብተዋል።

    በትጥቅ ትግል ወቅት ወደ ጣልያን አገር በመሄድ በመገናኛ ቴክኖሎጂ ስልጠና የወሰዱ ሲሆን፤ በ1972 ዓ.ም የህወሓት ሬድዮ ጣብያ ድምፂ ወያነን አቋቁመዋል።

    ኢህአዴግ ስልጣን ላይ ሲወጣ የደህንነት መ/ቤቱን ይመሩ የነበሩት የአቶ ክንፈ ገብረ መድህን ምክትል ሆነውም አገልግለዋል።

    ቀደም ሲል ያቋረጡትን የአዲስ አበባ ዩኒቨርሲቲ ትምህርታቸውን ተከታትለው የመጀመሪያና ሁለተኛ ዲግሪያቸውን በኤሌክትሪካል ኢንጂነሪንግ ተቀብለዋል።

    እንዲሁም ደግሞ የዶክትሬት ድግሪያቸውን ከዩኒቨርሲቲ ኦፍ ለንደን አግኝተዋል።

    ከ1998 ዓ.ም ጀምሮ የኢንፎርሜሽንና ኮምዩኒኬሽን ልማት ኤጀንሲ ዋና ዳይሬክተር ሆነው ያገለገሉ ሲሆን፤ በምክትል ጠቅላይ ሚንስትር ማዕረግ የክላስተር አስተባባሪ ሆነውም ሰርተዋል።

    በአሁን ሰዓት የህወሓት ሊቀመንበር፣ በምክትል ርዕሰ መስተዳደርነት የትግራይ ክልልን እንዲሁም የኢንፎርሜሽን ኮሚኒኬሽን ሚንስትር ሆነው እያገለገሉ ይገኛሉ።

    ዶክተር ደብረፅዮን በአሁኑ ጊዜ የህዝብ ተወካዮች ምክር ቤት አባል ናቸው።

    ደመቀ መኮንን

    በ1980 ከአዲስ አበባ ዩኒቨርሲቲ በባዮሎጂ ትምህርት ዘርፍ የመጀመሪያ ዲግሪያቸውን ተቀብለዋል። ከዚያም ሁለተኛ ዲግሪያቸውን በግጭት አፈታት አጠናቀዋል።

    በ1980ዎቹ መጀመሪያ ኢህአዴግን የተቀላቀሉት አቶ ደመቀ፤ ከጥቂት ዓመታት በኋላ የአማራ ክልል ምክር ቤት ተመራጭ ሆነው ነበር።

    በ1997 የአማራ ክልላዊ መንግሥት ምክትል ርዕሰ መስተዳደር ሆነው የተመረጡ ሲሆን፤ በቀጣዩም ዓመት የብሄረ አማራ ዴሞክራሲያዊ ንቅናቄ (ብአዴን) ሥራ አስፈጻሚ ኮሚቴ አባል ሆነው ተመርጠዋል።

    አቶ ደመቀ መኮንን የብአዴን ሊቀመንበር ሲሆኑ በኀዳር 2005 ዓ.ም የኢህአዴግ ምክትል ሊቀምንበር ሆነው ከተመረጡበት ጊዜ ጀምሮ በምክትል ጠቅላይ ሚንስትርነት እያገለገሉ ይገኛሉ።

    የቀድሞው መምህር ወደዚህ ስልጣን ከመምጣታቸው በፊት የትምህርት ሚንስትር ሆነው አገልግለዋል።

    አቶ ደመቀ መኮንን በአሁኑ ጊዜ የህዝብ ተወካዮች ምክር ቤት አባል ናቸው።

    አቶ ለማ መገርሳ

    አቶ ለማ መገርሳ የኦሮሞ ህዝብ ዴሞክራሲያዊ ድርጅት (ኦህዴድ) ሊቀመንበር እና የኦሮሚያ ክልላዊ መንግሥት ርዕሰ መስተዳደር በመሆን እያገለገሉ ይገኛሉ።

    በአርባዎቹ መጨረሻ ላይ እንደሚገኙ የሚነገርላቸው አቶ ለማ፤ ትውልድ እና እድገታቸው ምስራቅ ወለጋ ነው።

    ከአዲስ አበባ ዩኒቨርሲቲ በፖለቲካል ሳይንስ እና ዓለም አቀፍ ግንኙነት የመጀመሪያ ዲግሪ ያገኙ ሲሆን በተመሳሳይ የትምህርት ዘርፍ ሁለተኛ ዲግሪያቸውንም ከዚያው ከአዲስ አበባ ዩኒቨርሲቲ አግኝተዋል።

    ከሁለት ዓመታት በፊት በኦሮሚያ ህዝባዊ ተቃውሞ በበረታበት ወቅት ነበር የኦህዴድ ሊቀመንበር እና የክልሉ ርዕሰ መስተዳደር ሆነው የተመረጡት።

    አቶ ለማ በ1980ዎቹ መጀመሪያ ላይ ኦህዴድን የተቀላቀሉ ሲሆን የክልሉ ርዕሰ መስተዳደር ከመሆናቸው በፊት የክልሉ ምክር ቤት - የጨፌ አፈጉባኤ ነበሩ።

