PLANET  ETHIOPIA.com

News


  • የታንዛኒያ መንግሥት ጦማሪያን እንዲመዘገቡ አዘዘ

                      

    የታንዛኒያ የኮሚዩኒኬሽን ተቆጣጣሪ ባለስልጣን በሃገሪቱ ያሉ ጦማሪያንና የድረ-ገፅ ባለቤቶች ሕጋዊ ሆነው ለመስራት በሁለት ሳምንት ጊዜ ውስጥ እንዲመዘገቡ አዘዘ።

    ይህ ባለፈው ወር በመንግሥት ተግባራዊ የሆነውን አወዛጋቢውን አዲስ ህግ ተከትሎ ፅሁፎችን ለመቆጣጠር ባለስልጣናት የወሰዱት ተጨማሪ እርምጃ ነው።

    ይካሄዳል ለተባለው ምዝገባ በኢንተርኔት የድምፅና የቪዲዮ መልዕክቶችን የሚያስተላልፉ ሰዎችን ጨምሮ ሁሉም የድረ-ገፅ ባለቤቶችና ጦማሪያን አንድ ሺህ ዶላር ያህል መክፈል ይጠበቅባቸዋል።

    በተጨማሪም ሁሉም ተመዝጋቢ የተከለከሉ ይዘቶችን ለመቆጣጠር የሚያስችል አሰራርን መዘርጋት ሲኖርባቸው፤ የተጠቃሚዎችን የመታወቂያ ካርድ ዝርዝርና የኢንተርኔት አድራሻን ጨምሮ ሌሎች መረጃንም መዝግቦ የመያዝ ግዴታ አለበት።

    ይህንን ደንብ ተላልፎ የሚገኝ ማንኛውም ሰው እስከ ሁለት ሺህ ዶላር በሚደርስ የገንዘብ ቅጣት ወይም ከአንድ ዓመት ባላነሰ የእስር ቅጣት ወይም በሁለቱም ሊቀጣ ይችላል።

    ይህን እርምጃ በርካታ የመብት ተሟጋቾች፣ የድረ-ገፅ ይዘት አቅራቢዎችና ተጠቃሚዎች፤ መንግሥት ሃሳብን በነፃነት የመግለፅን መብት ለመጫን ይጠቀምበታል በማለት እየከሰሱ ነው።

    ነገር ግን መንግሥት ይህንን እርምጃ የወሰደው ሀገሪቱን ከሀገር ውስጥና ከውጪ ከሚመጡ ያልተፈለጉ የድረ-ገፅ ይዘቶች ለመከላከል እንደሆነ ይናገራል።

    ምንጭ፦ ቢቢሲ

    Read more »

  • ፈረንሳይ ስደተኞችን የተመለከተ ጥብቅ ሕግ አወጣች

                      

    የፈረንሳይ ብሄራዊ ምክር ቤት በጥገኝነት ጠያቂዎች ዙሪያ ያለውን ደንብ የሚያጠብቅ ጠንካራ የስደተኞች ሕግ አፀደቀ።

    ሕጉ ጥገኝነት ለሚጠይቁ ሰዎች ጥያቄ የሚያቀርቡበትን የጊዜ ገደብ ያሳጠረ ሲሆን ሕገ-ወጥ ስደተኞች ሊታሰሩ የሚችሉበትን ጊዜ በእጥፍ እንዲጨምር አድርጓል። በተጨማሪም ወደ ፈረንሳይ በሕገ-ወጥ መንገድ የሚገቡ ስደተኞች አንድ ዓመት እንዲታሰሩ የሚያደርግ አዲስ ቅጣትንም አካቷል።

    የፕሬዝዳንት ኢማኑኤል ማክሮን ገዢ ፓርቲ እንዳለው አዲሱ ሕግ ያለውን ጥገኝነት የመጠየቂያ ሂደት ያፋጥነዋል።

    ነገር ግን ተቃዋሚ ፖለቲከኞችና የሰብአዊ መብት ተከራካሪ ድርጅቶች እንደሚሉት በሕጉ ላይ ያሉ እርምጃዎች ከተገቢው በላይ የተጋነኑ ናቸው ብለዋል።

    ይህ አዲስ ሕግ በ228 ድጋፍ፣ በ139 ተቃውሞና በ24 ድመፀ ተአቅቦ ማለፉም ተዘግቧል።

    በመቶ ዎች የሚቆጠሩ ማሻሻያዎች ከቀረቡበት በኋላ ነበር ሕጉ ባለፈው ሳምንት ማብቂያ ላይ ድምፅ የተሰጠበት።

    አንድ የፕሬዝዳንት ማክሮን ፓርቲ አባል አዲሱን ሕግ ተቃውመው ድምፅ የሰጡ ሲሆን 14 የሚሆኑት ደግሞ ድምፀ ተአቅቦ አድርገዋል።

    ሂዩማን ራይትስ ዋች የተባለው የሰብአዊ መብቶች ተሟጋች ድርጅት እንዳለው ጥገኝነት የመጠየቂያውን ጊዜ ማሳጠር "ለችግር ተጋላጭ የሆኑ ጥገኝነት ጠያቂዎች በተሰጠው ጊዜ ጥያቄያቸውን ማቅረብ ስለማይችሉ ጊዜው እንዲያልፍባቸው ሊያደርግ ይችላል" በማለት አዲሱ ሕግ አሉታዊ ውጤት ሊኖረነው እንደሚችል ስጋቱን ገልጿል።

    "ውጤታማ የጥገኝነት መጠየቂያ ሥርዓት በመዘርጋት ስም አዲሱ ሕግ ጥበቃ የማግኘት ዕድልን የሚያጠቡ ተከታታይ እርምጃዎችን አካቷል" ሲሉ የሂዩማን ራይትስ ዋች የፈረንሳይ ዳይሬክተር ቤኔዲክት ጂያኔሮድ በሰጡት መግለጫ ላይ ተናግረዋል።

    አዲሱ ሕግ በመጪው ሰኔ ወር ላይ ለፈረንሳይ የላይኛው ምክር ቤት ቀርቦ ውይይት ይደረግበታል።

    ማስታወሻ በስያሜ ላይ፡ ቢቢሲ ስደተኛ የሚለውን ቃል የሚጠቀመው ከሃገራቸው ወጥተው ጥገኝነት ለማግኘት የሚያስፈልገው ሕጋዊ ሂደት ላይ ላሉ ሰዎች ነው። በእዚህ ውስጥም ሶሪያን ከመሳሰሉ በጦርነት ውስጥ ካሉ ሃገራት የሚመጡትንና ሌሎች ደግሞ መንግሥታት የኢኮኖሚ ስደተኞች የሚሏቸውን ሥራና የተሻለ ህይወትን ፍለጋ የሚሰደዱትን ያካትታል።

    ምንጭ፦ ቢቢሲ

    Read more »

  • የጀርመኑ ሶሻል ዴሞክራት ፓርቲ የመጀመሪያ ሴት መሪውን መረጠ

                     

    ጀርመንን በጥምር የሚመራው የጀርመኑ ሶሻል ዴሞክራቶች ፓርቲ በ154 ዓመት ታሪኩ የመጀመሪያዋን ሴት መሪ መረጠ።

    የቀድሞዋ የሌበር ፓርቲ ሚኒስትር አንድሪያ ኔህልስ የአምናውን ምርጫ ተከትሎ የለቀቀውን ማርቲን ሹልዝ ተክተዋል።

    የ47 ዓመት ዕድሜ ባለቤቷ አንድሪያ ኔህልስ የቀድሞ ፖሊስና የፍሌንስበርግ ግዛት ከንቲባ የሆኑትን ሲሞን ላንግን አሸንፈው ነው ለዚህ ስልጣን የበቁት።

    በሹመታቸውም ወቅት ባደረጉት ንግግር ማህበራዊ ፍትህን ለማስፈን እንዲሁም የማህበረሰቡን ደህንነት ለማስጠበቅ ቃል ገብተዋል።

    "በኢኮኖሚውና በገንዘቡ በኩል ትብብርን ለማምጣት መዋቅር ያስፈልገናል" ያሉትም የፓርቲው ስብሰባ ላይ ነው።

    ጨምረውም " በዚህ ሉላዊነት፣ ኒዎሊበራል ርዕዮተ-ዓለም በሰፈነበትና በጥነት ወደ ዲጂታል በሚቀየረው ዓለም ያጣነው ትብብርን ነው። እውነት ለመናገር በማህበራዊ ዴሞክራሲውም ይህንን አጥተናል" ብለዋል።

    ል ጋር እንዴት ይሰራሉ?