    አቶ ለማ መገርሳ የኦሮሚያ ክልል ምክር ቤት-ጨፌ አባል ሲሆኑ የህዝብ ተወካዮች ምክር ቤት አባል ግን አይደሉም።

    ክተር ወርቅነህ ገበየ

    ዶክተር ወርቅነህ ገበየሁ የኦህዴድ ምክትል ሊቀመንበር እና የኢፌዴሪ የውጪ ጉዳይ ሚንስትር ናቸው።

    የመጀመሪያ እና ሁለተኛ ዲግሪያቸውን በፖለቲካል ሳይንስ እና በውጪ ግንኙነት በአዲስ አበባ ዩኒቨርሲቲ አጠናቀዋል።

    ከሁለት ዓመታት በፊት ከደቡብ አፍሪካ ዩኒቨርሲቲ በፖሊስ ሳይንስ ዶክትሬት ዲግሪን አግኝተዋል።

    1960ዎቹ መጀመሪያ ላይ የተወለዱት ዶክተር ወርቅነህ ለረጅም ዓመታት የፌደራል ፖሊስ ኮሚሽን ኮሚሸነር በመሆን አገልግለዋል።

    ከ2004 ጀምሮ የትራንስፖርት ሚንስትር በመሆን ለአራት ዓመታት ሰርተዋል።

    ከ1980ዎቹ መጀመሪያ አንስቶ የኦህዴድ አባል የነበሩት ዶክተር ወርቅነህ፤ ከ2004 ጀምሮ የኦህዴድ እና የኢህዴግ ሥራ አስፈጻሚ ኮሚቴ አባል ናቸው።

    ዶክተር ወርቅነህ ገበየሁ የአዲስ አበባ ከተማ መስተዳድር ምክር ቤት አባል እንጂ የህዝብ ተወካዮች ምክር ቤት አባል አይደሉም።

    ምንጭ፦ ቢቢሲ

    Read more »

  • በናይጄሪያ ሴት ተማሪዎች የቦኮ ሃራምን ጥቃት አመለጡ

                               

    በሰሜን ምስራቅ ናይጄሪያ አንድ የሴቶች አዳሪ ትምህርት ቤት ውስጥ የነበሩ ተማሪዎች እና መምህራን የቦኮ ሃራምን ጥቃት ማምለጣቸውን የዓይን እማኞች ተናገሩ።

    የዓይን እማኞች እንዳሉት ከሆነ የቦኮ ሃራም ወታደሮች ሰኞ ጠዋት ዳፕቺ በምትባል ከተማ ከደረሱ በኋላ ተኩስ ከፈቱ እንዲሁም ፈንጂዎችን ማፈንዳት ጀመሩ።

    የፍንዳታውን ድምጽ ቀድመው የሰሙት ሴት ተማሪዎች እና መምህራን ቦኮ ሃራም ወደ ትምህርት ቤታቸው ከመድረሱ በፊት በማምለጣቸው የጥቃቱ ሰለባ ከመሆን ተርፈዋል።

    በአውሮፓውያኑ 2014 ቦኮ ሃራም በሰሜን ምስራቅ ናይጄሪያ ከምትገኝ ቺቦክ ከተማ 270 ሴቶችን አፍኖ ወስዶ ነበር።

    የዳፕቺ ከተማ ነዋሪዎች እንደሚሉት ከሆነ የቦኮ ሃራም ታጣቂዎች በትምህርት ቤቱ የሚገኙትን ሴቶች ለማፈን ነበር የመጡት ብለዋል።

    ታጣቂዎቹ በትምህርት ቤቱ ቅጥር ግቢ ሲደርሱ ባዶ ሆኖ በማግኘታቸው በህንጻዎቹ ውስጥ ያገኙትን ከዘረፉ በኋላ አውድመው ወደ መጡበት ተመልሰዋል።

    የናይጄሪያ ጦር በተዋጊ ጄቶች በመታገዝ የአጸፋ እርምጃ ወስዷል ተብሏል።

    ባሳለፍነው ግንቦት ወር ከቺቦክ ታፍነው ከተወሰዱት መካከል 100 ሴት ተማሪዎች ከቤተሰቦቻቸው ጋር ተቀላቅለዋል።

    ብዙዎቹ የተለቀቁት መንግሥት የቦኮ ሃራምን 5 ኮማንደሮች ከእስር ለመልቀቅ ከተስማማ በኋላ ነበር።

    ይሁን እንጂ አሁንም 100 ሴት ተማሪዎች በቦኮ ሃራም ቁጥጥር ሥር ይገኛሉ።

    ላለፉት ስምንት ዓመታት ቦኮ ሃራም በሰሜን ምስራቅ ናይጄሪያ ሲፈጽማቸው በቆየው ጥቃቶች ወደ አስር ሺ የሚጠጉ ንጹሃን ህይወታቸውን አጥተዋል።

    ምንጭ፦ ቢቢሲ

    Read more »

  • በጎንደር የስራ ማቆም አድማ ተካሄደ

                                          

    ብዙ ሁነቶችን ባስተናገደው ባለፈው ሳምንት ፖለቲከኞች፣ ጋዜጠኞችና የመብት አቀንቃኞች በምህርትና በይቅርታ ተፈተዋል፤ ጠቅላይ ሚኒስትር ኃይለማርያም ደሳለኝ ከጠቅላይ ሚኒስትርነታቸው እንዲሁም ከፓርቲያቸው አመራር ኃላፊነት የመልቀቅ ጥያቄ ባቀረቡ ማግሥት የአስቸኳይ ጊዜ አዋጅ መታወጁ ለብዙዎች አነጋጋሪ ሆኗል።

    ባለፈው ሳምንት መገባደጃ ላይ በኢትዮጵያ የሚኒስትሮች ምክር ቤት የታወጀው የአስቸኳይ ጊዜ ድንጋጌ በመንግሥታዊው ቴሌቪዥን በይፋ ከተገለፀበት ጊዜ አንስቶ የተለያዩ ስሜቶች እየተስተናገዱ ሲሆን፤ በአንዳንድ የአማራ ክልል ከተሞች በአፀፋው የሥራ ማቆም አድማ አድርገዋል።

    የአስቸኳይ ጊዜ አዋጁ በታወጀ 72 ሰዓታት ጊዜ ውስጥ በጎንደር ከተማ የስራ ማቆም አድማ የተነሳ ሰሆን የንግድ ቤቶች ተዘግተዋል እንዲሁም የትራንስፖርት አገልግሎት ሙሉ በሙሉ እንደተቋረጠ ነዋሪዎች ለቢቢሲ ገልፀዋል። የጎንደር ከተማ ፀጥ ረጭ እንዳለችም ጨምረው ተናግረዋል።

    በተቃራኒው የተለያዩ የመንግሥት መስሪያ ቤቶች ክፍት እንደነበሩና አገልግሎትም ሲሰጡ እንደነበር ተነግሯል።

    የኢፌዲሪ የመንግሥት ኮሚዩኒኬሽን ጉዳዮች ፅህፈት ቤት በፌስቡክ ገፁ ላይ እንዳሰፈረው ትናንት ምሽት የከተማው ከንቲባ አቶ ተቀባ ተባባል ለጋዜጠኞች በሰጡት መግለጫ በከተማው ውስጥ የስራ ማቆም አድማ በተለይም የንግድ ቤቶችን መዘጋትና ትራንስፖርት ማቆም እንዳለ አምነው ነገር ግን "ህገወጥ ስለሆነ ህዝቡ ሊቃወመው ይገባል" ብለዋል።

    ቢቢሲ ያነጋገራቸው የጎንደር ነዋሪዎችም ግልፅ በሆነ ሁኔታ ማን አድማውን እንደጠራው አልታወቀም ብለዋል። የከተማው ከንቲባ በበኩላቸው "ባለቤቱ ያልታወቀ አድማ" ብለውታል።

    "ህዝቡ በሰለጠነና ሰላማዊ በሆነ መንገድ ጥያቄዎቹን አሁንም በማቅረብ ከከተማ አስተዳደሩ ጋር ተቀራርቦ መስራት አለበት" ቢሉም ከንቲባው በተለያዩ ማህበራዊ ሚዲያ ላይ በሀገሪቱ ላይ የተጣለው የአስቸኳይ ጊዜ ካልተነሳ በአድማው እንደሚቀጥሉ እየገለፁ ነው ።

    ትናንት አመሻሹ ላይ ኮሎኔል ደመቀ ዘውዱ ከእስር የመፈታታቸውንም ዜና ተከትሎ በጎንደር ከተማ ደስታቸውን ለመግለፅ ብዙዎች እንደወጡ ነዋሪዎች ገልፀዋል።

    በባህርዳር ከተማም ትናንት ጥዋት አካባቢ ላይ በአንዳንድ አካባቢዎች ላይ የስራ ማቆም አድማ እንደነበርና የንግድ ቤቶችም መዘጋታቸውን ነዋሪዎች ገልፀዋል እንዲሁም በደብረ-ታቦር ከተማ መጠነኛ የሚባል የሥራ ማቆም አድማ እንደነበር መረዳት ተችሏል።

    ምንጭ፦ ቢቢሲ

    Read more »

  • NEWS: የብራዚል እስር ቤት በእስረኞች ቁጥጥር ሥር ይገኛል - The Brazilian Prison Is Under The Control Of Prisoners

                                           

    በብራዚል መዲና ሪዮ ዲ ጄኔሮ የሚገኝ እስር ቤት በእስረኞች ቁጥጥር ስር ውሏል። እስረኞቹ የእስር ቤቱን ሰራተኞችም አግተዋል።

    የታጠቁ አድማ በታኝ ፖሊሶች እስር ቤቱን ከበውት የሚገኙ ሲሆን ታሳሪዎቹ በከተማዋ አደገኛ ከሚባሉ የማፊያ ቡድኖች መካከል የአንዱ አባላት ናቸው።

    አመጹን ከቀሰቀሱት እስረኞች መካከል ሶስቱ በጥይት ተመትተዋል።

    አመጹ የተቀሰቀሰው የብራዚል ፕሬዚዳንት ሚኬል ቴምር ሪዮ ዲ ጄኔሮ በብራዚል የጦር ኃይል ቁጥጥር ሥር እንድትሆን ውሳኔ ካስተላለፉ በኋላ ነው።

    የእስር ቤቱ ሃላፊዎች እስረኞቹ አመጹን የቀሰቀሱት የፕሬዚዳንቱን ውሳኔ በመቃወም ሳይሆን አይቀርም ብለዋል።

    ምንጭ፦ ቢቢሲ

    Read more »

  • በሄይቲ የኦክስፋም ቅሌት፡ተጠርጣሪዎች የአይን እማኞችን አስፈራርተዋቸዋል - Oxfam Haiti Scandal, Suspects 'Physically Threatened' Witnesses

                                      

    ሄይቲ በሚገኘው ኦክስፋም ቅርንጫፍ በወሲብ ትንኮሳ ተከሰው የነበሩ ሶስቱ ሰራተኞች በአውሮፓውያኑ 2011 በነበረው ምርመራ የአይን እማኞችን እንዳስፈሯሯቸው ኦክስፋም አጋለጠ።

    የእርዳታ ድርጅቱ ሰራተኞቹ ያደረሱትን "ብልግና" ድርጅቱ በደረሰበት የዓለም አቀፍ ግፊት ምክንያት ሪፖርቱን ለማሳተም እንደተገደደ ገልጿል።

    በአውሮፓውያኑ 2011 ኦክስፋም ባወጣው ሪፖርት ስርዓት ያጓደሉ ሰራተኞች በእርዳታ ድርጅቶች እንዳይቀጠሩ ብዙ መስራት እንደሚያስፈልግ ማሳሰቢያ ሰጥተው ነበር።

    ነገር ግን ይህ ማሳሰቢያ ችላ ተብሎ በወሲብ ጥቃት እንዲሁም ስርዓትን በማጓደል የተወነጀሉ ወንዶች በተለያዩ እርዳታ ድርጅቶች ለመስራት እንደ ተቀጠሩ ለመረዳት ተችሏል።