    የፓርቲው የግራ ክንፍ የሆነውን የወጣቱን ክንፍ በአንድ ወቅት የመሩት ኔህልስ ከንግድ ማህበራትም ጋር ቅርበት አላቸው።

    ግለሰቧ በደፋር ንግግራቸው የሚታወቁ ሲሆን፤ በአነድ ወቅትም የቤት እመቤትም ሆነ የጀርመን ጠቅላይ ሚኒስትር የመሆን እቅድ እንደሌላቸው ተናግረው ነበር።

    በአውሮፓ ጥንታዊ የሆነውን የሶሻል ዴሞክራቲከ ፓርቲን 66 በመቶ ድምፅ አግኝተው ቢያሸንፉም፤ ይህ ውጤት ከሁለተኛው የዓለም ጦርነት በኋላ የፓርቲው መሪ በዝቅተኛ ውጤት ሲያሸንፍ ሁለተኛው ነው ተብሏል።

    የፓርቲያቸው አባላትም ከወግ አጥባቂዋ አንጌላ ሜርኬል ጥምር ፓርቲ ጋር መቀላቀልን መደገፋቸውን አልተቀበሉትም።

    ሜርኬል በቀድሞዋ ምሥራቃዊ ጀርመን ያደጉ ሲሆን ኔህልስ ደግሞ በምዕራብ ጀርመን ነው። አሁንም ነዋሪነታቸው እዚያው ነው።

    ጠቅላይ ሚኒስትሯ ሜርኬል የህክምና ዶክተር ሲሆኑ የፓርቲው መሪ አንድሪያ ኔህልስ በጀርመን ሥነ-ፅሁፍ ዲግሪ አላቸው።

    ኔህልስ እንደ አንጌላ ሜርኬል ብቻቸውን የሚያሳድጓት የአንድ ልጁ እናት ሲሆኑ በእምነታቸውም ካቶሊክ ናቸው።

    ምንም እንኳን ሁለቱ ሴቶች የፖለቲካ ልዩነት ቢኖራቸውም የቅርብ ግንኙነት አላቸው ተብሏል።

    ምንጭ፦ ቢቢሲ

    Read more »

  • የተመድ የሰብዓዊ መብት ከፍተኛ ኮሚሽነር ዘይድ ራአድ ከእሁድ ጀምሮ ኢትዮጵያን ይጎበኛሉ

                     

    የተባበሩት መንግስታት ድርጅት የሰብዓዊ መብት ከፍተኛ ኮሚሽነር ዘይድ ራአድ በኢትዮጵያ ጉብኝት ሊያደርጉ ነው።

    ኮሚሽነሩ ከፊታችን እሁድ ጀምሮ በኢትዮጵያ የሚያደርጉት ጉብኝት ለሁለተኛ ጊዜ ሲሆን፥ የኢትዮጵያ መንግስት ባደረገላቸው ግብዣ መሰረት እንደሚመጡም ታውቋል።

    የተመድ የሰብአዊ መብት ከፍተኛ ኮሚሽነር ዘይድ ራአድ ከእሁድ ጀምሮ አራት ቀናት በሚያደርጉት ጉብኝትም ከኢፌዴሪ ጠቅላይ ሚኒስትር ዶክተር አብይ አህመድ ጋር ተገናኝተው የሚወያዩ ይሆናል።

    በተጨማሪም ከህዝብ ተወካዮች ምክር ቤት አፈ ጉባዔ፣ ከኢትዮጵያ ሰብዓዊ መብት ኮሚሽን ኮሚሽነር፣ ከሲቪክ ማህበራት ተወካዮች እና ከሌሎች ከፍተኛ የመንግስት ባለስልጣናት ጋር ተገናኝተው እንደሚወያዩም ይጠበቃል።

    በተጨማሪም የአፍሪካ ህብረት እና በተባበሩት መንግስታት የሰብአዊ መብት ድርጅቶች በሚያደረጉት ውይይት ላይም እንደሚካፈሉም ተነግሯል።

    ከውይይቱ በኋላም የአፍሪካ ህብረት ኮሚሽን ሊቀመንበር ሙሳ ፋቂ መሃመት እና እና የተመድ የሰብአዊ መብት ኮሚሽነር ዘይድ ራአድ በጋራ ጋዜጣዊ መግለጫ የሚሰጡ ይሆናል።
    ኮሚሽነሩ በአዲስ አበባ ዩኒቨርሲቲ በመገኘትም በሰብአዊ መብት ጉዳዮች ዙሪያ ማብራሪያ እንደሚሰጡም ይጠበቃል።

    የተመድ ከፍተኛ የሰብአዊ መብት ኮሚሽነሩ ዘይድ ራአድ ባሳለፍነው ዓመት ግንቦት ወር ወደ ኢትዮጵያ መምጣታቸው የሚታወስ ሲሆን፥ በወቅቱም በኢትዮጵያ ስላለው የሰብአዊ መብት አያያዝ ዙሪያ ከሀገሪቱ ጠቅላይ ሚኒስትር እና ከፍተኛ ባለስልጣናት ጋር መወያየታቸው ይታወሳል።

    በተጨማሪም በምስራቅ አፍሪካ ቀጠና ስላለው የሰብአዊ መብት ጉዳይ ላይም ከምስራቅ አፍሪካ ሰብዓዊ መብት ጉዳዮች ቢሮ ሃላፊዎች ጋር ተወያይተዋል።

    ኮሚሽነሩ ከፊታችን እሁድ ጀምሮ ለሁለተኛ ጊዜ በኢትዮጵያ የሚያደርጉት ጉብኝትም በኢትዮጵያ ሰብአዊ መብት ኮሚሽን ግብዣ የሚደረግ መሆኑን ተመድ አስታውቋል።

    ምንጭ:- ኤፍ ቢ ሲ(FBC)

    Read more »

  • ዜና እረፍት - ድምፃዊ ታምራት ደስታ ዛሬ በድንገት ሕይወቱ ማለፉ ተነገረ፡፡

                             

    (ትግስት ዘሪሁን)

    ድምፃዊ ታምራት ደስታ ዛሬ በድንገት ሕይወቱ ማለፉ ተነገረ፡፡

    ድምፃዊው ህመም ተሰምቶት መኪና እየነዳ ወደ ስላሴ ክሊኒክ ሲሄድ ድንገት ራሱን መሳቱንና በኋላም በአምቡላንስ ወደ ምኒልክ ሆስፒታል ተወስዶ ህይወቱ ማለፉ መረጋገጡን ሰምተናል፡፡

    ድምፃዊ ታምራት ደስታ ባለትዳርና የ5 ልጆች አባት ነበር፡፡

    ለቤተሰቡና ለአድናቂዎቹ መፅናናትን ይመኛል፡፡

    ምንጭ:- የሸገር FM 102.1 ሬዲዮ

     

    Read more »

  • የአንገት ህመምን የምናስታግስባቸው ቀላል መንገዶች?

                    

    መረጃዎች እንደሚጠቁሙት በዓለም አቀፍ ደረጃ 10 በመቶ ያህል አዋቂ ሰዎች በአንገት ህመም ይሰቃያሉ። 

    ከህሙማኑ መካከል 65 በመቶ በላይ ያህሉ በሽታው በህይወታቸው አንድ ጊዜ የሚጎበኛቸው ናቸው።

     ከአካል እንቅስቃሴ ማብዛት፣ ምቾት የሌለው መኝታና አቀማመጥ፣ ለረጅም ሰዓት በተመሳሳይ የሰውነት አቋም መቀመጥና ከፍተኛ ውጥረት የበሽታው መንስኤዎች እንደሆኑ ይገለፃል።

    አንድን ተግባር ረጅም ጊዜ ማከናዎን ለውጥረት የሚዳርግ ሲሆን፥ በተለይም ረጅም ጊዜ ኮምፒዩተር ላይ መቆየት ችግሩን ሊያበብሰው እንደሚችል ነው የተገለጸው።

    ይሁን እንጂ ችግሩን በቀላሉ በተፈጥሮአዊ መንገድ በቤታችን ውስጥ ማከም የምንችልባቸውን መንገዶች ብራይት ሳይድ ሚ አስቀምጧል።

    በጀርባና በጎን በመተኛት እረፍት ማድረግም የአንገት ህመምን ለማስታገስ የተሻሉ የመኝታ አማራጮች ናቸው ተብሏል።

    በረዶ የተሞላ የፕላስቲክ ከረጠት ህመሙ የሚሰማን የሰውነት ክፍል ላይ ለ15 ደቂቃዎች ያህል መያዝ ችግሩ በተከሰተበት የሰውነት ክፍል ላይ የደም ዝውወርን በማስተካክል የአንገት ህመምን የሚቀንስ እንደሆነ ታውቋል።                   

                   

    ነገር ግን በረዶውን በቀጥታ ከቆዳችን ጋር ንክኪ ካላው ቆዳችንን ሊጎዳው ስለሚችል ጥንቃቄ መደረግ እንዳለበትም መረጃው ያመለክታል። 

    በተመሳሳይ መልኩ ሩዝ ወይንም ስንዴ የተሞላ የሞቀ ቀረጢት ለ15 ደቂቃ ያህል ህመም የሚሰማን ቦታ ላይ ማስቀመጥ ሌላው የህመም መቀነሻ ዘዴ ሲሆን፥ በተለይም ጧት