    በ90 አገራት ከ10ሺ በላይ ሰራተኞች ያሉት ኦክስፋም ስለሳለፉት ውሳኔዎቹ ግልፅ መሆን እንፈልጋለን በሚል በተቀባባ መልኩ ሪፖርቱን አውጥቶታል።

    ይህ 11 ገፅ ያለው ሪፖርት የሰዎችን ማንነት ላለመግለፅ ስማቸው የተሰረዘ ሲሆን ከነዚህም ውስጥ የአይን እማኞች ላይ ዛቻ ያደረሱት ሶስት ወንዶች ይገኙበታል።

    ዋናውን ሪፖርት ዛሬ ኦክስፋም ለሄይቲ መንግሥት የሚያቀርብ ሲሆን ለተፈፀሙ ስህተቶችም ይቅርታ እንደሚጠይቅ ተዘግቧል።

    የእርዳታ ድርጅቱ ሴተኛ አዳሪነት ጋር ግንኙነት አላቸው የሚላቸውን ሰራተኞቹን ምርመራ በደንብ አልተወጣም በሚል ከፍተኛ የሆነ አለም አቀፍ ግፊትም እየደረሰበት ነው።

    ማስፈራራና ዛቻ

    በአውሮፓውያኑ 2011 ሰባት የኦክስፋም ሰራተኞች በባህርያቸው ምክንያት በሄይቲ ከሚገኘው የኦክስፋም ቅርንጫፍ እንደለቀቁ ሪፖርቱ ያሳያል።

    በኦክስፋም ግቢ ውስጥ ከሴተኛ አዳሪ ጋር በመገኘታቸው አንደኛው ሲባረር ሶስቱ ከስራ እንደለቀቁ ሪፖርቱ ያሳያል። ግንኙነታቸው ለአቅመ-ሔዋን ያልደረሱ ሴቶችም ጋር ይሁን አልታወቀም።

    ከዚህም በተጨማሪ ሁለቱ በማስፈራራትና ዛቻ ምክንያት የተባረሩ ሲሆን አንደኛው ፖርኖግራፊ በመጫንና አንደኛው ደግሞ ሰራተኞችን ባለመጠበቁ ከስራቸው ተባረዋል።

    ሪፖርቱም የኦክስፋም የስራ ሂደት ዳይሬክተርን ሮናልድ ቫን ሀዌርሜይረን ጠቅሶ እንደተናገረው በኦክስፋም ግቢ ውስጥ ከሴተኛ አዳሪዎች ጋር መገናኘታቸውን ዳይሬክተሩ በምርመራ ቡድኑ ሲጠየቁ አምነዋል።

    ከምርመራ ቡድኑ ጋር ተባብረዋል በሚልም በምላሹም ያለምንም ቅድመ ሁኔታ በተከበረ መልኩ ዳይሬክተሩ እንዲለቁ አድርገዋቸዋል።

    ተቀባብቶ በወጣው ይህ ሪፖርትም የአይን እማኞች ላይ ዛቻ በማድረስ በሚልም ስማቸው አልተጠቀሰም።

    ከፍተኛ የሆነ ቁጥጥር እንደሚያስፈልግ ትምህርት ተወስዷል የሚለው ኦክስፋም አጠቃላይ በእርዳታው ኢንዱስትሪ ውስጥ በዚህ ጉዳይ የተዘፈቁ ሰራተኞች ወደ ሌላ አገር ሲዛወሩ ማስረጃ መስጠት ያስፈልጋል ተብሏል።

    "ሰራተኞች ስርዓት በማጉደል ምክንያት ከአንድ ቦታ ሲባረሩ ለሌሎች ክልሎች፣ ኤጀንሲዎች ማሳወቅና ከፍተኛ የሆነ ቁጥጥር ያስፈልጋልም" ብለዋል።


    ከፍተኛ ቦታን የተቆናጠጡ ሰራተኞች

    ሪፖርቱ በስርዓት ማጉደል ምክንያት የተባረሩ ሰራተኞች ሌላ ቦታ እንዳይቀጠሩ የተሻለ ቁጥጥር እንደሚያስፈልግ ማስጠንቀቂያ ቢሰጥም በተቃራኒው የተባረሩ ሰራተኞች በተለያዩ እርዳታ ድርጅቶች እንዲሁም በኦክስፋም ተቀጥረዋል።

    ሮናልድ ቫን ሀዌርሜይረን ራሳቸው በባንግላዴሽ በሚገኝ "ሚሽን ፎር አክሽን ኤጌይንስት ሀንገር" በሚባል ድርጅት በከፍተኛ ኃላፊነት ቦታ ተቀጥረዋል።

    ምንም እንኳን ድርጅቱ በሰራተኛው ላይ ምርመራ አድርጌያለሁ ቢልም ከኦክስፋም ስርዓት በማጉደል እንደተባረሩ መረጃ አልደረሰኝም ብሏል።

    ምንጭ፦ ቢቢሲ

    Read more »

  • የአስቸኳይ ጊዜ አዋጁ ያጫራቸው ጥያቄዎች

                                      

    በተከታታይ ዐብይ ፖለቲካዊ ክስተቶችን ባስተናገደው ባለፈው ሳምንት መገባደጃ ላይ በኢትዮጵያ የሚኒስትሮች ምክር ቤት የታወጀው የአስቸኳይ ጊዜ ድንጋጌ በመንግሥታዊው ቴሌቪዥን በይፋ ከተገለፀበት ጊዜ አንስቶ ልዩ ልዩ ጥያቄዎችን ማጫር ጀምሯል ።