    ከእንቅልፋችን እንደተነሳንና እንቅስቃሴ ከማድረጋችን በፊት ይህን ማድረጉ ጥሩ ውጤት እንዳለው በዘገባው ተግልጿል።

    ጨው ባለው ለብ ያለ ውሀ መታጠብ፣ ‘‘ቱርመሪክ’’ ሻይ በማር መጠጣት ለአንገት ህመም ማስታገሻ እንደሆኑም ተመላክቷል።

    ከላይ ከተዘረዘሩ መፍትሄዎች በተጨማሪ የአንገት አካባቢ ጡንቻዎችን በማንቀሳቀስ የአንገት ጡንቻዎችን በማጠንከር የአንገት ህመምን ለመቀነስ እንደሚቻልም ተጠቁሟል።

    የአቀማመጥ ስርዓትን አለማስተካከልና ለረጅም ጊዜ ስልክ ላይ መቀመጥ ለአንገት ህመም መሰረታዊ ምክንያቶች ናቸው ተብሏል።

                       

    በነዚህ ጉዳዮች የሚከሰቱ የአንገት ህመሞችን ለመቀነስ ፎጣ መጥቅለልና በአንገታችን ላይ በማስቀመጥ ጫፎቹን በእጅ በመያዝ ማጅራታችን ላይ እድርገን ወደ ፊታችን ትይዩ በጥንቃቄ በመሳብ የአንገት ጡንቻዎች ዘና እንዲሉ በማድረግ ህመሙን መቀነስ ይቻላል ተብሏል።

    የሁለት እጆቻችን መገጣጠሚያ ዙሪያ የአንገታችንና የአከርካሪ አካባቢዎችን በአውራ ጣቶቻችና በጠቋሚ ጣቶቻችን እየተጫን ከ4 እስከ 5 ሰከንዶች በመዳፋችንና በአውራ ጣታችን ጫፎች መጫንና ማሸት ተጨማሪው በቤት ውስጥ የአንገት ህመምን ለማከም የሚያስችል አማራጭ ነው።

    እነዚህን የአንገት ህመም ማስታገሻ መንገዶች ስንጠቀም በባለሙያ ምክር ብንታገዝ የበለጠ ውጤታማ እንደምንሆንም ዘገባው ያስረዳል።

    ምንጭ:- ኤፍ ቢ ሲ(FBC)

     

    Read more »

  • 95 በመቶው የአለም ህዝብ የሚተነፍሰው አየር የተበከለ ነው - ጥናት

                       

    የአለም ህዝብ ከሚተነፍሰው አየር 95 በመቶው ጤነኛ ያልሆነና የተበከለ ሲሆን፥ የችግሩ ተፅዕኖ በደሃ ሀገራት ጎልቶ እንደሚታይ አንድ ጥናት አመለከተ።

    በፈረንጆንቹ 2016 ከአየር ብክለት ጋር በተያያዘ የ6 ነጥብ 1 ሚሊየን ሰዎች ህይወት እንዳለፈ ነው ሪፖርቱ ያመለከተው። 

    የአየር ብክለት በስትሮክ፣ ልብ በሽታ፣ በከባድ ሳንባ በሽታና ካንሰር እንዲሁም በሌሎች በሽታዎች ለሚከሰት ሞት ዋና ምክንያት እንደሆነ ተነግሯል። 

    እንደ ሪፖርቱ የአየር ብክለት ከከፍተኛ የደም ግፊት፣ ስኳር እና ሲጃራ ማጨስ ቀጥሎ ለሞት ምክንያት በመሆን በአራተኛ ደረጃ ይገኛል።
    ይህ የአየር ብክለት ለመተንፈሻ አካላት በሽታ ምክንያት በመሆኑ ወጣቶችና ጎልማሶች በስራና በትምህርት ገበታቸው እንዳይገኙ ምክንያት ከመሆን አልፎ የበርካቶችን ህይወት እየቀጠፈ እንደሚገኝ ተገልጿል።

    ችግሩን ለመከላከል አስቸጋሪ ሁኔታ ቢያጋጥምም የአየር ብክለት የሚያደርሰውን ተፅዕኖ ለመቀነስ ጥሩ ውጤት እየታየ ነው ተብሏል። 

    በሪፖርቱ መሰረት በአለማችን ከአየር ንብረት ብክለት ጋር ተያይዞ ለሚከሰት 50 በመቶው ሞት ቻይናና ህንድ ዋነኞቹ ተጠያቂዎቹ እንደሆነ ተገልጿል።

    በህንድ ከአየር ብክለት ጋር ተያይዞ 1 ነጥብ 1 ሚሊየን ህፃናት በፈረንጆቹ 2016 ህይወታቸው እንዳለፈ ተጠቁሟል። 

    ቻይና በአሁኑ ወቅት የአየር ብክለትን በመቀነስ በኩል ለውጥ እያመጣች እንደሆነ የተገለፀ ሲሆን በሌሎች ሀገራትም ይህ ለውጥ እየታየ መሆኑ ታውቋል።

    በቤት ውስጥ ለምግብ ማብሰያነትና ሌሎች አገልግሎቶች የሚውሉት ከሰልና እንጨት በቤት ውስጥ ለሚከሰት አየር ብክለት ምክንያት እንደሆኑ ተነግሯል።

    በዚህ የተነሳ በደሀ ሀገራት የሚኖሩ ሰዎች በቤት ውስጥና በውጭ ላለው የአየር ብክለት እንደሚጋለጡ ሪፖርቱ ያሳያል።

    በህንድ ከአራቱ ሰዎች አንዱ እና በቻይና ከአምስቱ አንዱ በሁለቱ አየር ብክለት ምክንያት ህይወታቸው እንደሚያልፍ ነው የተነገረው። 

    የአለም ጤና ድርጅት በፈረንጆቹ 2017 ባወጣው ሪፖርት በአየር ብክለት ምክንያት 1 ነጥብ 7 ሚሊየን ህፃናት አምስት ዓመት ሳይሞላቸው ህይወታቸው እንዳለፈ አስታውቋል።

    በአየር ብክለት ምክንያት ተፅዕኖ ከሚደርስባቸው መካከል 92 በመቶዎቹ በደሀ ሀገራት የሚኖሩ ሰዎች ናቸው።

    ምንጭ:- ኤፍ ቢ ሲ(FBC)

    Read more »

  • ናሳ ከመሬት ጋር የሚመሳሰል ፕላኔት ፍለጋ አዲስ መንኮራኩር ሊያመጥቅ ነው

                          

    ናሳ ከመሬት ጋር የሚመሳሰል ሌላ ፕላኔት ፍለጋ መንኩራኩር ሊያመጥቅ መሆኑ ተሰምቷል።

    የአሜሪካው የጠፈር ምርምር ማእከል የሆነው ናሳ አዲስ የሚያመጥቀው መንኮራኩር “ቴስ” የሚል ስያሜ ያለው ሲሆን፥ በመሬት ዙሪያ የሚገኙ ፕላኔቶች ላይ አሰሳ እንደሚያደርግም ተነግሯል።

    መንኮራኩሩም አስከ 200 ሺህ የሚደርሱ ከዋክብቶችን የብርሃን መጠን በመለካት እስከ 20 ሺህ የሚደርሱ አዳዲስ ፕላኔቶችን ማግኘት አንደሚቻልም ናሳ ተስፋ አደርጓል።

    ከሚገኙት ውስጥም 500 የሚደርሱትፕላኔቶች ነብስ ላላቸው ነገሮች ለኑሮ ተስማሚ ሊሆኑ ይችላሉም ብሏል።

    ናሳ ከዚህ ቀደም ለመኖር አመቺ የሆኑ ከመሬት ጋር የሚመሳሰሉ ፕላኔቶችን ለማፈላለግ “ክለፐር” የተባለ መንኮራኩር ሲጠቀም ቆይቷል።

    ሆኖም ግን አሁን እንደ አዲስ የሚመጥቀው “ቴስ” የተባለው አዲሱ መንኮራኩር “ክለፐር” ከተባለው መንኮራኩር በ400 እጥፍ በሚበልጥ የማፈላለግ ስራ ይሰራል ነው የተባለው።

    “ክለፐር” ከተባለው መንኮራኩር ለ9 ዓመታት በነበረው ቆይታ 2 ሺህ 343 ከፕላኔት ጋር የሚመሳሰሉ ነገሮችን ያገኘ ሲሆን፥ ከእነዚህም ወሰጥ 30ዎቹ ከመሬት ጋር የተቀራረበ ቅርጽ እንዳላቸውም ተለይተዋል።

    በአሁኑ ወቅት ግን “ክለፐር” መንኮራኩር ነዳጅ እየጨረሰ በመምጣቱ እና ስራውንም በአግባቡ መከወን ስለተሳነው “ቴስ” በተባለው መንኮራኩር ተተክቷል።

    ምንጭ:- ኤፍ ቢ ሲ(FBC)

    Read more »

  • የተማሪዎቹን ስማርት ስልክ ለመሰናክል መለማመጃነት የሚጠቀመው የአሽከርካሪዎች ማሰልጠኛ

                     

    ማሪዎች የሚማሩትን ትምህርት በቀላሉ እንዲረዱ ለማድረግ በርካታ የማስተማሪያ ዘዴዎች እንዳሉ ይታወቃል።

    በቻይናዋ ሻንዶንግ ግዛት ዴዞሁ ከተማ የሚገኝ የአሽከርከርካሪ ማለማመጃ ትምህረት ቤት ደግሞ የተማሪዎቹን ስማርት ስልክ ለመለማመጃነት እየተጠቀመ መሆኑ ተሰምቷል።

    ማሰልጠኛው ተማሪዎቹ ስማርት ሰልካቸውን በተሰመረው ቢጫ መስመር ላይ እንዲያስቀምጡ በማድረግ መኪና ማቆም፣ እንዲሁም ከተሰመረላቸው መስመር ሳይወጡ ወደ ኋላ እና ወደ ፊት እንዲያሽከረክሩ ለማለማመድ እየተጠቀመ ነው ተብሏል።

    ልምምድ እያደረገ ያለው ተማሪም ከመስመሩ ከወጣ ስማርት ስልኩ የሚሰበርበት ይሆናል።

    ከዚህ የተነሳም በትምህርት ቤቱ ውስጥ የሚገኙ ተማሪዎች እያንዳንዱን የመሰናክል ተግባር እና ፈተና ጥንቃቄ በተሞላበት መንገድ እያለፉ ነው ተብሏል።

    የትምርት ቤቱ አለማማጆች እንደተናገሩት፥ ተማሪዎቻቸውን ለማለማመድ የተጠቀሙት ዘዴ ውጤታማ ሆኗል።

    ስማርት ስልክን በመጠቀም ልምምድ ማድረግ ከተጀመረ ጊዜ እንስቶ እስካሁን የተሰበረ ስማርት ስልክ አንደሌለም አለማማጆቹ ተናግረዋል።

    ምንጭ:- ኤፍ ቢ ሲ(FBC)

    Read more »

  • የቻይና ኢኮኖሚ ከተገመተው በላይ እድገት ማስመዝገቡ ተነገረ

                      

    የቻይና ኢኮኖሚ በአውሮፓውያኑ 2018 የመጀመሪያ ሩብ ዓመት ከተገመተው በላይ እድገት ማስመዝገቡ ተነገረ።

    የሀገሪቱ ኢኮኖሚ እንደ አውሮፓውያኑ አቆጣጠር ከጥር ወር እስከ መጋቢት ወር ባለስ ሶስት ወራት ውስጥ የ6 ነጥብ 8 በመቶ እድገት ነው ያስመዘገበው።

    ይህም በሩብ ዓመቱ ይመዘገባል ተብሎ ከተገመተው የ6 ነጥብ 5 በመቶ እድገት ብልጫ ማሳየቱ ነው የተነገረው።

    መረጃዎች እንደሚያመለክቱት የዓለማችን ሁለተኛ ባለግዙፍ ኢኮኖሚ ባለቤት የሆነችው ቻይና የኢኮኖሚ እድገቷ ቀጣይነት እንዲኖረው ካደረጉት ውስጥ ከፍተኛ የሆነ የሸማቾች ፍላጎት አንዱ መሆኑ ተጠቅሷል።

    ሆኖም ግን የእዳ መጠን ከፍ ማለት እና ሌሎችም ተያያዥ ጉዳዮች ወደፊት የሀገሪቱን ኢኮኖሚ ሊጎዱ ይችላሉ የሚሉ ሀሳቦችም ተነስተዋል።

    የሀገሪቱ መንግስትም ከፍ ያለውን የእዳ መጠን እና በሀገሪቱ የሚስተዋለውን የመኖሪያ ቤቶች ችግርን እድገቱን በማይጎዳ መልኩ ለማስተካከል እየታገለ መሆኑ ነው የተነገረው።

    ምንጭ:- ኤፍ ቢ ሲ(FBC)

    Read more »

  • በአማራ ክልል ለስራ ወደ ውጭ ሀገራት ለሚሄዱ ሰዎች የቅድመ ጉዞ ስልጠና መስጫ ማእከላት ተቋቋሙ

                      

    ዙፋን ካሳሁን

    በህጋዊ መንገድ ወደ ውጭ ሀገራት ለስራ ለሚሄዱ ሰዎች የቅድመ ጉዞ ስልጠና የሚሰጥባቸው ማእከላት ማቋቋሙን የአማራ ክልል ሰራተኛ እና ማህበራዊ ጉዳይ ቢሮ አሳውቋል።

    የቢሮው የህዝብ ግንኙነት ዳይሬክተር አቶ ደረጀ አበጀ ለፋና ብሮድካስቲንግ ኮርፖሬት እንደተናገሩት፥ ማእከላቱ የተቋቋሙት ባህርዳር እና ደሴ ላይ ነው።

    ለዚህም ተጓዞች ወደ እነዚህ ማእከላት ገብተው ከሚያገኙት የቅድመ ጉዞ ስልጠና በፊት በሶስት መስኮች ላይም ክልሉ ስልጠናዎችን እየሰጠ መሆኑን ዳይሬክተሩ ተናግረዋል።

    ስልጠና እየተሰጠባቸው ከሚገኙ ጉዳዮች መካከልም የቤት አያያዝ፣ የህፃናት እና አረጋውያን እንክብካቤ የሚሉት የሚገኙበት መሆኑንም አስታውቀዋል።

    ቢሮው በህጋዊ መንገድ ለስራ ወደ ውጭ ሀገራት ለሚሄዱ ሰዎች ስልጠናዎችን ከመስጠት ጎን ለጎንም ህገ ወጥ ስደትን የመከላከል እና የመቆጣጠር ስራዎችንም እየሰራ መሆኑን ገልጿል።

    ምንጭ:- ኤፍ ቢ ሲ(FBC)

    Read more »

  • በአሜሪካ በበሽታ ስጋት 207 ሚሊየን እንቁላሎች ከዘጠኝ ግዛቶች እንዲሰበሰቡ ታዘዘ

                     

    በዩናይትድ ስቴትስ ኢንዲያና ግዛት ውስጥ የሚገኝ የዶሮ እርባታ 207 ሚሊየን የሚደርሱ እንቁላሎች ከዘጠኝ ግዛቶች እንዲሰበሰቡ አዘዘ።

    ዕንቁላሎቹ ተቅማጥ፣ ራስምታት እና የሆድ ህመምን በሚያስከተል “ሳልሞኔላ” በተባለ ባክቴሪያ ተበክለዋል በሚል ስጋት ነው እንዲሰበሰቡ የታዘዘው።

    የሀገሪቱ የምግብና የመድሐኒት ተቆጣጣሪው መስሪያ ቤት እስከአሁን በባክቴሪያ 22 ሰዎች ተይዘው መታመማቸውን አስታውቋል።

    ሮዝ አክሪ የተባለው ድርጅት ዕንቁላሎቹ ለአከፋፋዮችና ለምግብ ቤቶች መሸጣቸው የተነገረ ሲሆን፥ ዘጠኝ ግዛቶች ውስጥ እንደተዳረሰም ተመልክቷል።

    መስሪያ ቤቱ በዘጠኙ ግዛቶች ውስጥ ለሚኖሩ ነዋሪዎች ዕንቁላሉን እንዳይመገቡ አስጠንቅቋል።

    ባክቴሪያው ከስጋ እና ከውሃ እንደሚመጣ የታወቀ ሲሆን፥ እንዲሁም የባክቴሪያው ተጠቂ የሆነች ዶሮ ወደ እንቁላሉ ታስተላልፋለች ነው የተባለው።

    ባክቴሪያው ከሰው ወደ ሰው በምራቅ እንዲሁም በመሳሳም እንደሚተላለፍ ተገልጿል።

    ይህ ባክቴሪያ እንደ አውሮፓውያን አቆጣጠር በ2010 በመቶዎች የሚቆጠሩ ሰዎችን ለህመም የዳረገ መሆኑና ግማሽ ቢሊየን ዕንቁላሎች እንዲሰበሰቡ ምክንያት መሆኑም የሚታወስ ነው።

    ምንጭ፦ ቢቢሲ

    Read more »

  • ፕሬዚዳንት ትራምፕ በወሩ መጨረሻ ከፕሬዚዳንት ቡሃሪ ጋር በኋይት ሃውስ ይወያያሉ

                      

    የአሜሪካው ፕሬዚዳንት ዶናልድ ትራምፕ ጋር በወሩ መጨረሻ ከናይጀሪያው አቻቸው ሙሃማዱ ቡሃሪ ጋር ሊወያዩ ነው።

    የመሪዎቹ ውይይት የዛሬ ሁለት ሳምንት የሚካሄድ ይሆናል ተብሏል።

    የኋይት ሃውስ ቃል አቀባይ ሳራ ሳንደርስ፥ ውይይቱ በፕሬዚዳንት ትራምፕ ግብዣ መሰረት እንደሚካሄድ ተናግረዋል።

    ዶናልድ ትራምፕ ከፕሬዚዳንት ቡሃሪ ጋር የሃገራቱን የሁለትዮሽ ግንኙነት ማጠናከር በሚያስችሉ ጉዳዮች ዙሪያ ይወያያሉም ነው ያሉት ቃል አቀባይዋ።