    በአንድ በኩል ምንም እንኳ የሚኒስትሮች ምክር ቤት የአገሪቱ የፀጥታ ሁኔታ በየጊዜው እየተባባሰ መሄዱን እንዲሁም ብሔር ተኮር ግጭቶች እና ጥቃቶች እየተበራከቱ መምጣታቸውን ለአዋጁ አስፈላጊነት ምክንያት አድርጎ ቢጠቅስም፤ የተለያዩ መብቶችን የሚገድበው አዋጅን እንደመጨረሻ አማራጭ መቆጠር አለበት ከሚል ግንዛቤ በመነሳት፤ እነዚህን ፈታኝ ችግሮች የማስተናጋጃ ሌሎች መንገዶች አልነበሩም ወይ የሚሉ ጥያቄዎች ሲሰነዘሩ ተሰምተዋል።

    በሌላ ወገን የመንግሥት ኮምኒኬሽን ጉዳዮች ጽህፈት ቤት ሚኒስትሩ ዶክተር ነገሪ ሌንጮ አዋጁን ለመደንገግ የሚያበቃ አስገዳጅ ሁኔታ ያለመኖሩን በተናገሩ እንዲሁም የጠቅላይ ሚኒስትር ኃይለማርያም ደሳለኝ የሥራ መልቀቂያ በኢህአዴግ ሥራ አስፈፃሚ ኮሚቴ ተቀባይነት ማግኘቱን አስታክከው የፓርቲው ዋና ጸሐፊ አቶ ሽፈራው ሽጉጤ "እዚህም እዚያም ከሚነሱ የፀጥታ ችግሮች" በስተቀር ምንም የተለየ ነገር ያለመኖሩን ከገለፁ በኋላ መታወጁ አግራሞትን አጭሯል።

    በርካታ ፖለቲከኞች፣ ጋዜጠኞች እና የመብት ተሟጋቾች ለሃገራዊ መግባባት እና የፖለቲካ ምህዳሩን ለማስፋት በሚል በመፈታት ላይ ባሉበት ወቅት ፤ ከሁለት ዓመታት በፊት በአስር ሺህዎች የሚቆጠሩ ግለሰቦች ለመታሰራቸው ምክንያት ሆኖ የነበረው አዋጅ ተመልሶ መምጣቱ በገዥው ፓርቲ እና በመንግሥት ውስጥ የመልዕክት እንዲሁም የፍላጎት ወጥነት ላለመኖሩ እንደማሳያ የቆጠሩትም አሉ።

    የአሜሪካ ኤምባሲ ከዚህ ቀደም ባልተለመደ አኳኋን ጠንከር ባሉ ቃላት በተሞላው መግለጫዋ ከአዋጁ ጋር "በፅኑ እንደማትስማማ" ገልፃ ፤ ለአገሪቷ ችግር "የበለጠ እንጅ ያነሰ ነፃነት" መፍትሄ እንደማይሆን ምክረ ኃሳቧን ለግሳለች።

    የመከላከያ ሚኒስትሩ እና አዋጁን ለማስፈፀም የተቋቋመው ግብረ ኃይል ዋና ጸሐፊ የሆኑት አቶ ሲራጅ ፈጌሳ ቅዳሜ ቀትር ላይ መግለጫ ከሰጡ በኋላ በአዋጁ እና ለጊዜውም ቢሆን አቅጣጫው ባልታወቀው የኢትዮጵያ ፖለቲካ ላይ ተጨማሪ ጥያቄዎችን ያስነሳ ሆኗል።

                                    

    የሚኒስትሮች ምክር ቤት የፖለቲካ አቅሙ ምን ያህል ነው?

    የአስቸኳይ ጊዜ አዋጁ እንደሚታወጅ መወራት ከጀመረበት ከባለፈው ሳምንት አጋማሽ አንስቶ ሁለቱ የገዥው ግንባር አባል ፓርቲዎች የኦሮሞ ሕዝቦች ዴሞክራሲያዊ ድርጅት (ኦህዴድ) እና ብሔረ አማራ ዴሞክራሲያዊ ንቅናቄ (ብአዴን) እርምጃውን የመቃወም አዝማሚያ እንዳሳዩ የውስጥ አዋቂ ምንጮች አሉን የሚሉ ተንታኞች ሲናገሩ ቆይተዋል።

    የመከላከያ ሚኒስትሩ አቶ ሲራጅ ግን እነዚህን አስተያየቶች በማጣጣል ውሳኔው ሙሉ የሚኒስትሮች ምክር ቤት ተቀባይነትን እንዳገኘ ነው በመግለጫው የገለፁት።

    የአፍሪካ ቀንድ ፖለቲካ እና የደህንነት ጉዳዮችን የሚያጠኑት አቶ ሃሌሉያ ሉሌ ሁለቱም አስተያየቶች ትክክል የመሆን ዕድል አላቸው ይላሉ።

    ምንም እንኳ ከሚኒስትሮች ምክር ቤት አባላት ውስጥ የውጭ ጉዳይ ሚኒስትሩ እና የኮሚኒኬሽን ጉዳዮች ሚኒስትሩ በአገር ውስጥ ባለመኖራቸው በምን አኳኋን ውሳኔውን ባሳለፈው ስብሰባ ላይ እንደተሳተፉ ግልፅ ባይሆም፤ ምክር ቤቱ ውሳኔውን በሙሉ ድምፅ ቢያሳልፍ የሚገርም አይሆንም የሚሉት አቶ ሃሌሉያ ይህ ግን ፓርቲዎቹ ሙሉ በሙሉ ውጥኑን ደግፈውታል ማለት ግን አይደለም ሲሉ ይከራከራሉ።

    ይህንን ሙግታቸውን ለማስደገፍ የሚያነሱት መከራከሪያ የፓርቲዎቹ ልብ እና አዕምሮ በሚኒስትሮች ምክር ቤት ውስጥ አይገኝም በማለት ነው።