    ሽብርተኝነት፣ ኢኮኖሚያዊ እድገትና ማሻሻያዎች እና ሌሎች የፀጥታና የደህንነት ስጋት የሆኑ ጉዳዮች የመወያያቸው ነጥቦች ይሆናሉ ነው የተባለው።

    ከዚህ ባለፈም ናይጀሪያ በምዕራብ አፍሪካ ያላትን የመሪነት ሚና ማጠናከር በሚያስችሉ ጉዳዮች ላይም እንደሚመክሩ ይጠበቃል።

    ምንጭ፦ ቢቢሲ

    Read more »

  • ሮናልዲንሆ ጎቾ የአዲስ አበባ ቆይታውን አጠናቋል

     

                        ብራዚላዊው ኮከብ ሮናልዲንሆ ጎቾ የአዲስ አበባ ቆይታውን አጠናቋል።

    በሃይኒከን አማካኝነት ለሁለት ቀናት ቆይታ አዲስ አበባ የገባው ሮናልዲንሆ፥ ቆይታውን በአዲስ አበባ ስታዲየም ከተመልካቾች ጋር ከተገናኘና ከኢትዮጵያ የ20 ዓመት በታች የኢትዮጵያ ብሄራዊ ቡድን ጋር ለጥቂት ደቂቃዎች አብሮ ከተጫወተ በኋላ ነው። 

    ሙሉ ጥቁር ትጥቅ ለብሶ ወደ ሜዳ የገባው ሮናልዲንሆ በቆየባቸው ጥቂት ደቂቃዎች በአዲስ አበባ ስታድየም የተገኙ አድናቂዎቹን ያስገረሙ ክህሎቶቹን አሳይቷል። 

    የአለም ዋንጫ አሸናፊው ሮናልዲንሆ ጎቾ የሁለት ቀናት ቆይታውን አጠናቆ ነገ እንደሚመለስ ታውቋል።

    ጎቾ ትናንት የአውሮፓ ቻምፒየንስ ሊግ ዋንጫን በመያዝ ትናንት በሂልተን ሆቴል ጋዜጣዊ መግለጫ መስጠቱ ይታወሳል፤ ማምሻውን ከተመልካቾች ጋር በተዘጋጀ መድረክ ተዋውቋል። 

    ከጋዜጠኞች ለተነሱለት በርካታ ጥያቄዎች ምላሽ የሰጠ ሲሆን ወደ ኢትዮጵያ ሲመጣ ለመጀመሪያ ጊዜ መሆኑን ጠቅሶ፥ ስለ ሀገሪቱ የበለጠ ማወቅ እንደሚፈልግ ተናግሯል። 

    ከሰዓት በኋላ በነበረው ቆይታም የኢፌዲሪ ውጭ ጉዳይ ሚኒስትር ዶክተር ወርቅነህ ገበየሁ ብራዚላዊውን ኮከብ በጽህፈት ቤታቸው አነጋግረዋል። 

    በቆይታው የኢትዮጵያን ስም በታላላቅ አትሌቶቿ እንደሚያውቅ ገልጿል፤ በወቅቱም ከውጪ ጉዳይ ሚኒስትሩ ባህላዊው የጃኖ ልብስ ስጦታ ተበርክቶለታል።

    ምንጭ:- ኤፍ ቢ ሲ(FBC)

    Read more »

  • መንግስት የሃገሪቱን ሰላም ይበልጥ በማረጋገጥ የተቀዛቀዘውን ኢኮኖሚ ለማነቃቃት ይሰራል - ጠቅላይ ሚኒስትር ዶ/ር አብይ

                         

    መንግስት የሃገሪቱን ሰላም ይበልጥ በማረጋገጥ የተቀዛቀዘውን ኢኮኖሚ ለማነቃቃት እንደሚሰራ ጠቅላይ ሚኒስትር ዶክተር አብይ አህመድ ተናገሩ።

    ጠቅላይ ሚኒስትሩ ዛሬ በአዲስ አበባ ሚሊኒየም አዳራሽ 25 ሺህ ለሚሆኑ የተለያዩ የህብረተሰብ ክፍሎች ባስተላለፉት መልዕክት፥ መንግስት የሃገሪቱን ሰላም ይበልጥ በማረጋገጥ የተቀዛቀዘውን ኢኮኖሚ ለማነቃቃት እንደሚሰራ ተናግረዋል።

    ባለፉት አመታት ተፈጥሮ በነበረ ግጭት ሃገሪቱ ችግር ውስጥ ገብታ እንደነበር ያነሱት ጠቅላይ ሚኒስትሩ፥ ችግሩ በህዝቦች አብሮ የመኖርና የአንድነት ባህል መቀረፉን ጠቅሰዋል።

    በንግግራቸው የሃገሪቱ ሃብት ህዝቦቿ መሆኑን ጠቅሰው በሰላም እጦት ምክንያት በህዝቦች መካከል መቃቃር ተፈጥሮ የሃገሪቱ ኢኮኖሚያዊ እንቅስቃሴ እንዳይገታ፥ ሁሉም በሃገራዊ ሃላፊነት ለሃገሩ ዘብ እንዲቆም ጥሪያቸውን አቅርበዋል።

    ለኢኮኖሚው እድገት እንቅፋት የሆነውን የውጭ ምንዛሪ እጥረት ለመቅረፍም ጠንካራ ስራዎች እንደሚሰሩም ነው የተናገሩት።

    የማምረቻ ዘርፉን ማጠናከርና በተለይም የሃገር ውስጥ ባለሃብቶችን አቅም በማጠናከር ምርቶችን በማብዛት ወደ ሃገር ውስጥ የሚገባውን ምርት ለመቀነስ በትኩረት እንደሚሰራም ገልጸዋል።

    በተጨማሪም ለውጭ ምንዛሪ ብክነት ምክንያት እየሆኑ ባሉ ግዙፍ የመንግስት ፕሮጀክቶች ላይ ክትትል በማድረግ የሚታዩ ክፍተቶችን ለመቅረፍ የእርምት እርምጃ እንደሚወሰድም አስረድተዋል።

    መንግስት አሁን ላይ በህዝቡ ዘንድ የታየውን ተስፋ እውን ለማድረግ በጽናት እንደሚሰራ ጠቅሰው፥ ህዝቡም ባለፉት አመታት በአንዳንድ አካባቢዎች ተፈጥሮ በነበረው ግጭት የተጎዳውን ኢኮኖሚ ለመካስ መስራት ይገባዋል ብለዋል።

    በአገልግሎት አሰጣጡ ላይ የሚታዩ ቅሬታዎችን ለመፍታትም የአገልጋይነት መንፈስን የተላበሰና ሙስናና ብልሹ አሰራርን የሚጠየፍ ሰራተኛ ለመፍጠር ይሰራል ነው ያሉት።

    በተቋማት የሚደረገው ምደባ ዕውቀትና ክህሎትን መሰረት ያደረገ እንደሚሆን ጠቅሰው፥ በዚህም የመንግስት የማስፈጸም አቅም ይሻሻላል ያሉት ጠቅላይ ሚኒስትሩ።

    በተንዛዛ ስብሰባ የሚባክን ጊዜና ሃብትን ለማስቀረትና የህዝቡን ጥያቄ መመለስ የሚያስችል በዘመናዊ ቴክኖሎጅ የታገዘ መንግስታዊ አሰራር እንዲኖር እንደሚደረግም ገልጸዋል።

    ከትምህርት ጋር ተያይዞም የትምህርት ጥራት ላይ ያተኮረ ፍኖተ ካርታ በማዘጋጀት የየትምህርት ጥራትን ለማሻሻል ጥረት እንደሚደረግም አውስተዋል።

    በመስኖ ልማት፣ በአርሶና አርብቶ አደር አካባቢዎች እንዲሁም ታዳጊ ክልሎች ድጋፍ በማድረግ ዘርፉን የግብርናውን ዘርፍ ለማሳደግ ጥረት ይደረጋልም ነው ያሉት።

    በዲፕሎማሲው መስክም መርህን መሰረት ያደረገ መልካም ግንኙነት በተለይም ከአፍሪካውያን ሃገራት ጋር በመመስረት፥ በምስራቅ አፍሪካ ሰላምና መረጋጋት እንዲሰፍን የምንጫወተውን ሚና አጠናክረን እንቀጥላለምን ብለዋል ዶክተር አብይ።

    ዴሞክራሲያዊ ስርዓቱ እንዲጎለብት ተፎካካሪ የፖለቲካ ፓርቲዎች መጠናከር እንደሚኖርባቸው ጠቅሰው፥ ቀጣዩን ምርጫ ነጻ፣ ፍትሃዊና ታማኝ ለማድረግ መንግስት በቅንጅት እንደሚሰራ አስረድተዋል።

    የፍትህ ስርዓቱ ላይ ለውጡ የሚያመጡ የመፍትሄ እርምጃ እንደሚወሰድ ያነሱት ጠቅላይ ሚኒስትር ዶክተር አብይ፥ ስርዓቱ የህግ የበላይነት የሚረጋገጥበት፣ ከፖለቲካ ወገንተኝነት የፀዳና ህዝቡ ትክክለኛ ፍርድ የሚያገኝበት እንዲሆን እንደሚደረግ አስታውቀዋል።