    "በመጀመሪያ በሚኒስትሮች ምክር ቤት ያሉ ሰዎች በጣም ጠንካራ አይደሉም። ኦህዴድን እና ብአዴንን እንኳ ብናይ ጠንካራ የምንላቸው የሁለቱ ፓርቲዎች የፖሊት ቢሮ አባላት ክልል ላይ ነው ያሉት። የክልል ፕሬዚዳንት፣ ምክትል ፕሬዚዳንትና የፓርቲ ጽህፈት ቤት ኃላፊ ናቸው። የሚኒስትሮች ምክር ቤት በአንፃሩ ከዓለም አቀፍ ተቋማት፣ ከትምህርት ተቋማት የብሔር ተዋፅዖ እየተጠበቀ የተመለመሉ በዛ ያሉ ባለሞያዎችን የያዘ አካል ነው" ይላሉ ተንታኙ ከቢቢሲ ጋር በነበራቸው ቆይታ።

    የዚህ አንድ መገለጫ እና ምልክት ከቅርብ ዓመታት ወዲህ የክልል መንግሥታት ከዚህ ቀደም ባልታየ መልኩ የፖለቲካ አቅም ማጎልበታቸው እንደሆነ ተንታኙ ይናገራሉ።

                                         

    የክልል መንግሥታት ተገለሉ?

    አቶ ሲራጅ አዋጁን አስመልክቶ ዝርዝር ጉዳዮችን ባስረዱበት መግለጫቸው ካብራሯቸው ጉዳዮች መካከል ድንጋጌውን በበላይነት ለመቆጣጠር የተቋቋመው ግብረ ኃይል የበርካቶችን ቀልብ ስቧል።

    ግማሽ ደርዘን አካባቢ አባላት ያሉት ግብረ ኃይል የክልል ፕሬዚዳንቶችን ያለማካተቱ የአዋጁ ቅቡልነት እና ተፈፃሚነት ላይ ተፅዕኖ ሊኖረው እንደሚችል አቶ ሃሌሉያ ግምታቸውን ይገልፃሉ።

    "አዋጁ ሲጀመርም የተቀባይነት ጥያቄ አለበት፤ የብሔር ፖለቲካ ገንኖ ባለበት ከባቢ ግብረ ኃይሉ ተመጣጣኝ የብሔር ውክልና ያለመያዙ ችግር አለው። ክልሎች ያለመካታተቸው ደግሞ በተቋም ደረጃና በመንግሥት ደረጃም ወካይ እንዳይሆን ያደርገዋል" ይላሉ ተንታኙ።

    እነዚህ እውነታዎች በአዋጁ አፈፃፀም ላይ እንቅፋት ቢፈጥሩ የሚገርም አይሆንም ለተንታኙ። በዚህ ላይ በግንባሩ ውስጥ የአቅጣጫ መከፋፈል እና የፍላጎቶች ግጭት እንዳለ መታመኑ ጥርጣሬውን ያጎላዋል።

    የሁለት አዋጆች ወግ

    በ2009 መግቢያ ላይ ለስድስት ወራት የታወጀውና ቆይቶም ለአራት ወራት የተራዘመው የአስቸኳይ ጊዜ አዋጅ ችግሮችን መቅረፍ መቻሉ ላይ ጥያቄ መነሳቱ ቢስተዋልም፤ ለጊዜውም ቢሆን ግን የነበረውን የፀጥታ ችግር ተግ ማድረጉ ይታወሳል።

    ተመሳሳይ ውጤት እንዳይጠበቅ የሚያደርጉ ምክንያቶችን ሲዘረዝሩ ከሁለት ዓመት በፊት እና አሁን ያለው መንግሥት አንድ ዓይነት ያለመሆኑን አቶ ሃሌሉያ ያነሳሉ። ይህም በተለይ በክልል መንግሥታት ላይ ይንፀባረቃል ባይ ናቸው።

    ከዚህም ባሻገር "ሕዝብ ለሦስት እና ለአራት ዓመት መንግሥትን እየተቃወመ ሲቀጥል በራስ መተማመኑ እየጨመረ ፤ ጥያቄዎቹ ይበልጥ ግልፅ እየሆኑ፤ የተቃውሞ መዋቅር ኢመደበኛ የሆኑ አደረጃጀቶች እየተፈጠሩ ይሄዳሉ።" ይላሉ።

    ቀዳሚው የአስቸኳይ ጊዜ አዋጅ ከፍተኛ ሐገራዊ ድንጋጤ የቅስም መሰበር እና ሐዘን ከፈጠረው የእሬቻ ክብረ በዓል ክስተት ማግስት መምጣቱ ወዲያውኑ ለተፈጠረው ፀጥታ አንድ እርሾ እንደነበረም ጨምረው ይናገራሉ አቶ ሃሌሉያ።

    ቀጣዮቹ አስራ አምስት ቀናት ከፍተኛ ወሳኝነት እንዳላቸው ይታመናል። በዚህ ጊዜ ውስጥ አዋጁ ለሕዝብ ተወካዮች ምክር ቤት ቀርቦ በሁለት ሦስተኛ ድምፅ መፅደቅ ይኖርበታል።

    የፖለቲካ እና የፀጥታ ሁኔታ ተንታኙ አዋጁ የፓርላማውን ይሁንታ አግኝቶ ቢፀድቅም እንኳ ለታሰበለት የስድስት ወራት ይዘልቃል የሚል እምነት የላቸውም።

    ከባለፈው ዓመት ተሞክሮ በመነሳት አዋጁ እንደተባለውም ለስድስት ወራት ያህል ሥራ ላይ ከዋለ በአገሪቱ ምጣኔ ኃብት ላይ ጫና ማሳደሩ እንደማይቀር መገመት ይቻላል።

    ይሁንና ገዥው ግንባር ጀምሬዋለሁ የሚለው የመታደስ እንቅስቃሴ እንዲሁም ለመገመት አዳጋችነቱ ከወትሮም እየበረታ የመጣውን የፖለቲካ መልክዓ ምድር ላይ ምንም ዓይነት አሻራ እንደሚያሳርፍ ወደፊት የሚታይ ይሆናል።

    ምንጭ፦ ቢቢሲ

    Read more »

  • ኢትዮጵያ በጅቡቲ ከምትገነባቸው መናኸሪያዎች የአንዱ ሥራ 15 ከመቶ ደርሷል ተባለ

                                  

    ኢትዮጵያ ከውጭ አገር ለምታስገባቸው ግብዓቶች ቅልጥፍና ይረዳት ዘንድ በጅቡቲ የደረቅ ጭነት መናኸሪያ ግንባታ 15 በመቶ የደረሰ ሲሆን፤ የፈሳሽ ጭነት መናኸሪያ ለመገንባት 20 ሚሊዮን ብር ቢመደብም የተሰጠው ቦታ ውዝግብ በማስነሳቱ ሥራውን ለመጀመር መቸገሩን የፌዴራል ትራንስፖርት ባለሥልጣን አስታወቀ፡፡
    የባለሥልጣኑ የኮርፖሬት ሥራዎች ዘርፍ ምክትል ዋና ዳይሬክተር አቶ ዮሐንስ በቀለ እንደተናገሩት፤ በአሁኑ ወቅት በጅቡቲ በመገንባት ላይ ያለው የከባድ ጭነት መናኸሪያ በቻይና ሥራ ተቋራጭ ኩባንያ እየተከናወነ ሲሆን፤ በተያዘለት የ94 ሚሊዮን ብር በጀት ግንባታው 15 ከመቶ ደርሷል፡፡ የአፈር ናሙና ጥናት በመከናወኑም አስፋልት የማንጠፍ ሥራውን ለማከናወን በቅርቡ ሥራ ይጀመራል፡፡
    በጅቡቲ የሚገነባውና በዚህ ዓመት 40 ሚሊዮን ብር በጀት የተያዘለት በጠጠር የሚገነባው ሁለተኛው መናኸሪያ በቦታው ላይ 30 ከመቶ የሚሆነው መሬት ‹‹ኳሪ›› ድንጋይ በመገኘቱ ተቋራጩ ለድንጋይ ማውጫ 1ሺ400 ብር በመጠየቁና በሜትር ኪዩብ 560 ብር እንደሚከፈለው ቢገለፅለት ባለመስማማቱ ሥራው መቋረጡን ምክትል ዋና ዳይሬክተሩ ገልፀዋል፡፡
    ምክትል ዋና ዳይሬክተሩ በጅቡቲ የሚገነባው የፈሳሽ ጭነት መናኸሪያ ሥራን ለማፋጠን ቢታቀድም የጅቡቲ መንግሥት ቀደም ሲል ለግንባታው የሰጠው ቦታ ውዝግብ ስለፈጠረ በባለሥልጣኑ የማግባባት አቅም ብቻ መፍትሄ ማምጣት አዳጋች መሆኑን፤ በዚህ ምክንያትም ዲዛይን ለማሠራት ጨረታ ማውጣት እንዳልተቻለ ገልፀው፤ በጅቡቲ ኢትዮጵያ አምባሳደር መፍትሄ ለመስጠት ከሚመለከታቸው አካላት ጋር ከፍተኛ ጥረት ቢያደርጉም ሊሳካ ባለመቻሉ የመንግሥት ጣልቃ ገብነት እንደሚያስፈልግ ተናግረዋል፡፡

    ምንጭ፦አዲስ ዘመን

    Read more »

  • የአስቸኳይ ጊዜ አዋጅ ለ6 ወራት እንሚቆይ ተገለጸ

                                   

    አርብ ምሽት የታወጀው የአስቸኳይ ጊዜ አዋጅ ለስድስት ወራት የሚቆይ መሆኑን የመከላከያ ሚኒስትሩ አቶ ሲራጅ ፈጌሳ አስታወቁ::

    የሚኒስትሮች ምክር ቤትም ውሳኔውን በሙሉ ድምፅ እንደተቀበለውና: በሃገሪቱ ባለው የፀጥታ ችግር ምክንያት የሽግግር መንግሥት ማቋቋም አስፈላጊ እንዳልሆነ ሚኒስትሩ ተናግረዋል::

    በሃገሪቱ ያለው የፀጥታ ችግር እየተባባሰ መሆኑን ዛሬ ቅዳሜ በሰጡት ጋዜጣዊ መግለጫው ላይ የተናገሩት ሚኒስትሩ ችግሩ በዋና ከተማዋ በአዲስ አበባም መንፀባረቁን ገልፀዋል::

    ሚኒስትሩ እንዳሉት ኢህአዴግ ለ17 ቀናት ባደረገው ግምገማ ላይ ያለው ችግር በ15 ቀናት ውስጥ ካልተፈታ የአስቸኳይ ጊዜ ሊታወጅ እንደሚችል ቀደም ሲል ከስምምነት ላይ ተደርሶ እንደነበር ጠቁመዋል::

    ለስድስት ወራት የሚቆየው የአስቸኳይ ጊዜ አዋጅ በየጊዜው የሚገመገም ሲሆን አስፈላጊ ሆኖ ከተገፕ ለአራት ወራት ሊራዘም እንደሚችልም ተገልጿል::

    አዋጁ በሁለት ሳምንት ጊዜ ውስጥ ለሕዝብ ተወካዮች ምክር ቤት እንደሚቀርብ የተናገሩት ሚኒስትር ሲራጅ: የአስቸኳይ ጊዜ አዋጁን የሚከታተል ኮማንድ ፖስት ተቋቁሟል::

    ኮማንድ ፖስቱ በጠቅላይ ሚኒስትሩ የሚመራ እንደሆነም ተገልጿል::

    ምንጭ፦ ቢቢሲ

    Read more »

  • የአስቸኳይ ጊዜ አዋጅ ታወጀ

                                                             