    ከዚህ ባለፈም ለቅሬታ ምንጭ የሆኑ አንዳንድ ህጎች ላይ ማሻሻያ እንደሚኖር ጠቅሰዋል።

    የፀጥታና የደህንነት ተቋማትም ከፖለቲካ ወገንተኝነት ነጻ ሆነው ህገ መንግስታዊ ስርዓቱን የሚጠብቁ እንዲሆኑ ይሰራል ሲሉም በመልዕክታቸው አንስተዋል።

    የሚዲያ ተቋማትም በሃገር ግንባታ፣ ሰላም እና ልማትን ከማረጋገጥ አኳያ እንዲሁም ከወጣቶች የስራ እድል ፈጠራ ጋር በተያያዘ ያለባቸውን ሃላፊነት ሊወጡ እንደሚገባም ጠቁመዋል።

    የሃይማኖት መሪዎችም ትውልድ በመቅረጽ፣ ሰርቆ የመክበር አካሄድን እና ሙስናን በማውገዝ፥ የኪነ ጥበብ ባለሙያዎች እሴቶችን በሚያጠናክሩ ጉዳዮች ላይ በማተኮር እንዲሁም መምህራን ትውልድን በመቅረጽ ላይ ትኩረት እንዲያደርጉም መልዕክታቸውን አስተላልፈዋል።

    ለወጣቶች ባስተላለፉት መልዕክት ደግሞ ወጣቶች የሃገሪቱ የለውጥ አንቀሳቃሾች መሆናቸውን ተረድተው ለሃገር እድገትና ግንባታ የድርሻቸውን እንዲወጡ ጠይቀዋል።

    ካለፉ ታሪኮች ለሃገር እድገትና ግንባታ የሚበጀውን በመውሰድ መስራት ይገባል ያሉት ጠቅላይ ሚኒስትሩ፥ በወጣትነት ያለውን ልዩ ሃይል ሃብት ለማፍራትና ሃገራዊ እድገት ለማምጣት መጠቀም እንደሚገባም አጽንኦት ሰጥተዋል።

    ጠቅላይ ሚኒስትሩ በንግግራቸው አካል ጉዳተኞችን በሚደረገው ሃገራዊ የሃገር ግንባታ በማሳተፍም ተጠቃሚነታቸውን ለማጎልበት ይሰራል ብለዋል።

    በመጨረሻም መላው የሃገሪቱ ህዝቦች ለሰላምና ሃገራዊ አንድነትን ለማምጣት በሚደረገው ጥረት ዘብ በመቆም የሃገሪቱን ኢኮኖሚያዊ ጉዞ ለማሳደግ ሊሰሩ እንደሚገባም ጥሪያቸውን አቅርበዋል።

    ምንጭ:- ኤፍ ቢ ሲ(FBC)

    Read more »

  • እስራኤል ረጅሙን የጋዛ ዋሻ አፈረሰች

                   

    ከጋዛ ሰርጥ ወድ እስራኤል የሚወስድው እና በሽምቅ ተዋጊዎች የተቆፈርውን ዋሻ የእስራኤ ጦር ከጥቅም ውጪ ማድረጉን አስታወቀ።

    የእስራኤሉ መከላከያ ሚኒስትር አቪጎር ሊበርማን እንዳሉት ይሄኛው እስራኣኤል ከደረሰችባቸው ሁሉ ረጅሙ እና በጣም ጥልቁ ዋሻ ነው።

    ዋሻው በ2014 ከተካሄደው የጋዛ ጦርነት ጀምሮ እንደተቆፈረ እና በጊዜውም እስራኤል ከ 30 በላይ የሚሆኑ ዋሻዎችን ማፈራረሷን አንድ የእስራኤል ወታደራዊ ቃል አቀባይ ተናግረዋል።

    እንደ ቃል አቀባዩ ኮሎኔል ጆናታን ኮንሪከስ ከሆነ፤ ዋሻው በሃማስ የተቆፈረ እንደሆነና በሰሜናዊ ጋዛ ሰርጥ ጃባሊያ አካባቢ የተጀመረ ነው። ዋሻው በናሆል ኦዝ አቅጣጫ ጠቂት የማይባሉ ሜትሮች ወደ እስራኤል እንደገባና መውጫ ግን ገና እንዳልተሰራለት ኮሎኔል ጆናታን አክለዋል።

    ዋሻው ወደ ጋዛ በብዙ ኪሎሜትሮች የተዘረጋ ሲሆን፤ ከሌሎች ዋሻዎችም ጋር የተገናኘና ጥቃት ለመፈጸም ምቹ ነበር ነው ብለዋል።

    እስራኤል በሳምንቱ መጨረሻ ነው ዋሻውን ከጥቅም ውጪ ያደረገችው። ቃል አቀባዩ ሲናገሩም ''ዋሻው ለረጅም ጊዜ ጥቅም እንዳይሰጥ በሚያደርግ መሳሪያ ሞልተነዋል'' ብለዋል።

    በቅርብ ወራት ውስጥ እስራኤል ካፈራረሰቻቸው የጋዛ ዋሻዎች መካከል ይህ አምስተኛው ነው።

    አንዳንዶቹ ዋሻዎች በፍልስጤም እስላማዊ ጂሃድ ታጣቂ ቡድን የተሰሩ ሲሆን ሌሎቹ ደግሞ ጋዛን በተቆጣጠረው የሃማስ እስላማዊ ቡድን የተቆፈሩ ናቸው።

    ከባለፈው አመት ጀምሮ እስራኤል ዋሻዎችን መለየት የሚችል ልዩ መሳሪያ እየተጠቀመች ሲሆን በአሁኑ ሰአት ደግሞ በአዋሳኟ ጋዛ በኩል የሚቆፈሩ ዋሻዎችን ለማስቆም በከፍተኛ ቴክኖሎጂ የተራቀቀ የምድር ውስጥ መከላከያ እየገነባች ነው።

    ምንጭ፦ ቢቢሲ

    Read more »

  • በአንድነትና በመተሳሰብ ስሜት ለጠቅላይ ሚኒስትሩ ድጋፍ እናደርጋለን - አስተያየት ሰጪዎች

                   

    አዲስ አበባ ሚያዝያ 7/2010 በአንድነትና በመተሳሰብ ስሜት ለጠቅላይ ሚኒስትር ዶክተር አብይ አህመድ ድጋፍ እንደሚያደርጉ በሚሊኒየም አዳራሽ የተገኙ የተለያዩ የህብረተሰብ ክፍሎች ተናገሩ።

    ጠቅላይ ሚኒስትር ዶክተር አብይ አህመድ ማምሻውን 25 ሺህ ከሚሆኑ ከተለያዩ የህብረተሰብ ክፍሎች ተወካዮች ጋር በሚሊኒየም አዳራሽ ይወያያሉ።

    በአዳራሹ የተገኙት የውይይቱ ተሳታፊዎች የጠቅላይ ሚኒስትሩን መምጣት በጉጉት በመጠባበቅ ላይ ናቸው።

    ኢዜአ ያነጋገራቸው አስተያየት ሰጪዎች የአዲሱ ጠቅላይ ሚኒስትር የስራ ዘመን ስኬታማ እንዲሆን በሙሉ አቅማቸው እንደሚደግፏቸው ነው የገለጹት።

    የመዲናዋ ነዋሪ አቶ አማኑኤል ሙላቱ ባለፉት ጊዜያት አገሪቷ ሁከትና አለመረጋጋት ውስጥ ገብታ እንደነበረ አስታውሰው በተደረገው ሰላማዊ የስልጣን ሽግግር ወደ ቀድሞ ሰላሟ እየተመለሰች ነው ብለዋል።

    አዲሱ ጠቅላይ ሚንስትርም የገቡትን ቃል ለመፈጸም በጊዜ የለኝም መንፈስ መስራት ይጠበቅባቸዋል ካሉ በኋላ እርሳቸውም በሚችሉት አቅም የሚጠበቅባቸውን ሃላፊነት እንደሚወጡና ድጋፍ እንደሚያደርጉ ተናግረዋል።

    ወይዘሮ ዘነበች ወልደሰማያት የጠቅላይ ሚኒስትሩን መምጣት በጉጉት እየተጠባበቁ መሆናቸውንና በአዳራሹ ውስጥ ያለውም ድባብ ይህንኑ እንደሚያንፀባርቅ ነው የተናገሩት።

    ህብረተሰቡ በፍቅር፣ በመተሳሰብና በአንድነት በመቆም ለጠቅላይ ሚኒስትሩ ድጋፍ ሊያደርግ ይገባል ያሉት ወይዘሮዋ እርሳቸውም ለዚህ ዝግጁ መሆናቸውን አክለዋል።

    ጠቅላይ ሚኒስትሩ ከህብረተሰቡ ለሚቀርቡላቸው ጥያቄዎች የሚሰጡትን ምላሽ ለማድመጥ መጓጓታቸውን የገለጹት ደግሞ አቶ ለታ ተመስገን ናቸው።

    እርሳቸውም የጠቅላይ ሚኒስትሩ የስራ ዘመን ስኬታማ እንዲሆን እንደ ዜጋ የሚጠበቅበትን ድጋፍ እንደሚያደርጉ ተናግረዋል።

    ጠቅላይ ሚኒስትሩ ከህብረተሰቡ ተወካዮች ጋር የሚያደርጉት ወይይት “የፍቅርና የአንድነት ኪዳን” የሚል መሪ ሃሳብ የተሰጠው ሲሆን፤ አንድነትና የዴሞክራሲ ስርዓትን ለማጎልበት ከህዝብ ጋር ተቀራርቦ ለመስራት እንደሚያግዝ ታምኖበታል።

    በመድረኩ የፌዴራል፣ የክልልና የሁለቱ ከተማ አስተዳደሮች ከፍተኛ የሥራ ሃላፊዎች፣ የሃይማኖት አባቶች፣ ምሁራንና የዲፕሎማቲክ ማህበረሰቡ ተወካዮች እንደሚታደሙ እየተጠበቀ ነው።

    ምንጭ፦ ኢዜአ

    Read more »

  • በማስታገሻ ብቻ የሚታከሙ እስረኞች

                        

    እስረኞች ችሎት ላይ ከሚያሰሟቸው አቤቱታዎች ህክምና ማግኘት አለመቻል ዋናው እንደሆነ ቀደም ሲል ታስረው የነበሩና የፍርድ ቤት ውሎ ዘጋቢ ጋዜጠኞች ይናገራሉ።

    እነሱ እንደሚሉት በአንደኛ ደረጃ የሚቀርበው አቤቱታ ቀጠሮ ረዘመብን ሲሆን ህክምና ማግኘት አልቻልንም የሚለው ደግሞ ሁለተኛው ነው።

    ከቅርብ ጊዜዎቹ የኦሮሞ ፌደራሊስት ኮንግረስ ተቀዳሚ ሊቀመንበሩ አቶ በቀለ ገርባ በእስር ሳሉ የአይን ህክምና ማግኘት አለመቻላቸውን በተመለከተ ያሰሙት አቤቱታ ሊጠቀስ ይችላል።

    ጋዜጠኛ ተመስገን ደሳለኝ ምንም እንኳ ከባድ የጀርባ ህመም የነበረበት ቢሆንም ህክምና እንዳላገኘ ወንድሙ ታሪኩ ደሳለኝ ተናግሮ ነበር።

    ከፖለቲካ ጋር በተያያዘ ለታሰሩ ብቻ ሳይሆን ለሁሉም እስረኛ ይሄኛው ያኛው እስር ቤት ሳይባል ህክምና ማግኘት ከባድ እንደሆነ ያነጋገርናቸው ያስረዳሉ።

    ከአመታት በፊት ከሙስና ጋር በተያያዘ የታሰሩት የአዲስ ካርዲያክ ሆስፒታል ባለቤት ዶ/ር ፍቅሩ ማሩም ከህክምና ጋር በተያያዘ አቤቱታ አሰምተው እንደነበር ይታወሳል።

    ህመም ማስታገሻ-ዋናው ህክምና

    ጫልቱ ታከለ ከአመታት በፊት የሃገርን ፖለቲካና ግዛት አንድነት በመንካት በሚል ተከሳ 12 አመት ተፈርዶባት 8 ዓመት ከ45 ቀን ታስራ በአመክሮ ወጥታለች።

    እንደገና በሽብር ተከሳ 11 ወር ከታሰረች በኋላ መንግስት በቅርቡ እስረኞችን ሲለቅ እሷም ክሷ ተቋርጦ ከእስር ወጥታለች።

    2001 ዓ.ም ላይ ከነበረችበት ማእከላዊ ወደ ቃሊቲ ስትዘዋወር ህክምና ማግኘት እንደምትፈል መጠየቋን ታስታውሳለች።

    "ማእከላዊ ጆሮዬን ተመትቼ ስለነበር በጣም ያመኝ ይደማም ነበር" የምትለው ጫልቱ ምንም እንኳ የፖለቲካ እስረኞች ላይ ነገሩ ቢከፋም በጤና ጣቢያ ወይም በሆስፒታል ህክምና ማግኘት ለማንኛውም እስረኛ ከባድ እንደሆነ ትናገራለች።

    እሷ እንደምትለው የቱን ያህልም ህመማቸው የበረታ ቢሆን እስረኞች በተደጋጋሚ የህመም ማስታገሻ እንዲወስዱ እንጂ በቀላሉ ሪፈር አይፃፍላቸውም።

    እሷም በተመሳሳይ መልኩ ህመም ማስታገሻ ወስዳ ሊሻላት ስላልቻለ በተደጋጋሚ ጠይቃ በመጨረሻ የካቲት 12 ሆስፒታል እንድትታከም መደረጉን ትናገራለች።

    "የሞት ወይም እድሜ ልክ ፍርደኛ ለሆነ የፖለቲካ እስረኛ ወጥቶ በመንግስት ሆስፒታል መታከም የሚታሰብ አይደለም።ሪፈር መፃፍ ይፈራሉ።"ትላለች።

    እሷ እንደምትለው ሪፈር ቢፃፍላቸው እንኳ አጃቢ ፖሊስ ወይም መኪና የለም በሚል ምክንያት ሳይሄዱ ይቀራሉ።ከሄዱም ሃኪም ጋር ሲቀርቡ እንኳ አጃቢ ፖሊስ አብሯቸው እንዲገባ ይደረጋል።

    ይህ ደግሞ እንደ ታካሚ ነፃነት እንዳይሰማቸው ያደርጋል ፤ ሃኪሞችንም ምቾት ይነሳል።

    ኒሞና ጥላሁን የሚባልና የካንሰር ህመምተኛ ጓደኛቸው ዛሬ መኪና ነገ አጃቢ ፖሊስ የለም በሚል የኬሞ ቴራፒ ህክምናውን በአግባቡ መከታተል አለመቻሉን ታስታውሳለች።

    "ኬሞ ቴራፒውን ባግባቡ መውሰድ አለመቻሉ ሞቱን አፋጥኖታል ብዬ አምናለሁ። ስፔሻሊስት ሊያያቸው ይገባል የተባሉ እስረኞችም ሃኪሞቹ በሚገቡበት ቀን የመወሰድ እድላቸው በጣም አነስተኛ ነው።ምክንያቱም መኪና ወይም አጃቢ ፖሊስ የለም ይባላል።" ትላለች።

    ለወሊድ በቀላሉ ሪፈር የሚፃፍ ቢሆንም አጃቢ ፖሊስ ወይም መኪና የለም በሚል ምክንያት የቅድመ ወሊድ ክትትል ግን የማይታሰብ እንደሆነ ትገልፃለች።

    ለሷ ቃሊቲ ማረሚያ ቤት በሚገኘው ክሊኒክ የመታከም ምንም ችግር ያልነበረ ቢሆንም የክሊኒኩ ባለሙያዎች ግን ብቃት ያላቸው እንዳልሆኑ ትናገራለች።

    የጥርስ ህመምን በምሳሌነት በማንሳት "ጊዜ የማይሰጠው የጥርስ ህመም እንኳ እዚያ ክሊኒክ ነው የሚታከመው።እስኪ ይሄን ያን እያሉ በመሰላቸው መንገድ የተለያዩ ህመም ማስታገሻዎችን እስረኞች እንዲወስዱ ያደርጋሉ።በጣም ብዙ ጊዜ የህመም ማስታገሻ ተወስዶ ነው ወደ ጥርስ ህክምና መሄድ የሚፈቀደው"ትላለች።

    ከማህፀን ጋር የተያያዘ ችግር ያለባቸው ሴቶች ሲመረመሩ አጃቢ ፖሊሶች አብረው እንደሚገቡና ይህ በጣም ነፃነታቸውን እንደሚጋፋ ጫልቱ ትገልፃለች።

    "እድሜ ልክ ወይም የሞት ፍርደኛ ከሆንሽ አጃቢ ፖሊሶች ቀዶ ህክምና ክፍል ሁሉ ይገባሉ"ትላለች።

    "አሞክሳ"

    በሽብር ተጠርጥሮ ታስሮ የነበረውና ከተፈታ በኋላ በተለይም የፖለቲካ እስረኞችን የችሎት ውሎ እየተከታተለ በመፃፍ የሚታወቀው ጌታቸው ሽፈራውም ለስረኞች ህክምና ማግኘት አስቸጋሪ እንደሆነ ይናገራል።

    በመሰረታዊነት የህክምና ችግር ፤ የመድሃኒት እጥረት ቢኖርም ለፖለቲካ እስረኞች ግን በተለየ መልኩ ህክምና ማግኘት በጣም ከባድ እንደሆነ ይናገራል።

    "ማእከላዊ ፣ቃሊቲ ፣ዝዋይና ቂልንጦም ነበርኩ" የሚለው ጌታቸው ሁሉም ጋር ይህ ነው የሚባል ህክምና እንደሌለ ይገልፃል።


    ከቂሊንጦ ወደ ዝዋይ ሲዘዋወሩ ሃኪሞች ታመምን ያሉ እስረኞችን አይን በማየት የተለየ ነገር ላዩበት እስረኛ ብቻ መድሃኒት ይሰጡ እንደነበር ያስታውሳል።