    የአስቸኳይ ጊዜ አዋጅ ታወጀ።

    በሃገሪቷ የተከሰተውን ፖለቲካዊ አለመረጋጋት ለመቀልበስ የሚንስትሮች ምክር ቤት ከዛሬ ጀምሮ የሚተገበር የአስቸኳይ ጊዜ ማወጁን አስታወቀ።

    አዋጁ የዜጎች ዴሞክራሲያዊ እና ፖለቲካዊ መብቶች ላይ ገደብ ይጥላል የሚል ስጋት ፍጥሯል።

    በኢፌዴሪ ሕገ መንግሥት አንቀጽ 93 መሰረት የሚንስትሮች ምክር ቤት የአስቸኳይ ጊዜ አዋጅ ማወጅ ይችላል።

    የአስቸኳይ ጊዜ አዋጁን አተገባበር በሚመለከት ዝርዝር መረጃ ቅዳሜ የካቲት 10 ይወጣል ተብሎ ይጠበቃል።

    የሚንስትሮች ምክር ቤት ዓርብ ከሰዓት መግለጫ እንደሚሰጥ ተገልጾ ሲጠበቅ ቢቆይም፤ ከስድስት ሰዓታት ቆይታ በኋላ ለጋዜጠኞች የተባለው መግለጫ ሳይሰጥ ቀርቶ አንዲበተኑ ተደርጎ ነበር።

    ምሽት ሁለት ሰዓት ላይ የመንግሥት መገናኛ ብዙሃን ያለ ተጨማሪ ማብራሪያ አዋጁ እንደታወጀ ዘግበዋል።

    ከአንድ ዓመት ቀደም ብሎ ለዘጠኝ ወራት የዘለቀ የአስቸኳይ ጊዜ አዋጅ በመላው ሃገሪቱ ተግባራዊ እንደነበር ይታወሳል።

    ምንጭ፦ ቢቢሲ

    Read more »

  • ኮሎኔል ደመቀ ዘውዱ እና ንግስት ይርጋ ክሳቸው ተቋረጠ

                                                                             

    ኮሎኔል ደመቀ ዘውዱ እና ንግስት ይርጋ ክሳቸው ተቋረጠ።

    ከወልቃይት አማራ የማንነት ጥያቄ ጋር በተያያዘ በእስር ላይ ከነበሩት ሰዎች መካከል ኮሎኔል ደመቀ ዘውዱ እና ንግስት ይርጋ ጨምሮ ከአንድ መቶ በላይ እስረኞቸን ክሳቸው እንዲቋረጥ መደረጉ ተዘገበ።

    ኮሎኔል ደመቀ ዘውዱ እና ንግስት ይርጋ በተጨማሪ ተሻገር ወልደ ሚካኤል ጌታቸው አደመና አታላይ ዛፌ ይገኙበታል።

    ክሳቸው ከተቋረ ውስጥ ሃምሳ ስድስት የግንቦት ሰባት እንዲሁም አርባ አንድ ከኦነግ ጋር በተያያዘ የተከሰሱ ነበሩ።

    በሌላ በኩል ደግሞ ብርጋዴር ጀነራል ተፈራ ማሞና አሳምነው ጽጌን ጨምሮ ሌሎች ግለሰቦች በይቅርታ እንዲፈቱ ጉዳያቸው እየታየ ነው።

    ምንጭ፦ ቢቢሲ

    Read more »

  • NEWS: በሻሸመኔ እስር ቤት በተነሳ እሳት የአንድ ሰው ሕይወት አለፈ

                                                  

    ዛሬ ጠዋት በሻሸመኔ በሚገኘው እስር ቤት ላይ በደረሰው የእሳት ቃጠሎ የአንድ ሰው ሕይወት ማለፉን፣ ሶስት ሰዎች መቁሰላቸውንና የእስረኞች ማደሪያ የነበረው ቤት በቃጠሎ መውደሙን የማረሚያ ቤቱ ኃላፊ ለቢቢሲ ተናግረዋል።

    የእስር ቤቱ ኃላፊ የሆኑት ከፍተኛ ኢንስፔክተር ፈይሳ ትክሴ እንደተናገሩት እሳቱ ከተነሳ በኋላ ለማምለጥ የሞከረ አንድ ታራሚም በጥይት ተገድሏል።

    ከማለዳው አንድ ሰአት ተኩል ላይ የተነሳው ቃጠሎ ምክንያት "እስረኞቹ ሆን ብለው የኤሌትሪክ ገመዶችን በማያያዝ ያስጀመሩት ነው"ብለዋል።

    በዚህ ማረሚያ ቤት ውስጥ በአጠቃላይ ወደ 2000 የሚጠጉ እስረኞች የሚገኙ ሲሆን ይጠቀሙበት ከነበረው አምስት ብሎኮች ሶስቱ በቃጠሎው ሙሉ በሙሉ መውደሙንም ከፍተኛ ኢንስፔክተሩ ተናግረዋል።

    በአሁኑ ሰአት ከአካባቢው ነዋሪዎች ጋር በመሆን እሳቱ ሙሉ በሙሉ በቁጥጥር ስር መዋሉን እና አሁን ለእስረኞቹ ማደሪያ በማመቻቸት ላይ መሆናቸውን ኃላፊው ጨምረው ገልፀዋል።

    ከአካባቢው ነዋሪዎች መካከል የአይን እማኝ ለቢቢሲ እንደተናገረው የማረሚያ ቤቱ አካባቢ በመካለከያ እና በኦሮሚያ ፖሊስ ጥበቃ እየተደረገለት ይገኛል።

    እንዲሁም ማለዳ ተዘግቶ የነበረው ከሻሸመኔ ወደ ሐዋሳ የሚወስደው ዋና መንገድ አሁን ተከፍቶ አገልግሎት መጀመሩን እና ከተማዋ በተረጋጋ ሁኔታ ውስጥ መሆኗንም ይህው የአይን እማኝ ተናግሯል።

    ምንጭ፦ ቢቢሲ

    Read more »