    እንደ ጫልቱ ጌታቸውም ለእስረኞች ዋናው ህክምና የህመም ማስታገሻ እንደሆነ ይናገራል።

    እሱ እንደሚለው ከማስታገሻ ሲያልፍ ደግሞ የሚሰጠው መድሃኒት አሞክሳሲሊን ነው።እስረኞች የታሰሩበት እስር ቤት ውስጥ ወዳሉ ክሊኒኮች ሲሄዱ የሚሰጣቸው አሞክሳሲሊን እንደሚሆን በርግጠኝነት እንደሚገምቱ ሁሉ ይገልፃል።

    በዚህ የተነሳም አሞክሳሲሊን በእስረኞች ዘንድ "አሞክሳ" እየተባለ ይጠራል።

    "የተወሰነ ሰው እንደገባ ለዛሬ በቃ ከዚህ ወዲህ ሁሉ ይባላል።"

    እስር ቤቶቹ ውስጥ ባሉ ሰራተኞች የተከሰሰ ሰው ሁሉ ወንጀለኛ ነው የሚል አመለካከት መኖርም ሌላው ችግር ነው ይላል። ጌታቸው።

    ጌታቸው እንደሚለው የምግብ ጥራት ችግርና ተፋፍጎ አንድ ቦታ ላይ መተኛት ራሱ እስረኛውን ለተለያየ ህመም ያጋልጣል።

    "ቂሊንጦ 160 ምናምን የሚሆን ካሬ ላይ 150 የሚሆን እስረኛ ይታሰራል።"የሚለው ጌታቸው በዚህ ላይ ህክምና ማግኘት አለመቻል እጅግ ፈታኝ እንደሆነ ያስረዳል።

    ህግና መሬት ላይ ያለው እውነታ

    እስረኞች እንዴት መስተናገድ አለባቸው የሚለው በህግ ታራሚዎች ህግ መሰረት መፈፀም ቢኖርበትም የሚታየው እውነታ ግን ህጉ ከሚለው የተለየ እንደሆነ የበርካታ ፖለቲካ እስረኞች ጠበቃ የሆነው አቶ ሄኖክ አክሊሉ ይናገራል።

    እስሯን ጨርሳ የወጣችውና በማህበራዊ ድረ ገፆች የጤናዋ ሁኔታን በተመለከተ መነጋገሪያ ሆና የነበረቸው ቀለብ ስዩም ጠበቃም ነበር አቶ ሄኖክ።

    አቶ ሄኖክ ጥብቅና ከቆመላቸው መካከል በቅርቡ ከስር የተለቀቀችው ንግስት ይርጋ፣ የቀድሞ የመኢአድ አመራር አቶ ማሙሸት አማረ ይገኙበታል።


    ጠበቃ ሄኖክ እንደሚለው እስረኞች አብዛኛውን ጊዜ እንዲታከሙ የሚደረገው ማረሚያ ቤቶች ውስጥ ባሉ ጤና ተቋማት ሲሆን በዚያ ያለው ዋናው ነገር ደግሞ ህመም ማስታገሻ ነው።

    "ከማረሚያ ቤቱ ውጭ እንዲታከሙ ሪፈር የሚፃፍላቸው ብዙ ከዘገየ ስለሚሆን በቀላሉ የሚታከም ህመም ከባድ ደረጃ ላይ ይደርሳል።በዚህ መልኩ የጤናቸው ነገር አስከፊ ደረጃ ላይ ደርሶ የሞቱ ሁሉ አሉ"የሚለው ሄኖክ የፖለቲካ እስረኛ መሆን ደግሞ ሌላ የራሱ ፈተና እንዳለው ያስረዳል።

    እሱ እንደሚለው በፖለቲካ በተለይም በሽብር ተጠርጥረው የታሰሩ ህክምና ማግኘት እንደሚፈልጉ ሲናገሩ በህክምና ባለሙያዎች ሳይቀር "አንተ/ችማ በሽብር ነው የታሰርከው" ብሎ የመፈረጅና የማግለል ነገር አለ።

    የፌደራል ማረሚያ ቤቶች አስተዳደርን በስልክ ማግኘት ብንችልም በጉዳዩ ላይ አስተያየት መስጠት አልፈለጉም።

    Read more »

  • በሰውነት ውስጥ ያለን የአልኮል መጠን የምታሳወቅና በእጅ ላይ የምትጠለቅ አነስተኛ መሳሪያ ተዘጋጀች

                           

    በሰውነታችን በተለይ በደም ውስጥ ያለውን የአልኮል መጠን በተከታታይነትና ለረጅም ጊዜ መቆጣጠር የሚያስችል መሳሪያ እንደተዘጋጀ ተነገረ።

    እጅግ አነስተኛ ስትሆን ዘመናዊ የእጅ ሰዓት አይነት መጠን ያላት ስትሆን በእጅ የምትጠለቅ ገመድ አልባ መሳሪያ ናት ተብሏል።

    መሳሪያዋ በአልኮል ሱስ፣ በአደገኛ ዕፅ እና በሌሎች ሱሶች የተጠቁትን ሰዎች ጤንነት ክትትልን ውጤታማ ማድረግ እንደምታስችል ተነግሯል።

    ከዚህ በፊት የሰዎችን የሱስ ተጋላጪነት ለመለካትና ለማወቅ ታማሚዎች ከሚሰጡት አስተያየት በመነሳት የህክምና አገልግሎት ሲሰጥበት የቆየውን ልማድ መቀየር የምታስችል መሳሪያ መሆኗም ተነግሯል። 

    ተከታታይነት ባለው ሂደት ህክምና የሚሰጥባት መሳሪያዋ ያልምንም ቀዶ ህክምና በጤና ተቋማት ህክምና ማድረግ የሚያስችልን እድል ፈጥራለች ነው የተባለው።

    መሳሪያዋ አነስተኛ ሀይልን የምትጠቀም በመሆኑ በባትሪዋ በኩል ሰዎች በመርዛማ ነገሮች እንዳይጠቁ ያስችላልም ተብሏል።

    በዚህም በመሳሪያዋ የተሰበሰበ መረጃ በሶስት ሰከንዶች ለመለከታ እንደሚረዳ ተገልጿል።
    እንዲሁም መሳሪያዋ ዘመናዊ የእጅ ሰዓት ስራውን በሚያከናውንበት መንገድ የሚንቀሳቀስ እንደሆነ ተነግሯል።

    የመሳሪያዋን ውጤታማነት ህይወት ባለቸው እንስሳቶች እንደሚያረጋግጡ ነው ተመራማሪዎቼ ያስታወቁት።

    በቀጣይ ጊዜያት ሰዎችን ከሱሰኝነት ለማላቀቅ ትልቅ ተስፋ ተጥሎባታል።

    ምንጭ:- ኤፍ ቢ ሲ(FBC)

     

    Read more »

  • የእናትና አባቱ ህይወት ካለፈ ከ4 ዓመታት በኋላ የተወለደው ጨቅላ

                   

    ቻይና ውስጥ በመኪና አደጋ እናትና አባቱን ያጣው ጨቅላ ከአራት ዓመታት ቆይታ በኋላ ተወልዷል።

    ጨቅላው ወደዚህች ምድር ለመምጣት የበቃው በውሰት ማህጸን አማካኝነት ነው ተብሏል።

    ሁለቱ ጥንዶች እንደ አውሮፓውያን አቆጣጠር በ2013 ነበር ይህን ዓለም የተሰናበቱት።

    ታዲያ ከህልፈታቸው ቀደም ብሎ በርካታ የመውለድ ሙከራዎችን እያደረጉ እንደነበር ተገልጿል።

    እንዲሁም በዘመናዊ መልኩ ለሚደረጉ ህክምናዎች የዘርፍሬና እንቁላሎችን በመለገስ ልጅ በመጠባበቅ ላይ ነበሩ ተብሏል።

    ከአደጋው በኋላ የሟቾቹ አራት ወላጆች በህግ ተከራክረው ከማህጸን ውጪ ያስቀመጡትን ሽል እንዲጠቀሙበት ተፈቅዶላቸዋል።

    አደጋው በተፈጠረበት ወቅት ሽሉ በህክምና ማዕከሉ ውስጥ በኔጌቲቭ 196 ዲግሪ በሆነ በፈሳሽ ናይትሮጅን ማቆያ ውስጥ ነበረ ተብሏል።

    የውሰት ማህጸን ባለቤተዋ የላዖስ ዜግነት ያላት ሲሆን በጎብኚ ቪሳ ወደ ቻይና የገባች እንደሆነች ተገልጿል።

    በዚህም ምክንያት የልጁ ዜግነት ሌላ ችግር ሆኗል ይላሉ።

    የልጁ አያቶች ታዲያ ማቾቹ ቻይናውያን ስለመሆናቸው የደምና የዘረመል ናሙና ለመስጠት መዘጋጀታቸው ተነግሯል።

    ምንጭ:- ኤፍ ቢ ሲ(FBC)

    Read more »